2 Samuil 16 - DAWAN BÎLA AISKA

Debit Sibá wal aisisa

¹ Debit il bahna ba wina wiria ai kanra lui wan ba ra, kaiks Sibá, Mefi-bóset albika, bahara taki balan witin wal prawaia. Biriku wâl mahka impakaia daukan, brit nani 200, wain mâ lâkan wina turtiya daukan 100 kum, dus mâ nani 100 kum, bara wain daiwan taya batilka kum, baha sut prahki bri aula kan.

² King bui witin ra makabi walan: —¿Dîa dukiara naha dukia nani na brih aulma? Sibá pana win: —Biriku nani ba lika king watla uplika nani ulaia dukiara; brit nani bara dus mâ nani ba, suldiar nani piaia, bara wain ba lika upla iwras tasbaya ra watauki nani swapan ba diaia.

³ King ba makabi walan: —¿Anira sa dawankam mulika ba? Sibá pana win: —Witin Jerusalem ra takaskan, bara lukisa ai damika kingka lâka kan ba, nanara Israel luhpia nani witin ra laki yabia.

⁴ Bara king bui pana win: —Baha aitani, bamna dîa Mefi-bóset dukia nani kan ba, nanara baha sut man dukiam sa. Sibá king mawanra bawi bara win: —¡King tara, kupia yamni lâka ba baku ban kaia si yang maipa ra!

⁵ King Debit ba Bahurim ra wan ba ra, Saúl taika wina waitna kum baha wina bal takan. Guerá luhpia waitna kan, nina ba Simí bara lahtubanka bîla nani aisi auya kan,

⁶ Debit ra bara wihta tara nani mapara sin walpa lulki kan. King ba upla nani mita bara ai suldiarka nani mita sin kan kahbi bri kan sakuna,

⁷ Simí witin ra ban lahtubi wi kan: —¡Naha wina laihura was, watawikira, upla âikra saura!

⁸ ¡Dawan bui man ra klala maikan, Saúl taika nani mapara saura daukram, bara witin nani sut ikram ba ai watlika ra king aimakaia dukiara! Nanara Dawan bui king lâka ba luhpiam Absalón mihta ra mangkan. ¡Man nâra sma, saurkam mita pruaia pâtka ra tawram, kan man lika upla âikra sma!

⁹ Bara Abisai, Seruiá luhpia ba, king ra win: —¿Dîa muni naha yul pruan na, swiram king tara ra lahtubisa? ¡Nanara pali aikrika lal dakbamna!

¹⁰ Sakuna king ba pana win: —Seruiá luhpia nani, naha lâka na man nani mita daukaia apia sma. Witin bui yang ra laihtubisa kaka, Dawan bui baku witin ra adar yan ba mita sika. Bara baku sa kaka, ¿ya sip sa ki witin ra diara tânka makabi walaia witin dauki ba?

¹¹ Ba ningkara, witin Abisai ra bara wihta tara nani ra sin tawi, aisi, win: —Yang luhpi pali rayaki ba tikaia plikisa, bara Benjamín taika kum ba, ¡kau nahki prais saura lukisa lukisma! Swis witin nani saura ai wibia, Dawan bui witin ra adar yan kaia sa baku daukaia.

¹² Ban kra Dawan lika yang trabilki nani kaikbia, bara naiwa saura ai win walisna na watlika ra, yamnika nani blîkbia.

¹³ Debit ai uplika nani aikuki, ai kan kat wapi kan. Simí sin il plahpia bâk wan, Debit wal ai tnaya kat lahtubi, walpa lulki, pukpuka buki.

¹⁴ King ai uplika nani aikuki impaki kan ba sut swapan pali Jordan kat wan, bara bahara ris bri banhwan.

Absalón Jerusalem ra dimisa

¹⁵ Baku kan ba ra, Absalón ba Jerusalem ra diman Israel luhpia nani aikuki bara Ahitófel sin.

¹⁶ Husai arquita Debit uplika ba, witin taki wan Absalón wal prawaia, bara wini kan: —¡King ba raya sa, king ba raya sa!

¹⁷ Bamna Absalón bui witin ra makabi walan: —¿Naha na man baku kasakkam lâka ba uplikam ra mairikisma? ¿Dîa kan witin wal man waras kapram?

¹⁸ Husai pana win: —Sip apia sna, kan yang lika, Dawan mita bara Israel luhpia nani sut mita sin bâk sakan ba, baha wal yang takaskamna.

¹⁹ Bara kli tânka wala ba sin, yang bui upla kum ra dukia daukaia sna kaka, baha yang uplika ba luhpia ra daukaia sna. Baku bamna, yang, king, dukiam daukamni, nahki aisikam dukia daukri ba baku.

²⁰ Kau tisku Absalón bui Ahitófel ra makabi walan: —¿Man nani dîa kupia kraukanka wankisma yawan daukaia?

²¹ Ahitófel bui Absalón ra win: —Papikam lila mairin nani, utla main kaiki kaia swin nani ba wal yaps. Bara upla sut Israel ra tânka bribia, man papikam ra misbara kaiki daukram ba, bara uplikam nani man wal yaba kau kupia tâ baikma.

²² Bara witin nani utla papakni kum king watla bahna purara daukan, bahara Absalón ai aisika lila mairin nani ba wal prawan, Israel luhpia nani sut nakra ra;

²³ bamna baha piua ra, Ahitófel wina sturi tânka kum makabi walaia ba lika Gâd bîla wina makabi walan baku kulki kan. Baha baku sika Ahitófel bîla karnika ba Debit dukiara, baku sin Absalón dukiara.