1 Samuil 31 - DAWAN BÎLA AISKA

Saúl ai luhpia nani aikuki war ra pruisa

¹ Filisteo nani Israel luhpia nani wal aiklaban, bara Israel luhpia nani witin nani sîa plapan, kan manis ikan Guilboa ilka ra.

² Filisteo nani bal Saúl ra bara ai luhpia nani rausauhkaia nina blikan, bara ai luhpia Janatan ra ikan, Abinadab bara Malquisúa sin.

³ Baha wina kli trisbaya lalulkra nani ba sut asla taki, bara trisbaya nani lulkan ba sut Saúl purara batakan. Bara baha nani sîa Saúl sibrin pali daukan.

⁴ Baku bamna, ai hilpika sord twilki kan ba ra win: —Sordkam saki baha ni ai iks, naha idanka nani bal ai iki yang wal ai liliaka briaia apia tâwan. Sakuna hilpika ba baku daukaia brin daukras kan, witin sibrin pali dauki kan ba mita. Bara Saúl ai sordka saki baha purara kauhan.

⁵ Ai hilpika ba kaikan Saúl ba pruan kan, bara witin sin ai sordka ba saki baha pura kat kauhi witin wal pruan.

⁶ Baku baha yua Saúl ai luhpia yumhpa ba, ai hilpika bara ai suliarka nani sut aikuki pruan.

⁷ Israel luhpia nani il bîla baila wala ra iwi kan ba, Jordan lalma tani ra sin iwi kan ba sut kaikan, Israel aiklaklabra nani ba plapan, Saúl bara ai luhpia nani sin pruan ba, witin nani sin ai tawanka swih plapan. Bamna filisteo nani wih baha nani tawanka ra iwan.

⁸ Yaprika wala ra, filisteo nani taki wan pruan nani ba dukia turbaia, bara Guilboa ilka kat Saúl bara ai luhpia nani yumhpa wîna tara ba prawi kan sakan.

⁹ Bamna lal ba klaki dakban, aiklabaia dukia nani bri kan ba sin brin, bara filisteo tasbaya aiska ra upla blikan, sturka ba upla sut ra wiaia ai gâdka nani tempelka ra.

¹⁰ Saúl aiklabaika dukia nani sut Astarté tempelka ra brih wan bara wîna tara ba Bet-seán kutbanka ra pami swin.

¹¹ Jabés Galaad wina uplika nani walan filisteo nani Saúl ra dîa munan ba,

¹² bara waitna karna nani ba sut lâ daukan, bara tihmia aiska wapi lalawan ba ra, Bet-seán kutbanka ba wina Saúl wîna tara ba, luhpia nani wîna tara ba sin saki brin bara kli tawi Jabés ra balan, bamna bahara wîna tara ba angkan.

¹³ Ningkara wîna tara ba Jabés ra bri si bikan, dus kum munhtara. Baha ningkara yu 7 witin nani kaiki plun piras kan, sari baman.