1 Samuil 15 - DAWAN BÎLA AISKA

Dawan bui Saúl ra lulki swin

¹ Yu kum Samuil bui Saúl ra wan: —Damra walisma, Dawan bui ai blikan yamni mai munaia, ai uplika Israel luhpia nani kingka mai mangkaia. Bahamna nanara wals Dawan mai aisi na.

² Dawan karnika sut pali bri ba, naku wisa: ‘Amalec uplika nani ra klala yabaisna, Israel luhpia nani Idsip wina aula kan mapara buan ba tâwan.

³ Bahamna nanara, was bara witin nani ba sut âpu dauks, waitna nani ba, mairin nani ba, tuktan nani bara swap lupia nani ba sin, bîp wainhka nani, sîp nani sut sin, kiamilka bara biriku nani sut iki âpu dauks.’

⁴ Saúl ai uplika nani sut Telaím ra paiwan, bara kulki kaikan 200,000 waitna nani bâra kan wapi aiklaklabra Israel wina, bara wala 10,000 Juda wina.

⁵ Baha ningkara Saúl lika Amalec kiapitalka ra wan, tingni bîla lâwan kum ra dimi ai watla dauki brin,

⁶ bara quenita nani ra win: —¡Tnaya ra taws! ¡Amalec uplika nani tila wina taks, man nani sin witin nani tilara aikuki mai sauhki tikaia, yang brinki apia; kan Israel luhpia nani Idsip wina balan piua, man nani sika witin nani ra yamni munram ba mita! Bara quenita nani sut Amalec uplika nani tila wina tnaya ra tawan.

⁷ Bâra sika Saúl Amalec uplika nani ra aiklaban Havilá wina Sur tawanka kat, bara Idsip ra dimi waia ba kat baha nani ra pura luan;

⁸ bamna king Agag ba raya alki priskan, bara ai aiklaklabrika nani sut lika sord ni klaki ikan.

⁹ Ban sakuna, Saúl bara ai aiklaklabrika nani bui Agag ba ikras kan, daiwan kau pain, sîp wainhka nani, sîp mairin, bîp wainhka nani, bîp luhpia batanira nani kan ba, diara kau pain mana tara dukia nani kan ba sin sut sauhki tikras kan. Witin nani iki sauhki tikan ba lika diara bahki nani, diara sipar nani ba baman sauhki tikan.

¹⁰ Ningkara Dawan bui Samuil ra aisi, win:

¹¹ —Yang sari sna Saúl king mangkri ba, witin bui yang wina tnaya tawan bara bîli kat wali daukras. Samuil kupia ra trabil munan bamna, witin tihmia aiska Dawan ra ai pura suni lalawan.

¹² Bara titanka kau puk pali kan Samuil buan, Saúl wal wih aisaia; sakuna witin ra maisa pakan, Saúl lika pat Carmel ra taki wan kan walpa ni ai lilka kum paskan ba kaikaia, baha ningkara diara wala dauki Guilgal ra waia.

¹³ Bamna Samuil taki wan Saúl bâra kan ba kat, bara Saúl witin ra win: —Dawan yamni mai munbia. Dawan adarka ba kat yang pat daukri.

¹⁴ Samuil pana aisin: —Baku daukram kaka, ¿baha dîa tânka sîp nani inanka bara bîp wainhka nani uhbanka yang walisna ba?

¹⁵ Saúl pana aisin: —Baha nani ba Amalec wina bri balan, kan uplika nani bui sîp nani bara bîp wainhka nani kau pain ba wal takaskan Dawan Gâdkam ra sakripais dauki yaia dukiara. Sakuna tâka kan ba lika yang nani sut sauhki tikri.

¹⁶ Samuil bui lawi daukan: —¡Bîlam praks, naha tihmia Dawan bui dîa ai win ba mai wiaisna! Saúl pana win: —Aisas.

¹⁷ Samuil pana aisin: —¿Man wiria pan luki kaikras sma ki, man diara apia, bahki kapram ba? Ban sakuna, Dawan bui yamni mai munan Israel kingka mai mangkan, bara nanara man lika Israel kiamka nani sut wihtka tara sma.

¹⁸ Nanara aitani, Dawan ba baku ai adarka karna wal mai blikan, Amalec saurakira nani ba kumi sin swiaia apia, sut âpu daukaia.

¹⁹ ¿Dîa muni man ra mai win ba kat daukras kapram, Dawan bîla ba lulkram, bara waihlam nani dukia ba alki briram bara Dawan nakra ra saura daukram?

²⁰ Saúl pana witin ra win: —Yang Dawan adarka bîla ba kat walri, witin daukaia karnika wal ai blikan ba kat daukri. Agag Amalec kingka ba alki priski bri balri, bara Amalec uplika nani sut sin sauhki tikri.

²¹ Sakuna war uplika nani ba sîp nani bara bîp wainhka nani kau pain ba wal takaskan, baha nani ba sin sut ikaia pat saki swin kan ba, baha wal Dawan Gâdkam ra yamni kaikan sakripaiska daukaia Guilgal ra.

²² Bara Samuil bila win: “Dawan kau kanra yamni kaiki ba sika, witin ai bîla wali daukaia ba, daiwan wîna aiska angki sakripais nani dauki yaia ba lika apia; kanra yamni, witin ai bîla wali daukaia bara witin ra aman walaia, sîp wîna batanka nani bara sakripaiska nani dauki, prisantka nani yaia ba wal.

²³ Witin mapara bûi uplika nani ba saura daukisa, sim sukia yapi kakaira nani saurka ba wal kumi sa; diara lilka daukan nani ra ai pura suni ba saurka wal sin kumi sa, baha uplika witin ra ai bîla wali daukras saurka ba. Man bui witin ai lâka bîla nani lulki swiram ba mita, nanara witin sin man king kaia ba wina mai sakisa.”

²⁴ Bara Saúl bui Samuil ra win: —Âu, yang saura daukri, Dawan adarka nani pura lui wari, man kupi kraukram bîla nani sin bîla walras kapri, upliki nani ra sibrin lukri bara witin nani bîla wali makabanka ba kat daukri.

²⁵ Sakuna yang bui man ra puri suni mamkabisna, yang saurki nani ba ban swih tiks, bara kli yawan wal wap Dawan ra mayunaia.

²⁶ Samuil pana win: —Yang lika man wal kli tawi wamna apia, kan man Dawan adarka bîla nani ba bahki kulkram, bamna nanara witin mita sin Israel king lâka wina bahki mai kulkisa.

²⁷ Samuil ai mawan tawi mahka wapan, bara Saúl bui ai prâka tara un kat prak alkan ba ra, Samuil prâka ba kalwan.

²⁸ Bara Samuil bui Saúl ra win: —Prâika kalwan na baku natka ra, Dawan sin naiwa Israel kingka lâka wina mai kalki sakisa. Man wina dakbi sakisa bara kuntrikam uplika wala kum ra man wal kau pain ba ra yabuya.

²⁹ Kan Gâd ba sika Israel prana, witin kunin aisaras, kli ai kupia lakras, witin ba upla apia sa kli ai kupia lakaia.

³⁰ Saúl kli aisin: —Yang saura daukri, sakuna kau ban makabisna Israel almukka nani mawanra bara upla nani mawanra sin, man nani ban kau king baku ai kulki bas. Yawan kli tawi wap, Dawan Gâdkam ra mayunaia.

³¹ Bamna Samuil lika Saúl wal tawi wan Guilgal ra, bara Saúl Dawan ra mayunan.

³² Baha ningkara Samuil adar yan: —Man nani Agag ba maiwanra brih bal, witinka Amalec kingka ba. Agag sibrin âpu bal, Samuil mawanra buan; witin luki kan witin pruaia pâtka saura ra kan ba wina pat luan sa.

³³ Sakuna Samuil witin ra win: —Man sordkam ni mairin ailal ra luhpias swiram sa. Bamna naiwa man mamikam sin luhpias takbia. Kau diara aisaras, Guilgal kat Dawan mawanra Agag ba klaki pîs pîs daukan.

³⁴ Baha iki si Samuil mahka Ramá ra wan, Saúl sin kli ai watla Guibeá ra wan.

³⁵ Baha yua wina Samuil kli Saúl ra wih kaikras kan, witin pruan yua ba kat. Sakuna sarka lika tara bri kan, nahki Dawan ba kli sip ai kupia lakras kan, Saúl Israel kingka mangkan ba dukiara.