1 Samuil 19 - DAWAN BÎLA AISKA

Saúl bui Debit ikaia lukisa

¹ Saúl bui ai luhpia Janatan ra bara war wihtka nani ra sin adar yaban Debit ba ikaia. Sakuna Janatan sika Debit ra latwan pali kaiki kan,

² bamna ai bîla blikan Debit ra: —Aisiki Saúl mai ikaia ridi takisa. Yauhka titan kainam kaiki bas, yakan plis kum ra yukuwi bas.

³ Yang takamna aisiki wal, man nâra sma ba pali kat wamna. Witin wal man sturkam aisi kaikaisna dîa pali takisa, bara tisku yang mai wimna.

⁴ Janatan bara Saúl wal aisin Debit dukiara. Witin ra win: —King tara, man Debit mapara saura daukaia apia kapram, witin king tara mapara saura kumi sin daukras, yamnika lika ailal pali daukan;

⁵ ai rayaka ba wal puli filisteo ba ikan, baku Dawan bui swaki sakan lâka aiska ba Israel ra yan. King tara ba dukiara kaiki lilia pali takan. ¿Bara dîa dukiara nanara king tara ba ai kupia mununhtara saura lukaia, upla pâtkas kum ba rayaka dukiara? ¿Nahki Debit ba pâtkas ikaia?

⁶ Bîla nani sut Janatan aisin ba, Saúl walan bara ai bîla baikra sakan: —Dawan nina ra swer taki aisisna, Debit prubia apia.

⁷ Janatan wih Debit paiwan bara witin nani dîa aisin ba sut win. Baha ningkara Saúl mawanra brih wan, bara Debit ban Saúl dukia dauki kan, blasi dauki kan ba baku.

⁸ War ba kli bukan, bara Debit taki wan filisteo nani mapara aiklabaia bara pura lui, sut munan plapan.

⁹ Bamna Saúl lika ai watla ra iwi kan, ai langsika ai mihta ra brih, bara pirit saura Dawan wina ba bal witin ra diman. Debit lika arp kangbi kan,

¹⁰ bara ai kupia ra lukan ai langsika ba ni Debit ba utla tnaya kat sabi swiaia. Sakuna Debit baha wina irbi swak takan, langsika ba utla tnaya kat saban. Baha tihmika Debit swak taki mahka plapan.

¹¹ Saúl aihni pali adar yan waitna nani Debit watla ra waia, tihmia bahara aihwaki kaia bara titan ra Debit ba ikaia. Sakuna ai maya Mical ai kaina kaiki maisa pakan: —Man naha tihmia swak takras kama kaka, yauhka titan lika man waitna pruan kum kama.

¹² Bara sim minitka ra, Mical bui windar kum bâk latara lahban, bara witin plapi swak takan.

¹³ Bara Mical wih utla bîla wina aidul tara kum bri si, Debit krikrika ra suni swin, bara wihta kahbaika kum mangkan, guts taya ni pitbi daukan ba ni pura biki swin.

¹⁴ Saúl waitna nani ra adar yan, Debit ba aihni muni bri balaia, bara Mical bila win witin siknis sa.

¹⁵ Sakuna Saúl ai waitnika nani ba kli blikan wan Debit pliki, bara naha adarka witin nani ra yan: —¡Krikri ra kabia sin, sakuna baha wina saki yang ra bri bal, ikaia dukiara!

¹⁶ Saúl waitnika nani ba Debit watla bilara diman, sakuna krikrika ra aidul kum guts taya ni pitbi daukan bara lal kahbaika kum wal baman sakan.

¹⁷ Bara Saúl bila Mical ra win: —¿Dîa muni naku natka ra kunin ai munram, waihli ba swiram plapi swak takan? Mical pana win: —Swirka plapras kabia kaka, witin ai ikaia swer takan bamna.

¹⁸ Naku Debit swak takaia sip kan. Bara witin Samuil kaikaia Ramá ra wan, bara Saúl dîa daukan ba sut win. Baha wina Samuil bara Debit wal Naiot ra wih iwan.

¹⁹ Saúl ai dara walan Debit ba pat Naiot ra kan, Ramá tasbaya wala ra,

²⁰ bara Saúl ai uplika nani tila blikan Debit alkaia. Baha nani wan ba ra, kaikan prapit dakni kum Samuil bui tâ bri kan spirit diman, dahra aisi banhwi kan. Bara Gâd spiritka ba Saúl waitnika nani ra sin diman, bara baha nani sin dahra aisi banhwan.

²¹ Saúl baha walan ba ra, witin waitna wala nani saki blikan wan, sakuna baha nani ra sin dahra aisaia spiritka diman. Bara Saúl aima yumhpa ra waitna nani blikan, sakuna baha nani ra sim baku takan.

²² Bara Saúl ai wîna tara Ramá ra wan, Secú ra liwanhta tara ba lama kat wan, bamna Samuil bara Debit wal dukiara makabi walan. Kumi baman lika bâra kan witin ra wiaia, Naiot ra sa, Ramá tasbaya ra,

²³ bara Saúl bahara waia mahka impakan. Bamna Dawan spiritka witin ra sin diman, bara witin sin mahka wini dahra aisin, srutwi pulan, ai yabalka aiska ra Naiot ra wan ba kat, Ramá tasbaya ra.

²⁴ Ba purkara witin ai kwalka nani sut daikan, kwala luha, spirit diman Samuil mawanra dahra aisi kan, yu aiska bara tihmia sin. Baha wina sika aisinka ba bal takan: “¿Saúl sin prapit kumi sa ki?”