1 Samuil 27 - DAWAN BÎLA AISKA

Debit filisteo tasbaya ra ba

¹ Ban sakuna, Debit luki kan: “Naiwa, yauhka kra Saúl ai ikbia. Baha mita kanra yamni yang filisteo tasbaya ra plapamna, bara Saúl ai âuyapah ai swibia, Israel tasbaya aiska ra sin kli ai pliki tauki kabia apia. Baku lika Saúl mihta wina swak takamna.”

² Baku Debit waitna nani 600 ba aikuki, ai yula kahbi yabal ra taki wan Aquís, Maoc luhpia Gat kingka dukia daukaia.

³ Debit ai suliarka aikuki Gat ra iwan, Aquís wal, ai suliarka kumi bani ai taya nani aikuki. Debit ai maya wâlsut brih wan: Ahinóam, Jezreel wina ba, bara Abigail, Nabal piarkika, Carmel wina ba.

⁴ Saúl walan Debit Gat ra plapan ba, bara nina bliki taukaia ba mahka swin.

⁵ Bara Debit bui Aquís ra naku win: —King tara ba ai uplika yamni ai kulkisa kaka, yang lika witin ra puri sunisni, tawan sirpi kum ra iwaia adarka aikbia; aitani apia sa dukiam dadaukra na king tara man wal tawan tara ra iwi kaia ba.

⁶ Baha yua pali, Siclag tawanka ba Debit ra yan. Baha mita, naiwa yua kat Siclag ba Juda tasbaya pîska kum ban kulkan sa.

⁷ Debit filisteo tasbaya ra mani kumi pura kati walhwal iwan.

⁸ Baha piua Debit ai uplika nani aikuki taki wi kan Guesur, Guézer bar Amalec uplika nani mapara aiklabaia, bara dukia nani dakbi brin, witin nani iwi kan ba tasbaya ba Telaím wina Sur yabalkak ban Idsip kat.

⁹ Baha tasbaya ra aiklabi kan bara waitna, mairin kumi sin raya swiras kan. Sîp nani, bîp nani, biriku nani, kiamilka nani sin bara kwalka nani sin sut brih wan. Baha ningkara Aquís ra kli balan,

¹⁰ bara Aquís bui Debit ra makabi wali kan: “¿Naiwa ani tawanka dukia nani dakbram?” Debit pana win: “Juda tasbaya waupasa tani ra”, wibia kaka, “Jerahmeel waupasa tani ra”, “quenita nani tasbaya waupasa tani ra sin.’’

¹¹ Debit bui waitna kum, mairin kum pan raya swiras kan. Debit baha daukan, upla kum kra Gat ra wih ai dahra aisabia sîa. Debit filisteo ra iwi kan piua nani sut witin baku daukan.

¹² Bamna Aquís lika Debit ra luki tniwi kan, bara sin luki kan: “Debit ba Israel ra kau misbara kaikisa, bara baku lika yang duki dadaukra ban kabia.”