2 Kronikas 33 - DAWAN BÎLA AISKA

Manasés kingka lâka ba

¹ Manasés ba 12 mani bri kan ba ra king aimakan, bara Jerusalem ra 55 mani king lâka ra iwan.

² Sakuna witin saura daukan Dawan mawanra, kan nisan wala nani saurka daukan, Israel luhpia nani mawanra bara Dawan mita kangbi sakata ba baku:

³ idan nani gâdka bahki watla ai aisika Ezequías sauhki tikan kata ba, kli paskan; Baal altarka kata ba paskan, Aserá lilka nani sin kli daukan; baha sut purkara slilma nani kasbrika purara ba ra mayuni priaska daukan.

⁴ Bara altar nani paskan Dawan tempelka watla ra, baha dukiara kan wina Dawan bui win kan, witin ai iwaika brin kabia ban kaia ra Jerusalem ra.

⁵ Altar wala nani wâl paskan Dawan watla latka ra, baha nani ba slilma nani ra mayunaia.

⁶ Bara ai luhpia nani sakripais angkan Ben-hinom langnika ra, pirit nani ra wih ai pura sunan, yapi kaiki nani ra wan, diara kaiki nani ra wan pirit saura ra winaia, ai pura sunaia lâka bukan, sukia lâka nani daukan. Ai daukanka Dawan saura pali ba Dawan nakra ra daukan, Dawan kupia baikaia dukiara.

⁷ Baku sin aidul lilka nani Dawan tempelka ra mangkan, baha mita Dawan mita Debit ra bara ai luhpia Salaman ra wisata ba: “Naha Jerusalem tempelka watla bâk saki briri, Israel kiamka nani tila ba wina, yang iwaiki waitla ban kaia ra nini bâra kabia.

⁸ Bamna kli aima wala ra, Israel luhpia nani ba sakan kabia apia, baha tasbaya damika nani ra yâri ba wina dîa yang adarka yâri ba dauki kabia kaka, baha sin dîa lâka albiki Moses yan ba daukisa kaka.”

⁹ Sakuna Manasés daukan Juda bara Jerusalem ra aiska sut ba yabal saura ra wabia, bara saurka nani kau manis daukan, nisan wala nani Dawan bui sauhki tikata ba Israel wal.

¹⁰ Dawan bui Manasés ra bara ai uplika nani ra sin aisin, sakuna witin nani Dawan ra walras kan.

¹¹ Baha mita Dawan bui witin nani ra brih balan, Asiria kingka war wihtka nani, bara baha nani mita Manasés ra kiulh wal alki, bara bras sînka nani wal wilkan bara Babilon ra brih wan.

¹² Sakuna witin ai sarka tilara kan bara Dawan ra makaban, bara bawan ai almukka nani Gâdka ra.

¹³ Ai pura sunan bara Dawan walan ai makabanka ba bara kli Jerusalem ra yan balan, bara Manasés tânka brin ya ba Dawan Gâd sa.

¹⁴ Naha ningkara Manasés bui Debit Tawanka ra, Guihón waupasa tani ra, kutbanka tara kum paskan, baha ba lata tani bâk daukata, baha ba tingni kum bâk lui kan, ban pliska kum Inska nani Durka wi kan ba kat, baha ningkara Ófel kaina kir kutbaia. Kutbanka ba purara pali daukan. Bara kamandanti nani mangkan tawan nani bani kutbanka paskan tâ baikaia dukiara, Juda pliska nani ra.

¹⁵ Baha purkara witin Dawan tempelka ba wina tringsar nani gâdka ba, aidul nani ba sut sakan, idan altarka paskan kan ba sin sut sakan, Jerusalem ra, ilka nani purara, idan tempelka nani ba sin tawan wina sut saki lulkan.

¹⁶ Baha ningkara Dawan altarka nani ba kli paskan, bahara kli wal uplika takaia bara tingki wiaia sakripaiska daukan, bara Juda ra win Dawan Israel Gâdka ra baman mayunaia.

¹⁷ Ban sakuna, upla nani ba ban aidul ra tempel ra sakripais dauki ai pura suni kan, ai Dawan Gâd ra mayunra yabi kan sakuna.

¹⁸ Manasés sturka kau bâra ba, Gâd ra ai pura sunan ba, bara prapit nani Dawan bîla witin ra aisin ba, Dawan Israel Gâdka nina ra, baha sut ba king nani sturka ulban wauhkataya ra ulban sa.

¹⁹ Ai pura sunanka bara Dawan wina aisinka brin ba, ai saurka bara kasak apia daukanka nani bîla walras lâka nani daukan ba, aidul gâdka nani ra altar paski yaban ba, Aserá lilka nani mangkan kan ba, baku sin aidul nani lilka, Dawan ra bawaia watlika ra, naha sut ba prapit nani sturka tilara ulban sa.

²⁰ Witin pruan bara king watla latka ra bikan. Ningkara witin luhpia Amón king aimakan.

Amón kingka lâka ba

²¹ Amón ba king aimakan ba ra 22 mani bri kan, bara mani wâl Jerusalem ra king aimakan.

²² Sakuna ai daukanka sut ba saura kan Dawan nakra ra, ai aisika Manasés daukan baku, aidul nani sut ra mayunaia sakripais daukan, ai aisika Manasés daukata ba.

²³ Dawan mawanra bawras kan, sim ai aisika Manasés daukan baku, sakuna witin kau saura daukan.

²⁴ Ai suldiar lalka nani yukuwan ra mapara kan, bara king watla kat witin ba ikan.

²⁵ Sakuna tawan uplika nani bui pana ikan ya nani king Amón mapara yukuwi dauki kan nani ra, bara ai watlika ra ai luhpia Josías king aimakaia yan.