2 Kronikas 10 - DAWAN BÎLA AISKA

King lâka baiki sakan ba

¹ Roboam Siquem ra wan, kan Israel luhpia nani sut bahara aidruban kata witin ba king mangkaia dukiara.

² Bara ban kan Jeroboam, Nabat luhpia ba walan, baha piua witin kau Idsip ra kan, witin bahara plapan kata king Salaman sîa bara Idsip ra takaski kan.

³ Bara blikan Jeroboam ba paiwaia, bara witin ba balan bara Israel luhpia nani asla takan kan ba sut bui Roboam ra aisi, bara win:

⁴ —Papikam lâka ba karna, karna pali kan; bamna nanara man papikam lâka ba wirâ swapni dauks, bara karban wirha wan purara wan sunan ba wina sin, bara yang nani bui man dukiam daukamna.

⁵ Bara Roboam pana win: —Yu yumhpa lubia ba ra, kli bal ai kaiki banhs. Bara upla nani ba mahka wan.

⁶ Bamna king Roboam bui kupia krauki makabi walan, ai papika Salaman kau raya kan piua ra almuk nani ai mawanra bri kan ba sut ra, bara makabi walan: —¿Dîa kupia kraukanka yang ra aikisma, naha uplika nani ra wiaia?

⁷ Witin nani naku win: —Man bui witin nani ra yamni munma kaka, dîa mai wi ba yama kaka, witin nani ra bîla yamni nani wal wima kaka, witin nani man warkkam daukbia ban kaia ra.

⁸ Sakuna witin almuk nani kupia kraukanka yan ba tnaya ra lakan, bara witin wal pâwan wahmika nani wina kupia kraukanka makaban, bara baha nani ai mawanra banhwi kan.

⁹ Baha nani ra makabi walan: —¿Dîa kupia kraukanka yawan yabia naha uplika nani ra, witin nani isti ai munisa dîa wiaia sna ba, karban wirha aisiki mita yabi kan bamna?

¹⁰ Bara wahma nani witin wal pâwan ba bui pana aisi, win: —Naku aisas naha uplika nani ra naha bîla nani witin nani mai win ba papikam mita karban sunan ba, man mita wirâ mâyara ikma, man naku aisas: ‘Papiki ba karna kan kaka, yang lika man nani ra kau karna kamna;

¹¹ papiki karban wirha mai sunan ba, yang lika karbanka ba kau wirha mai sunamni; aisiki bui wipaia kiwka ni mai wipi kan, sakuna yang lika silak kakma tatwa ni mai wipamni.’

¹² Yu yumhpa alkan ba ra, Jeroboam upla nani ba wal asla takan, baha nani aidrubi balan, king piua win ba kat, witin nani yu yumhpa kat kli witin ra aidrubi balbia.

¹³ Sakuna king ba upla nani ra karna pali aisin, witin almuk nani mita kupia kraukanka yan ba walras kata,

¹⁴ bara wahma nani mita kupia kraukanka yan ba saki, upla nani ra aisi, win: “Papiki mita karban wirha mai sunan ba, yang mita lika karban kau wirha mai sunamna, papiki mita wipaia kiwka ni mai wipan ba, yang bui lika mai wipamna kiwa kum tâura ayan tatwa wilki muni.”

¹⁵ King ba upla nani bîla walras kata, kan baha ba Dawan bui pat baku daukan kata, Dawan ai bîla ba kat daukaia prapit Ahías, Siló wina bâk aisin ba, Jeroboam, Nabat luhpia ba dukiara.

¹⁶ Israel luhpia nani sut kaikan king ba witin nani ra walras kan, bara pana naha bîla nani win: “¡Yang nani Debit wal diara âpu! ¡Jesé luhpia prapatika ba wal yang nani diara âpu! ¡Kumi bani wamtla ra was, Israel luhpia nani! ¡Bamna Debit ai taya nani kaina sunbia!” Bamna Israel luhpia nani sut mahka ai watla nani ra wan.

¹⁷ Roboam Israel luhpia nani Juda ra kan piua ra witin baha nani purara ban king aimaki kan.

¹⁸ Bara king Roboam bui Adoram ba blikan wan Israel kiamka nani warkka pura kakaira kan ba, sakuna Israel luhpia nani mita witin ba walpa ni sabi ikan. Bamna king Roboam pat pali war waginka kumi ra aimaki, Jerusalem ra plapan.

¹⁹ Bara baku sika Israel luhpia nani ba Debit watla mapara bûi dakwi takan, naiwa yua ba kat ban sa.