1 Tesalonaika 4 - DAWAN BÎLA AISKA

Gâd mita yamni kaiki rayaka ba

¹ Nanara, muihki nani, Dawan Jisas nina ra man nani ra mamkabisna bara sin kupiam kraukisna: man nani iwankam natka yamni ra yu bani kau pâwi kama, baha sika yang nani wina lan takram ba Gâd kupia lâka daukaia dukiara, bara pat baku dauki banhwisma ba.

² Dawan Jisas karnika mita, lâ nani mai smalki mai wîri ba, man nani pain kaikisma.

³ Man nani wina Gâd diara want ba naha sika: witin ai dukia nani kama, bara ya marit takras kaka, ai maya briaia apia sa.

⁴ Man nani waitna nani, kumi bani mayam ba sunu lâka ra bri kaia sma, bara yamni sin kulki kaia,

⁵ Gâd ra kakaira apia nani, ai maya mairin nani ra brinka karna ni bara lukanka saura ni bri nani ba, baku lika apia.

⁶ Upla kumi mita sin naha bisniska dukiara ai muihni ra kunin muni tâski lâka daukbiara. Naha dukia na kaina manis wina latan mai wi banhri: Ani uplika nahmuna swakwanka nani daukbia kaka, Dawan mita witin ra klala yabia.

⁷ Gâd mita tâski lâka âpu iwbia wisi wan paiwan sa, kuna tâski lâka ra lika apia.

⁸ Baku bamna, ya naha smalkanka nani bahki kulkisa kaka, upla kum ra lika bahki kulkras sa, sakuna Gâd ra sika, witinka pali ai Spiritka Holikira wankan ba.

⁹ Wan muihni nani ra latwan kaikaia tânka dukiara lika, yang diara kumi sin âpu sna man nani ra mai ulbaia, kan Gâd pali mita pat mai smalkan sa, pana pana walkam nani ra latwan kaikaia.

¹⁰ Bamna man nani piu bani baku daukisma, wan muihni nani Macedonia aiska ra iwi nani ba sut aikuki. Sakuna muihki nani, yang nani mita mamkabisni baha latwanka lâka brisma ba, kau dauki kama.

¹¹ Man nani trai kaiks bisniskam nani ba kat sâpkira ban dauki kaia, bara yang nani mai wîri ba baku, mihtam nani wal wark taki kaia.

¹² Naku dauki banhma kaka, lalukra apia nani ba kulkanka maikbia, bara diara kumi sin luha kama apia.

Dawan balaia ba

¹³ Muihki nani, yang nani want sna man nani kaiki kama pruan uplika nani ra dîa taki ba, baku man nani sari bri banhma apia, sim upla wala nani ai kanra diara bîla kaikanka âpu nani ba baku.

¹⁴ Yawan kasak lukisa Jisas ba prui kli buan; baku bamna, yawan kasak lukisa sim natka ra Gâd mita, witin ra kasak luki pruan nani ba, Jisas wal kli bukbia.

¹⁵ Naha mita sika man nani ra Dawan smalkanka ni mai wisni: Dawan balbia yua kat yawan kau raya nani kabia ba, pruan nani kan dakbi lubia apia.

¹⁶ Kan Dawan pali ba sika bîla baikra karnakira ba wal kasbrika pura ba wina bal iwbia arkinsal bîla baikra wal bara Gâd trumpitka wal sin. Bâra mika, Kraist ra kasak luki pruan nani ba, pas tâura bubia;

¹⁷ baha ningkara, yawan kau raya nani ba, witin nani aikuki kasbrika tilara wan brih wan kabia, Dawan wal pâsa purara prawaia. Yawan baku kabia Dawan wal, ban kaia ban kaia ra.

¹⁸ Baku bamna, pana pana walkam nani aikuki naha bîla nani wal maisa nihki tâm baiki bas.