1 Samuil 28 - DAWAN BÎLA AISKA

¹ Baha yua nani ra, filisteo nani war aiklaklabra nani ba sut asla paiwan, Israel mapara aiklabaia, bamna Aquís bui Debit ra win: —Man pat damra walisma ba baku, man bara uplikam nani sut lika yang nani tilira waia sma.

² Debit pana win: —Uba pain. Nanara, king, kakaira takma man dukiam dadaukra ba ani kat diara daukaia sip ba. —Baku sa kaka —Aquís Debit ra win—, yang bui suldiar nani wihtka mai mangkamna, bara man lika yang laimara ban kama.

Saúl bara Endor ra diara kakaira ba

³ Baha piua ra Samuil pat pruan kan, bara Israel luhpia nani sut pat ini luan kan, pruan ba pura mata; baha ningkara ai tawanka Ramá ra bikan, witin aisuban tasbaya ra. Bara Saúl bui diara kakaira nani, upla pruan piritka wal aisi uplika nani kan ba sut ai tasbaya wina kangbi sakan.

⁴ Filisteo nani asla taki, Sunem ra aidrubi bahara ai kiampka bapan, bara Saúl Israel luhpia nani sut asla dauki Guilboa ra ai kiampka daukan.

⁵ Sakuna Saúl bui filisteo nani kiampka ba kaikan ba ra, sibrin mita witin ra pura luan.

⁶ Bara witin Dawan wal aisaia plikan, sakuna Dawan pana witin ra aisaras kan yaprisauhkan ra, Urim bâk, prapit nani wal sin apia.

⁷ Baha mita Saúl wihta tara nani ra adar yan: —Upla pruan wal aisi ba mairka kum pliki was, bara yang wih witin wal aisi diara tânka kum plikaia sna. Wihta tara nani ba win: —Endor ra mairin kumi bâra sa, witin lika upla pruan nani wal aisisa.

⁸ Saúl kwala sât wala dimi, sât aihka taki ai yula kahbaika waitna wâl bri, tihmia ra mairka ba kaikaia taki wan. Bara witin ra win: —Yang bui man ra puri sunisni dîa yang ra takaia ba kaiki ai wis, ya piritka wal aisaia wimna ba, paiws balbia.

⁹ Mairin ba pana win: —Man kaikisma Saúl dîa daukan ba, diara kakaira nani, upla pruan piritka wal aisi uplika nani ba sut ai tasbaya wina kangbi sakan. ¿Bara dîa muni man bui yang rayaki tikaia pâtka ra ai dingkisma?

¹⁰ Sakuna Saúl swer taki win: —Dawan nina ra yang bui man ra swer takisna, naha wina man ra diara saura takbia apia.

¹¹ Mairin ba pana win: —¿Ya winrika balbia want sma? Saúl win: —Samuil ra wins.

¹² Tris lakan ba ra, mairin ba Samuil kang kaikan bara alai inan; ningkara Saúl ra win: —¡Man ba king Saúl! ¿Dîa muni kunin ai munisma?

¹³ Sakuna king ba witin ra win: —Sirang iwpara. ¿Man dîa kaikram? Mairin ba win: —Gâd kum tasba wina bal ulisa kaikisna.

¹⁴ Saúl makabi walan: —¿Dîa baku sa wîna daukra ba? Mairin ba pana win: —Waitna almuk kum sa bara prâk tara dimisa. Saúl pat ai tânka brin baha ba Samuil, bara witin ai mawanra tasba ra bawan.

¹⁵ Samuil witin ra win: —¿Dîa kan man ai warbisma, ai munram nâra aulna? Saúl pana win: —Yang kupi wirha pali sna, filisteo nani yang ai sauhkaia tikaia aula ba ra Dawan ai lulki ai swin. Prapit nani bîla bâk, yaprisauhkan bâk sin yang ra aisaras. Baha mita yang bui man ra winri, yang dîa daukaia sna ba man bui ai wiaia.

¹⁶ Samuil pana win: —¿Dîa muni yang ra makabi walisma, Dawan pat lulki mai swin, nanara witin lika man waihlam takan ba?

¹⁷ Dawan bui yang ra ai win mai wîri ba baku, witin bui man wal daukan. King lâka ba man wina dakbi sakan, bara uplikam Debit ra yan.

¹⁸ Man lika Dawan adarka bîla nani wali daukras, Amalec uplika nani iki âpu daukaia mai win ba sin daukras kapram. Baha mita nanara Dawan ba man wal naku daukan.

¹⁹ Baha purkara, Israel luhpia nani bara man sin Dawan bui filisteo nani karnika mihta ra mai mangkbia bara yauhka man bara luhpiam nani sut yang wal kabia. Bara Dawan sin daukbia Israel luhpia nani kiampka ba filisteo nani mihta ra kauhbia.

²⁰ Baha bîla nani Samuil aisin ba, Saúl walan bara sirang tara iwan. Tasba kat kauhan ai yarika ra, dring pruan, kakna bara tihmia sin plun piras kan bamna.

²¹ Mairin ba kaikan Saúl sinska ba aihka takan, karnika âpu takan kan, bara ai lamara wih witin ra win: —Yang dukiam dadaukra mairin, man makabram ba daukri. Yang rayaki wal puli, man adarkam bîla walri.

²² Nanara yang bui man ra mamkabi aisisna na dauks, plun wiria dauki maikaisna man karnikam briaia bara kainamra impakaia dukiara.

²³ Saúl plun pin daukras kan, sakuna ai wihtka tara nani bara mairin ba bui sin kli kli aisi kan bamna, ban âu takan. Ba ningkara tasba wina buan, bara krikri ra iwan.

²⁴ Bara mairin ba bîp lupia batanira kum ai watla ra bri kan ba ikan, plawar akban, brit îs âpu ba daukan bara angkan.

²⁵ Ningkara Saúl ra yan, wihka tara nani ra sin, bara pin ba ningkara sim tihmika mahka wi banhwata.