2 Samuil 5 - DAWAN BÎLA AISKA

Debit, Israel Juda wal kingka

¹ Baha piua luan ba ra, Israel kiamka nani sut Hebrón ra balan Debit wal aisaia, bara witin ra win: “Yawan nani sut na man tâmlia wina bamna,

² tânka pali ba kat lika, Saúl ba wan kingka, sakuna kasakka tânka ba kat man sika Israel luhpia nani tâ bri kapram war ra. Ba purkara, Dawan sin man ra pramis maikan, man sika Israel tâ bri pura wihtka aimakaia.”

³ Naku natka ra, Israel almukka nani sut Hebrón ra wih king Debit ra aisin, bara Debit lika witin nani wal lâ kum daukan, Dawan ai witniska baku brin. Bamna witin nani Debit ra yamni muni Israel kingka mangkan.

⁴ Debit king aimakan ba ra 30 mani bri kan, witin 40 mani king aimakan:

⁵ Hebrón ra Juda kingka 7 mani pura bakriki kata, baha ningkara Jerusalem ra Israel luhpia nani sut kingka aimakan 33 mani.

Saion kan kahbaika pliska Debit bui alkan ba

⁶ Debit ai uplika nani aikuki Jerusalem tawanka ra taki wan, Jebús uplika nani wal aiklabaia, baha tasbaya pîska ra upla iwi kan ba. Bara Jebús uplika nani lukan Debit tawan kutbanka dimaia sanska bribia apia, bara witin nani win: “Man nani sip nâra bal dimma apia, blain nani, skahwa nani aitani nâra sa bara mai swika dimbia apia.”

⁷ Ban sakuna, Saion kan kahbaika pliska ba Debit kutbi alkan, nanara baha tawanka ba nina Debit Tawanka mâkisa.

⁸ Baha piua ra Debit aisin kan: “Baha nani sut Jebús uplika nani mapara aiklabaia auya ba, lî plapaika untika tara bâk dimbia, bamna blain nani bara skahwa nani ba sut ikbia, kan yang sulki aiska baha nani ra misbara kaikisna.” Baha wina aisinka ba aula: “Blain nani bara skahwa nani ba sin Dawan tempelka ra dimbia apia sa.”

⁹ Baha ningkara, Debit lika kan kahbaika pliska ra takaskan, bara tawanka nina ba Debit Tawanka mâkan, bara tasbaya aiska ba kutbi lakan, tasba yakabi daukan pliska wina king watla dimaika ba kat.

Hiram bui ai lengstarka nani Debit ra blikisa

¹⁰ Debit ba yu bani kau karnakira taki kan, bara Dawan Gâd karnakira ba sin witin wal kan.

¹¹ Baha mita Hiram Tiro kingka ba, ai lengstarka ba Debit ra blikan, baha purkara utla mâmakra bara walpa tara klaklakra nani sin blikan, witin nani yalam dusa nani brih wan, bara King Debit iwaika watla ba mâkan.

¹² Bara Debit ai dara walan Dawan bui witin ra Israel kingka mangkan ba, bara ai kingka lâka ba sin karna daukisa bara yan pâwisa ai uplika Israel luhpia nani dukiara.

Debit luhpia wala nani ba

¹³ Hebrón wina Jerusalem ra wan ba ningkara, Debit bahara ai maya kau ailal brin, ai lila mairin nani sin. Bamna baha nani wina ai luhpia waitna nani bara mairin nani kau ailal brin.

¹⁴ Ai luhpia waitna nani Jerusalem ra aisubi takan nina nani ba: Samúa, Sobab, Natán, Salaman,

¹⁵ Ibhar, Elisuá, Néfeg, Jafía,

¹⁶ Elisamá, Eliadá bara Elifélet.

Debit bui filisteo nani pura luisa

¹⁷ Filisteo nani walan Debit ba yamni muni, Israel kingka mangkan ba; bara witin nani Debit pliki taki wan; sakuna Debit baha sturka walan ba ra, kan kahbaika pliska ba ra wih yukuwan.

¹⁸ Bara filisteo nani ba kau mapara dimi Refaim ilka bîla ba alki brin.

¹⁹ Naha mita, Debit ba Dawan wal aisin, bara makabi walan: —¿Filisteo nani wal aiklabaia sip sna ki? ¿Pura luanka lâka ba aikma ki? Bara Dawan pana win: —Âu, aiklas, kan pura luanka lâka ba maikamna.

²⁰ Bara Debit Baal-perasim ra wan, bahara filisteo nani ra pura luan. Baha mita Debit naku win: “Dawan ba lisamra baku yang waihli nani lilapas ra aimaki, luaiki ba param daukan.” Bara baku baha pliska ba nina Baal-perasim mâkan.

²¹ Baha purkara, filisteo nani ai aidulka nani ba lulki si plapan, bara Debit ai uplika nani aikuki baha nani wahbi brin.

²² Sakuna filisteo nani ba kli Refaim ilka bîla ra bal takaskan,

²³ bara Debit kli Dawan wal aisin, bara Dawan pana kli witin ra win: —Mai kaiki bâk wih aiklapara, sakuna kutbi brih nina wina bal dimi aiklas, bara pura luma balsam dusa nani pâwi ba kat wama ba ra.

²⁴ Dus nani purak mina binka nani taki aula walma ba ra, man taki aiklas, kan baha tânka ba yang lika man kainamra auna, filisteo aiklaklabra nani ra ikaia klalka yabaisna.

²⁵ Dawan dîa daukaia win ba baku Debit daukan. Bara filisteo nani ba baku pura luan, Gabaón wina Guézer kat.