2 Kronikas 34 - DAWAN BÎLA AISKA

Josías kingka lâka ba

¹ Josías ba king aimakan taim 8 mani bri kan, bara Jerusalem ra 31 mani king aimaki kan.

² Josías daukanka nani ba wapni kan Dawan nakra ra, kan witin ai almukka Debit yabalka ra wapan, baha yabalka wina kitwi takras kan.

Josías lâ raya wala nani daukisa

³ Josías mani 8 king aimaki kan, witin ba kau wahma kan ba ra, witin ai almukka Debit Gâdka ba plikan. Bara mani 12 king aimakan ba ra, mahka idan nani ai pura suni pliska nani ba, Aserá lilka nani, aidul nani slilki paskan gâdka nani lilka ba sut slingban.

⁴ Josías kaiki kan witin nani Baal altarka nani lilka nani sât sât daukan ba sut sauhkan. Baha purkara, Josías sin blikan wan pura pliska nani ra kîa yamni angki kan altarka nani ba sin slingbaia. Bara Aserá lilka nani ba sin kriki yuya sirpi baman daukaia blikan, aidul nani ba, lilka paskan dukia nani ba baha nani sut ba yuya baman daukan.

⁵ Baha purkara prîs pruan nani dusa kata ba altar purara angkan, baku klin daukan Juda ra bara Jerusalem ra sin.

⁶ Baku sin Manasés, Efraín bara Simian tawanka nani ra daukan, bara Neftalí tawanka nani sut ra baku daukan tawan uplika aidrubaia asla takaia pliska nani ra.

⁷ Altar nani ba batakan, Aserá lilka bara aidul nani ba sut yamhpus baman daukan, bara sîka mâka kîa angki dauki tibilka nani sut sauhkan Israel tasbaya aiska ra. Ba ningkara kli Jerusalem ra balan.

Lâ ulban wauhkataya ba sakan

⁸ King lâka ra mani 18 alkan ba ra, tawan aiska ba klin daukan bara tempel ba sin, bara Safán blikan, Asalías luhpia ba, Amasías ra, tawanka ra alkalde ba, bara ai âiulbrika Joah ra, Joacaz luhpia ba, ai Dawan Gâdka tempelka ba kli paskaia dukiara.

⁹ Bamna naha uplika nani ba prîs tara Hilquías ra kaikaia wan, bara witinka ra bri si yan lalah nani upla mita Dawan tempelka ra sal yabi kan ba, baku sin Libait dur aihwawakra nani wahbi asla dauki kan ba, Manasés bara Efraín ra, naha na Israel luhpia nani kau takaskan ba wina, baku sin Juda bara Benjamín wina, sim baku Jerusalem uplika nani wina.

¹⁰ Hilquías baha brin ningkara, lalahka ba tempelka watla mâkaia tâ bri nani ba ra yan, baha nani tawi utla tara ba mâki uplika nani ra mana aibapbia dukiara.

¹¹ Baku bamna lalah ba wark tâ uplika nani ra bara watla tara aiska mâkaia tâ bri nani ba ra yan, walpa atkaia bara tat nani sin, baha wal tempel watla ba karnika yabi mâkaia dukiara, kan Juda kingka nani bui sut sauhki tikan kan bamna.

^12-13 Tempel watla kli paski nani ba ai warkka kasak yamni dauki kan, bara warkka tâura kan ba lika Libait nani Jáhat bara Abdías kata, Merarí kiamka nani, baku sin Sakaraya bara Mesulam, Quehat kiamka nani, baha nani ba diara sut lalka nani kata. Sim baku witin nani ba diara twatwilkra nani tâura kata, bara dîa warkka sut daukaia ba mariki kata. Libait nani ba miusik papulra nani kata, sturi âiulbra nani bara baku sin dur aihwawakra nani.

¹⁴ Lalah nani tempel ra bri sal yabi kan ba saki kan ba ra, tila ba wina sakan Dawan lâka ulban wauhkataya ba, Moses baku yan ba.

¹⁵ Bara minitka ra Hilquías mita sturi âiulbra Safán ra win, Dawan lâka ulban wauhkataya ba tempel watla ba wina sakan, bara Hilquías mita sturi âiulbra Safán ra lâka ulban wauhkataya ba yaban bara aisi kaikan.

¹⁶ Bara witin king ra brih wan, bara witin ra naku win: —King tara warkka dadaukra nani ba, witin nani dîa sut win ba daukisa.

¹⁷ Tempel ra silbar kata ba slilkan bara warkka tâ bri nani mihta ra mangkan, baha warkka tara nani tâ uplika ba.

¹⁸ Safán sin king ra win, prîs Hilquías witin ra wauhkataya kum yan ba, bara Safán king ra aisi kaiki yan.

¹⁹ King naha aisi kaikan ba walan wauhkataya ra dîa wi ba, bara witin ai kwalka bisbi kalkan.

²⁰ Baha ningkara king mita adar yaban Hilquías ra, Safán luhpia Ahicam ra, Micaías luhpia Abdón ra, sturi âiulbra Safán ra, baku sin Asaías king wihtka ba ra sin:

²¹ —Dawan ra wih makabi wals yang dukira, upla nani Israel bara Juda kiamka wina kau swin nani ba dukiara, naha wauhkataya ra ulbanka ba tânka; kan naha dukiara Dawan yawan wal ai kupia sauhkisa kaia sa, wan almukka nani Dawan dîa win ba kulkras kan bamna, baku sin dîa sut baha wauhkataya ra ulban ba kat daukras kan bamna.

²² Hilquías bara king bui mangkan nani ba aikuki prapit mairin Huldá ra wan, witin ba Salum maya mairin, Ticvá luhpia bara Harhás mulika, tempel kwalka main kakaira ba kira. Huldá Jerusalem ra Pîska Sekan ra iwi kan, bara witin ra aisin taim,

²³ witin bui win: —Naha sika Israel Dawan Gâdka kli tawi win ba: ‘Wis ai makabi walaia blikan uplika ra,

²⁴ yang Dawan sna ba, naku wisni: Naha pliska ra uplika sut ba âpu daukamni, nahara iwi nani ba sut ai saurka daukan ba tâwan, naha wauhkataya ra ulban aisi kaikan ba Juda king mawanra.

²⁵ Kan yang ra ai lulki swi bara sîka mâka kîa gâd bahki nani ra angki daukan bamna, yang maipara kupi tuskan lâka brih balan ai daukanka ba wal; baha mita kupi sauhkanka naha pliska ra balan, bara baha ba dasbia apia.

²⁶ Bamna Juda kingka ra wis, Dawan ra makabi walaia blikan ba, Dawan, Israel Gâdka ba, naku wisa: Man walaia apia kapram bara ai walram bamna,

²⁷ bara kupiam ra uya luki yang ra mihti ra aimakram bamna naha pliska ra bara ai uplika nani iwi ba mapara aisari ba walram bamna, bara man lika yang ra bawram bamna, kwalkam nani sin kalkram maiwanra, baha mita sin mai walri. Yang, Dawan, mai wisni.

²⁸ Yang mai swirka kupia kumi lâka ra pruma bara damikam nani wal prawma, sauhki tikan lâka naha tawanka purara bri aulna ba bara nahara iwi uplika nani ra sin, man baha wal prawma apia.’ King blikan uplika nani ba mahka tawi balan bîla win ba wih wiaia.

²⁹ Bara king bui almuk nani Juda bara Jerusalem ra nani ba sut paiwan, witin wal asla takaia.

³⁰ Ningkara king ba Juda uplika nani bara Jerusalem ra iwi nani ba, prîs nani, Libait nani, upla nani sut, tuktan wina almuk kat, witin nani aikuki Dawan tempelka ra wan. Bahara king ai bîla baikra tara wal lâ wauhkataya ba aisi kaikan, Dawan tempelka ra kan sakan ba.

³¹ Ningkara king ba utla playa bâra kan ba ra buan, Dawan mawanra pramis takan bîla wali daukaia, kasak lâka ra daukaia, ai kupia aiska, lâka bîla nani dîa baha wauhkataya ra ulban ba kat.

³² Ningkara yan Jerusalem bara Benjamín uplika kiamka nani bâra kan ba pramis takan dîa aisin ba daukaia. Bara Jerusalem ra iwi nani sut ba Dawan wal lâ daukan ba kat daukan, witin lika ai damika nani Gâdka ba.

³³ Josías mita Israel tasbaya aiska ra mayunra saura bahki nani dauki kan ba sut tikan, bara upla nani ba Dawan Gâd ra baman yan mayunaia. Bara witin raya kan ba ra, Dawan lâka wina tnaya ra tawi banhras kata, witin lika ai almukka nani Gâdka ba.