2 Kronikas 31 - DAWAN BÎLA AISKA

¹ Baha sut dauki luan ba ra, Israel luhpia nani bâra kata ba sut Juda tawanka nani ra wan, bara walpa ni lilka nani dauki bri kata ba sut kriki tikan, Aserá lilka nani ba krikan, idan gâd bahki holi pliska kata ba sin, baha dukia nani Juda ra bara Benjamín ra sin sut âpu daukan, baku sin Efraín ra bara Manasés ra kata ba, baha ningkara Israel luhpia nani kumi bani ai tawanka ra kli tawi wan.

² Baha ningkara Ezequías bui prîs bara Libait nani ra warkka yan, piua kat ai warkka natka daukbia ba kat upla bani dîa warkka daukaia kan ba daukbia, sakripais angkbia bara kli Dawan wal ai uplika takaia ba, bara wih Dawan ra mayunaia, tempel durka ba kat ai warkka dauki kaia.

³ Baha purkara king ba, witin dîa bri ba wina yan, titan bara tutni ra sakripais angkaia, ris yua ra, kati raya mayunra wala yua nani ra, sakripais angki daukaia, dîa Dawan lâka ra ulban ba kat.

⁴ Baku sin Jerusalem ra iwi kan nani ra adar yan prîs nani bara Libait nani ra yabia dîa yaia kan ba, Dawan lâka ra win ba kat daukaia, bara witin nani ai piua aiska Dawan warkka ra yabia.

⁵ Lâka ba mahka param takan ba ra, Israel luhpia nani diara ailal brin ba wina yan: wain, batana laya, nasma bara diara sâtka sut mangkan pâwan ba wina sin. Baku sin, matawalsip wina kum ba brih balan mâ sât bani sakan ba wina.

⁶ Israel ra iwi uplika nani ba sut bara Juda tawanka wala nani ra iwi kan nani ba sut, diara matawalsip bani wina kumi Dawan ra yabaia mânka ba brih balan, bîp nani, sîp nani, diara wala nani brih balan Dawan Gâd ra yan holikira sakaia, baha nani sut ba bri bal asla praki swin.

⁷ Kati yumhpa alkan ba ra, dukia nani ba mahka kwahkan, ban kati 7 kat kwahki kan.

⁸ Ezequías bara wihta nani aikuki wan diara nani kwahkan ba kaikaia, witin nani Dawan ra yamni win, Israel luhpia nani ra sin.

⁹ Bara Ezequías bui prîs nani ra bara Libait nani win, diara nani brin ba nahki yus munan ba walaia,

¹⁰ bara Azarías prîs tara ba, Sadoc taika wina ba, witin aisin: “Dawan tempelka ra prisantka nani bri balan ba wina, yawan plun piaia aitani brisa, kau manis pura takaskisa; kan Dawan bui ai uplika nani ra yamni munan bamna.”

¹¹ Bara baha tâka, Ezequías upla nani ra win plun apahkaia watla kum tempel lamara mâkaia. Baha mâkan ba ra,

¹² witin nani kasak lâka ra diara matawalsip wina kumi Dawan ra yaia mânka bri balan ba, prisantka nani yan ba sut, baha watla ra auhbaia. Libait Conanías baha diara nani kaikaia swin, bara muihnika Simí ba watlika ra mangkaia.

¹³ Aihwawakra baku kabia dukiara, Conanías bara ai muihni Simí munhtara king Ezequías bara Azarías wal mita naha uplika nani wahbi saki mangkan: Jehiel, Azazías, Náhat, Asael, Jerimot, Jozabad, Eliel, Ismaquías, Máhat bara Benaías.

¹⁴ Lalma durka main kakaira ba sin Libait kum nina Coré, Imná luhpia, upla nani Dawan ra diara brih warkka ba witin dauki kan pura sunaia warkka ba daukaia Gâd ra yaia ba, witin kaiki kan baha daukaia.

¹⁵ Prîs nani tawanka nani ra Coré ra hilp pain yaban, baku sin Eden, Minjamín, Jisas, Semaías, Amarías bara Secanías, ai uplika nani ra plun yaia kan ba yan, ai uplika bani ra sin, ai piua kat dîa daukaia yan ba kat daukan, almuk bara tuktan nani sin.

¹⁶ Yu bani tempel ra wan ai warkka daukaia, dîa wark daukaia piua kat, ai nina nani mangkaia wauhkataya ra, mani yumhpa bri wina ai purara.

¹⁷ Prîs nani ba utla dawanka bani ra nina mangkan, bara Libait nani lika mani yawanaiska kum wina ai purara nina ba mangkan kata, ai warkka bara ai piua kat.

¹⁸ Nina ulbaia wauhtaika ra ulban tuktan waitna lupia sut, maya mairin nani, luhpia waitna nani bara luhpia mairin nani, wiaia kaka tawan aiska, baha kasak luki daukan ai mihta ra yan ba, bara Dawan ra yaia sakan ba.

¹⁹ Tawan bani ra upla nani mangkan baha pata ba yuaia, waitna bani prîs nani Eran kiamka ba wina bara Libait nani wina nina ulban ba, baha twi tasbaya nani ra iwi kan ba prîs nani tawanka nani ra.

²⁰ Ezequías naha sut Juda ra daukan. Ai daukanka nani ba pain kan, wapni bara kasak Dawan Gâd mawanra.

²¹ Diara nani sut Dawan tempelka dukiara wark daukan ba, bara lâka nani ba sin, naha daukan sut ba ai kupia aiska Dawan lâka pliki daukan; baha mita dîa daukan sut ba yamni takan.