1 Samuil 18 - DAWAN BÎLA AISKA

Janatan Debit wal swer taki aisi pâna takan

¹ Debit ba Saúl wal aisi swin ba ningkara, Janatan ba Debit wal ai uplika aihwa pali takan, ai wîna baku latwan kaikan.

² Saúl, baha yua wina Debit ba ai lama kat, ai dukia dadaukra brin, kli sin swin ai watla ra waras kan.

³ Bamna Janatan bara Debit wal ai muihni ban kaia lâka daukata, kan Janatan Debit ra latwan kaiki kan ai wîna baku.

⁴ Baha purkara, Janatan ai prâka tara ba bara mununhtara dimi kan kwalka ba sin daiki Debit ra yan, pantamangka, ai maisa wilkaika, ai sordka nani ba sin.

⁵ Debit diara daukaia Saúl mita adar yabi kan ba, Debit witin baha daukaia sip ba, kasak dauki witin ra mariki kan, bara Saúl mita Debit ba suldiarka nani sut wihtka mangkan. Bara suldiar wihtka nani ba suldiar nani sut baha yamni kaikan.

Saúl bui Debit ra misbara kaikisa

⁶ Ban sakuna, Debit bui filisteo ba ikan ningkara suldiar nani ba tawi balan taim, Israel tawanka sut wina mairin nani taki balan, aiwani, dans puli liliakira, drum pruki, pân pruki bara bin sâtka wala dauki, king Saúl aula ba liliakira briaia.

⁷ Aiwani dans puli kan ba ra, mairin nani ba kli kli aiwanan: “Saúl waitna nani 1,000 ikan, bara Debit lika 10,000 ikan.”

⁸ Baha aisanka ba Saúl saura lukan, bara ai kupia baiki naku aisan: —Debit ra kau kulkanka yabi 10,000 ikan wisa, yang ra lika 1,000 baman. ¡Kau diara wala âpu, king mangkaia baman sa!

⁹ Baha yua wina, Saúl ba Debit ra ai kupia munhtara saura luki kan.

¹⁰ Yu wala ra, pirit saura Dawan wina blikan ba Saúl ra diman, bara witin sinska saura takan utla bîla kat. Debit ai natka ba baku arp kangbi kan, Saúl ai langsika ba ai mihta ra bri kan, ai kupia ra lukan Debit ba utla tnaya kat sabi swiaia.

¹¹ Bara ai langsika ba tit buki lulkan, sakuna Debit aima wâl irbi swak takan.

¹² Saúl lika Debit sibrinka bri kan, kan witin kaikan Dawan Debit ra tâ baikisa, sakuna witin ra lika apia.

¹³ Baha mita, Debit ba ai lama wina saki bara suldiar daknika tara kamandantika mangkan, bara witin suldiar daknika tâ brih taki wih, kli bal dimi kan.

¹⁴ Dawan ba Debit wal kan ba mita, diara sut witin dauki ba tilara lilia baman bri kan.

¹⁵ Baha mita Saúl ba Debit ra sibri kan, witin diara dauki ba sut yamni baman taki ba mita.

¹⁶ Israel bara Juda uplika nani sut Debit ra latwan kaiki kan, witin sika dakni ba tâ aimaki unta ra brih wi kan bara sin bri bali kan.

¹⁷ Yu kum Saúl bui Debit ra win: —Merab luhpi mairin almukka ba man mayam maikaisna, sakuna naha pramiska wal: Yang aiklaklabriki kum kupiam karna kama bara Dawan warka nani ba sin aiklabi kama. Saúl ai kupia ra lukan, baku witin pali mita lika Debit ba ikbia apia, sakuna yaka filisteo nani mita ikan kabia.

¹⁸ Sakuna Debit pana win: —Yang na bahki sna, yang taiya nani sin bahki sa Israel ra, yang na king dapnika takaia.

¹⁹ Ban sakuna, Merab ba Debit wal maya baikaia piua ba alkan ba ra, Debit ra yaia watlika ra, Meholá wina waitnika Adriel ra ni yan.

²⁰ Sakuna Saúl luhpia mairin wala Mical, Debit ra latwan kaiki kan. Upla wala nani bui baha Saúl ra win ba ra, witin aitani pali lukan,

²¹ Mical ba Debit ra yabia lukan, bara yaka maya bui filisteo nani mihta ra mangkbia. Bamna kli aima wala ra Debit ra win: —Nanara lika man ba yang daipna takma.

²² Baha aisi si ningkara, Saúl ai albika nani ra win: —Man nani wâl man taki, yang bîli wisi Debit ra naku aisi wis: ‘King man dukiamra pain lukisa, ai albika nani sut sin yamni lukisa, man ba witin ai dapna takaia.’

²³ Saúl albika nani ba wan, bara king dîa win ba kat Debit ra win, sakuna Debit pana win: —¿Man nani lukisma, tânkas wapi wih prisant king dapnika takaia, yang baku upla bahki umpira kum sna na?

²⁴ Albika nani ba Saúl ra wih win, Debit dîa aisin ba sut.

²⁵ Bamna Saúl bui Debit ba filisteo nani mihta ra mangkaia lukanka ba wal, witin nani ra naku aisin: —Man nani Debit ra wis upla ai maya kum briaia mana yabi ba natka baku, yang kau brin ai dauki ba witin wina aikaia, filisteo waitnika nani wîna taya 100 kum, baha wal yang waihli nani ra pana munaia.

²⁶ Saúl albika nani ba naha sturka sut Debit ra win, bara Debit luki kaikan baha ba aitani sa, baha sans kum sa baha wal king dapnika takaia.

²⁷ Debit ai waitnika nani brin, bara wih ki filisteo nani 200 ikan, bara waitna wîna tâ ba sut klaki bri si king ra yan, bara nanara lika sip kan king dapnika takaia. Bara Saúl bui Debit ra ai luhpia mairin Mical ba ai maya yan.

²⁸ Sakuna Saúl nâra param kaikan, Dawan Debit ra tâ baiki kan, Mical sin Debit ra latwan kaiki kan,

²⁹ nanara witin kau sibrin takan, bara Saúl ai yua sut ra Debit ba ai waihla kaikan.

³⁰ Tani wala ra, filisteo nani aiklabaia aula piua bani ra, filisteo war wihtka nani tilara Debit ra kau kulkanka tara yabi kan, witin kau karna aiklabi kan ba mita.