2 Samuil 2 - DAWAN BÎLA AISKA

Debit ba Juda kingka mangkisa

¹ Baha ningkara, Debit bui Dawan ra makabi walan, bara win: —¿Yang Juda tawanka nani kum ra waia sna ki? Dawan bui witin ra pana win: —Âu, man waia sma. Debit kli makabi walan: —¿Ani tawanka ra yang waia sna? Bara Dawan pana win: —Hebrón ra.

² Debit ai maya wâl ba brih, Hebrón ra wan: Ahinóam, Jezreel tawanka wina ba, wala ba Abigail, Nabal piarkika Carmel wina ba.

³ Ai uplika nani taika sin brih wan, bara Hebrón tawanka nani ra iwan.

⁴ Baha ningkara Juda waitnika nani wih, Debit ba Juda kingka mangkan. Bara witin nani Debit ra win, Jabés, Galaad uplika nani bui Saúl ba bikan.

⁵ Bara bîla twatwilkra nani bliki, Debit baha nani ra win: “Dawan bui man nani ra ai yamnika ba maikbia, dawankam king Saúl ra yamnikam mariki blikram bamna.

⁶ Bamna Dawan sin kasak lukan, kupia yamni lâka ni ai yamnika maikbia baha sut yamnika dukiara. Bamna yang sin man nani ra pain mai lukisna.

⁷ Sakuna nanara man nani kupiam bri bas, karna bas. Saúl dawankam pruan sakuna, Juda kiamka bui yang na man nani kingkam ai mangkan.”

Israel bara Juda wal war ra ba

⁸ Sakuna Abner, Ner luhpia waitna ba, Saúl war wihtka tara ba, Is-bóset Saúl luhpia ba Mahanaim ra brih wan,

⁹ bahara witin Galaad, Guesurí, Jezreel, Efraín, Benjamín bara Israel aiska kingka mangkan.

¹⁰ Is-bóset mahka Israel kingka aimakan ba ra, witin 40 mani bri kan, mani wâl king aimakan. Sakuna Juda kiamka ba Debit ai kingka kulki kan,

¹¹ baku ba ra Debit Juda kingka aimakan mani 7 pura bakriki, ai kingka lâka kiapitalka ba Hebrón ra kan.

¹² Bamna Abner ba Mahanaim wina taki Gabaón ra wan, Is-bóset daknika tâura aimaki.

¹³ Baku sin, Joab, Seruiá luhpia ba, Hebrón wina taki wan Debit daknika ba wal, bara witin nani aikuki prawan Gabaón lî watla ba lamara. Aiklaklabra daknika wâlsut ba pana pana kaiki kan, kum ba baila kum ra, wala ba sin baila wala ra ai buaika nani dauki brin.

¹⁴ Abner bui Joab ra win, war ba naku tâ krikaia: —Wahma nani bal takbia, yawan wan tâura aiklabaia. Joab pana win: —Aitani, baku kabia.

¹⁵ Bamna baku, Benjamín bara Is-bóset Saúl luhpia ba watlika ra aiklabaia albika nani 12 sakan, Debit daknika tila wina sin wahma nani 12 sakan watlika ra aiklabaia.

¹⁶ Kumi bani ai walka lal ra alkan bara sord ni ai tnaya ra pana pana saban, bara witin nani sut baha kat kauhi pruan. Baha pliska nina ba Helcat-hasurim mâkan.

¹⁷ Baha yua war ba karna pali aiklaban, Abner ra bara Israel luhpia nani ra sin Debit suldiarka nani mita pura luan.

¹⁸ Seruiá luhpia nani yumhpa bâra kan: Joab, Abisai bara Asael. Asael ba plaplapra pali kan, sula twi langni ra karna plapi ba baku,

¹⁹ bara Abner ra rausauhkaia nina blikan, plapi swak takaia sanska wiria pan yaras kan.

²⁰ Bara Abner ai nina ra tawi kaiki, winan: —¡Asael, man sma! —¡Âu, latan yang sna! —baku witin win.

²¹ Bara Abner win: —Mahka ai swis, rau ai sauhkpara. Kanra yamni alba nani tila ba wina alks, bara diara nani brih auya ba brima. Sakuna Asael ban nina bliki kan bamna,

²² Abner kli witin ra win: —¡Takasks! Kau nini blîkpara, apia kaka man bui taibi ai munisma man ra mihti bukaia. Bara ningkara, ¿nahki dauki muihkam Joab mawan ra buamna?

²³ Asael ban nina bliki kan bamna, Abner ai langsika tnata ba ni Asael biara kat sabi tâ ba nina dusak sakan, bara Asael baha kat kauhi pruan. Upla sut Asael kauhi pruan ba pliska ra wan bara takaskan pruanka ba kaikaia.

²⁴ Sakuna Joab bara Abisai wal takaskras ban Abner nina bliki kan. Yu dimaia kat Amá ilka ra wan, baha lika Guíah ra sa, Gabaón upla iwras tasbaya ra waia yabalka ra.

²⁵ Bahara Benjamín uplika nani ba Abner aikuki asla takan, bara aiklaklabra nani sut waitna kumi baku asla taki, il kum bahna ra ai watla dauki brin.

²⁶ Bara Abner bui Joab ra winan: —¿Naha ikanka na takaskras ban iki kaia sa ki? ¿Damra walisma ki, naha tâka wina wan kupia tahplika baman saki wankbia ba? ¿Ahkia man uplikam nani ra adar yabaisma, ai muihni nani nina bliki ba takaskaia?

²⁷ Joab pana win: —Dawan nina ra swer taki mai wisna, man naku aisaras katma kaka, yang upliki nani ai muihni nani ninara bliki ba takaskras ban ingwaia kan.

²⁸ Ba ningkara, Joab ai uplika nani ra adar yan trumpit ba puhbia, bara upla sut ip takaskan, Israel luhpia nani nina blikras wal bara kau sin aiklabras.

²⁹ Baha tihmika aiska Abner ai uplika nani sut aikuki Arabá twiya ba bâk wapi lalawan, Jordan yabalka bara Bitrón yabalka wal lilak taih dakbi luan, bara Mahanaim kat wan.

³⁰ Joab bui Abner nina bliki kan ba swin, bara ai suldiarka nani ba sut asla kulkan, bara kulki kaikan Debit suliarka wina wihta tara nani ba 18 ikan kan, ba purkara Asael sin.

³¹ Ban sakuna, pana Debit nina blablikra nani mita Benjamín bara Abner suliarka nani ra 360 ikan.

³² Baha ningkara, Asael wîna tara ba Betlehem ra brih wan, bamna bahara bikan ai papika raitika ra. Bamna Joab ai uplika nani aikuki tihmia aiska wapi lalawan, ingwi takan taim Hebrón ra banhwi kan.