1 Samuil 5 - DAWAN BÎLA AISKA

Gâd lâka auhbaika watla ba filisteo nani tasbaya ra sa

¹ Filisteo nani Gâd lâka auhbaika watla ba dakbi brih wan Eben-ézer wina Asdod ra;

² ningkara witin nani ai gâdka Dagón tempelka ra dingkan bara Dagón tnaya kat mangki swin.

³ Yapra wala titan Asdod uplika nani tempel ra balan ba ra, Dagón ba Dawan lâka auhbaika watla ba mawanra kauhan kan kaikan. Bamna Dagón ba alki buki kli ai watlika ra mangki swin.

⁴ Asdod uplika nani kli balan yapra wala titan, bara kli kaikan Dagón ba Dawan lâka auhbaika watla ba munhtara kauhi prawi kan. Lal ba bara mihta wâl ba sin krikan bara dur bîla kat wîna tara ba baman prawi kan. Wîna tara lilapas pîska ba baman bâra kata.

⁵ Baha takan ba wina naiwa kat, Dagón prîska nani ba Asdod tempelka ra dimaia aula ba ra, dur bîla ba ai mina taibras.

⁶ Baha takan ba ningkara, Dawan bui Asdod uplika nani sut ba ai tasbaya aiska ra sin klala saura yan, sibrin tara dingkan bara yukri sikniska ni sin wipan.

⁷ Asdod uplika nani kaikan naha trabilka nani sut takan ba ra, witin nani win: “Gâd lâka auhbaika watla Israel dukia ba yawan tilara ban bri kaia sip apia sa, kan Gâdka ba klala karna pali wankisa yawan ra bara wan gâdka Dagón ra sin.”

⁸ Ba dukiara filisteo wihtka tara nani ba sut paiwan, witin nani wal aikuki asla takaia, bara makabi walan: —¿Yawan dîa daukaia sa, Israel Gâdka lâ auhbaika watla ba wal? Witin nani pana win: —Gat tawanka ra brih was. Bara lâ auhbaia watla ba filisteo nani bui Gat ra brih wan.

⁹ Bahara brih wan ba ra, Dawan bui upla sut ra sibrin tara dingkan, tuktan sirpi wina tara ba sut yukri sikniska ni wipan.

¹⁰ Bara Gâd lâ auhbaia watla ba filisteo nani Ecrón ra brih wan. Sakuna lâ auhbaia watla ba brih wan ba ra, Ecrón uplika nani sin ini yahwan: “¡Israel Gâdka lâka auhbaia watla ba nâra bri balan sa wan iki tikaia dukiara!”

¹¹ Tawanka aiska ba purara prura sibrinka pat dingkan kan, Gâd wina klala karna pali blikan ba witin nani kaikan bamna. Bara filisteo wihta tara nani ba sut asla paiwan, bara win: “Israel Gâdka lâka auhbaia watla ba naha wina brih sâks. Kli bri si watla ra swis, kau wan iki âpu wan daukras ba ra.”

¹² Tawan inanka ba kasbrika purara ba kat uli wan, kan upla nani kau pruras raya kan ba sut yukri alkan wîna aiska ra.