2 Kronikas 30 - DAWAN BÎLA AISKA

Ezequías Insal luan Yua Liliaka daukisa

¹ Ezequías bui Israel ra bara Juda aiska ra maisa pakaia blikan, baku sin Efraín bara Manasés ra wauhkataya ulbi bliki, paiwan Dawan tempelka Jerusalem ra balbia, Insal luan Yua Liliaka ba daukaia, witinka Israel Dawan Gâdka ba.

² King ba ai warkka uplika aikuki bara Jerusalem ra iwi nani ba aikuki sin aisin ba ningkara, witin lukan Insal luan Yua Liliaka ba daukaia,

³ kan baha yua mangkan ba kat sip daukras kata prîs nani aitani âpu kan ba mita witin nani tâski wina klin takan ba, baku sin upla nani ba Jerusalem ra asla takras kan.

⁴ Bara king bui witin ra bara tawan uplika nani sut lâka ba aitani kaikan bamna,

⁵ witin nani daukaia lukan bara Israel aiska ulbi maisa pakan, Beerseba wina Dan kat, paiwanka daukan ba Jerusalem ra wabia, Dawan Israel Gâdka ra Insal luan Yua Liliaka ba daukaia. Kan tâura upla ailal wal daukras kan, dîa Dawan lâka ra ulban ba kat.

⁶ Baku bamna, maisa papakra nani blikan wan Israel bara Juda aiska ra, king wina bara king warkka tâ uplika nani ba wina wauhtaya nani wal, king adar yan ba upla nani ra wibia dukiara: “Israel luhpia nani, Ebraham, Aisak bara Israel Dawan Gâdka ra taws, bara witin sin man nani ra tawbia, upla kulki Asiria kingka mihta wina swak takan ba.

⁷ Damikam nani kan ba baku kapara, bara muihkam nani baku sin, witin nani kasak lukras kan Dawan ra, ai damika nani Gâdka ra, ba mita witin sauhki tikan, nanara man nani kaikisma na.

⁸ Baku bamna, man nani kiamam karna kapara, damikam nani kan baku; mihtam buks Dawan ra kli lâ nani ba raya daukaia dukiara, bara bal Dawan wal aisaia watla ra, witin holikira ban sa piu bani. Dawan Gâdkam dukia dauks bara witin ai kupia lawanka ba takaskbia man nani wina.

⁹ Man nani ba Dawan ra tawma kaka, waihlam nani nanara kat muihkam nani ra taibi bri ba, baku sin luhpiam nani ra taibi bri ba, umpira kaikbia bara swika kli ai tasbaya ra balbia. Kan Dawan man nani Gâdkam ba, kupia latwankira sa, bara upla ra kupia pihni lâka brisa, bamna man nani ra mai swibia apia, man nani kli witin ra tawma kaka.”

¹⁰ Bîla twatwilkra nani ba Efraín aiska bara Manasés tasbaya ra sin wih win, tawan tara kum wina wala kat, ban Zabulón kat wan. Sakuna upla nani ba kaiki bara ai lawaska kiki kan.

¹¹ Ban sakuna, upla bâra kan Aser kiamka nani kum kum ba, Manasés bara Zabulón wina sin, Dawan mawanra bawan bara Jerusalem ra wan.

¹² Gâd sin upla nani ba nikban Juda wina king adarka ba kat daukaia, bara wihta nani win ba kat sin, baku Dawan blikan ba kat.

¹³ Baku bamna, upla ailal pali asla takan Jerusalem ra kati kum ningkara, brit îs âpu daukan yua ba dukiara.

¹⁴ Altar nani kîa yamni angkaia pliska Jerusalem ra paskan kata ba sut saki Cedrón tingnika ra lulkan.

¹⁵ Kati wâl yua 14 ba, sîp luhpia nani ikan Insal luan Yua Liliaka ba dukiara. Prîs nani bara Libait nani ai swira lukan, bara klin takaia daiwan nani ba iki Dawan tempelka ra brih wan angkaia pliska ra.

¹⁶ Ningkara witin nani ai pliska ba brin, Dawan uplika Moses lâka ra dîa win ba kat daukan. Prîs nani Libait nani wina tala ba brin bara srikban.

¹⁷ Sakuna kau upla ailal tawan ra klin takras kan, bamna Libait nani daiwan nani ikaia kan Insal luan Yua Liliaka ba dukiara, baha uplika nani ba kli daukaia, Dawan lamara brih waia dukiara.

¹⁸ Baha daukan ba ra upla ailal Efraín wina Manasés, Isacar bara Zabulón wina sin Insal luan yua Liliaka ba pi kan sakuna, witin nani klin takras kan. Sakuna Ezequías baha nani dukiara ai pura sunan, bara aisin: “Dawan kupia pihnikira, baha nani ai kupia aiska man ra mai pliki ba saurka swih tiks.

¹⁹ Dawan, man wan almukka nani Gâdka, naha uplika nani saura wina klin takras kra kabia, sakuna tempel ba klin sakan kabia ba want sa.”

²⁰ Bara Dawan Ezequías pura sunra ba walan bara upla nani pâtka ba swih tikan.

²¹ Baku ba ra Israel luhpia nani ba yu 7 Jerusalem ra kan, brit îs mangkras daukan yua tara liliaka ra. Bara prîs nani bara Libait nani ba yu bani Dawan nina mayuni kan baha miusik pulaia dukia nani ba wal.

²² Ezequías bui Libait nani sut ra yamni win ai kupia wilinkira Dawan warkka ra hilp munan bamna. Bara baha pata tara yua 7 sin luan ba ningkara, kli ai uplika takaia dukiara daukan bara Dawan ra mayunan ba, ai damika nani Dawanka ra.

²³ Upla nani sut ba lilia piua ba kau kitbaia want kan, bara liliakira kau yu 7 kitban, lilia pali kan bamna;

²⁴ kan Ezequías, Juda kingka ba, upla nani ra 1,000 bîp wainhka bara 7,000 sîp nani prisant yan, bara wihtka tara nani bui sin 1,000 bîp wainhka bara 10,000 sîp nani prisant yan. Prîs nani ailal saura wina klin takan.

²⁵ Juda uplika nani sut lilia takan, baku sin prîs nani ba bara Libait nani sin, upla wala nani Israel wina balan ba sin, bara tringsar Israel wina Juda lamara iwi kan nani ba sin sut.

²⁶ Baku bamna, lilia pali kan Jerusalem ra, kan king Debit luhpia Salaman Israel ra king kan yua ba wina, naha sâtka kau baku takras kata.

²⁷ Baha ningkara prîs nani bara Libait nani ba ai mina ra bûi, upla nani ra yamni munan; bara Dawan baha walan, bara ai pura sunra ba kasbrika purara Gâd holikira iwi ba kat walan.