1 Samuil 13 - DAWAN BÎLA AISKA

Filisteo nani mapara war aiklaban ba

¹ Saúl ba waitna kupia krawan kata, witin ba Israel ra king aimakan ba ra; bara king aimakan wihka apia kan ba ra,

² Israel luhpia nani tila wina 3,000 suldiar pliki sakan. Bara witin wal 2,000 suldiar Micmás ra bara Betel ilka nani ra takaskan, bara kau 1,000 wala nani ba lika Guibeá, Benjamín tasbaya ra Janatan wal takaskan. Baha wina upla kau wala nani ba, Saúl mita adar yan kli ai watla ra tawaia.

³ Filisteo aiklaklabra nani Guibeá ra bâra kan ba, Janatan bui âpu daukan bara filisteo nani tawan ra baha sturka walan. Bamna Saúl upla blikan wan, tawan nani sut ra trumpit puhban bara Hibru nani sut sturi ba walaia.

⁴ Israel aiska sturi ba walan, Saúl mita filisteo suldiarka daknika kum âpu daukan tâka mita, filisteo nani ba Israel luhpia nani ra misbara kaiki kan, bara war aiklaklabra nani sut Guilgal ra Saúl wal asla takan.

⁵ Filisteo nani sut asla takan, Israel luhpia nani wal aiklabaia. War aiklabaia waginka 30,000 brin, 6,000 aras âiulra nani, upla ailal auhya mâ baku. Witin nani Micmás ra aiklabaia ai kiampka bapan, baha lika Bet-avén lalma tani ra.

⁶ Israel nanara ai dara walan witin nani ra karna pali dihbuya ba, kan filisteo nani aula witin nani ra aiklabaia, bara witin nani yukuwaia kan tasba kwalhni nani ra, tasba unta nani ra, walpa unta nani ra, tasba baikan ra, liwanhta nani ra sin.

⁷ Witin nani wina manis Jordan awala ba luan, bara wan Gâd bara Galaad tasbaya ra; sakuna Saúl lika Guilgal ra takaskan, bara ai daknika war aiklaklabra nani sut lika sibrin dauki tatatwi kan.

⁸ Wik kum Saúl, Samuil bîla kaiki kaia kan bahara, witin ra win kan ba kat; sakuna Samuil Guilgal ra balras kan, bara Saúl uplika nani ba kum kum ra plapi kan.

⁹ Saúl baha kaiki, adar yabi win: —Aiska angkaia daiwra nani ba bara kli wan uplika takaia sakripaiska nani ba sut bri bal. Bara witin mita aiska angkaia sakripais nani ba daukan.

¹⁰ Saúl sakripais nani ba dauki danh takan ba ra, kaikan Samuil sin pat balan kan. Bamna witin taki wan wal prawaia bara ai lakula sin daukaia.

¹¹ Sakuna Samuil pana win: —¿Man dîa muni baku daukisma? Saúl pana win: —Yang kaikri upla nani ba ai swih mahka auya kan, bara man sin balaia ai wiram ba piua kat balras kapram bara filisteo nani ba sin kaikri mahka aipaswi kan.

¹² Yang lukri, filisteo nani Guilgal ra aula maipara ai aiklabaia, yang sin Dawan ra kau puri suni hilpka makabras kapri ba ra; baha mita taibi ai munan sakripais ba daukri.

¹³ Samuil pana win: —¡Man daukram ba lika tanis lâka kum sa! Man Dawan mai win ba bîla kat wali daukram kata kaka, kingkam lâka ba ban kaia ra bûi kaia kan.

¹⁴ Bamna kingkam lâka ba ban kabia apia. Dawan bui witin yamni kaiki ba lâka kat waitna wala pliki sâkbia, bara ai uplika nani wihtka mangkbia, kan man sika Dawan lâka bîla nani maikan ba walras kapram bamna.

¹⁵ Ba ningkara Guilgal wina Samuil mahka wan ai yabalka ra, aiklaklabra daknika nani tâka ba Saúl nina blikan aiklabaia waia, Guilgal wina taki Guibeá ra wan Benjamín tasbaya ra. Bahara Saúl ai uplika nani kulki kaikan 600 prais bri kan.

¹⁶ Saúl ai luhpia Janatan wal, aiklaklabra daknika ba kira Guibeá ra takaskan, Benjamín tasbaya ra, bara filisteo nani lika Micmás ra ai kiampka ra takaski bâra kan.

¹⁷ Filisteo aiklaklabra nani ba dakni yumhpa taki balan ai kiampka wina; dakni kum ba Ofrá tani ra wan, Sual tasbaya ra,

¹⁸ daknika wala ba Bet-horón tani ra wan, bara daknika yumhpika ba Seboím ilka bîla upla iwras tasbaya tani ra tawan.

¹⁹ Israel tasbaya aiska ra upla kumi sin âpu kan, ayan wina diara paski ba. Baha mita filisteo nani luki kan, Israel luhpia nani ba sip apia sa sord nani bara langsa nani sip paskaia.

²⁰ Israel luhpia nani sut filisteo nani ra waia kan, tasba tukbaika dukia nani, hu, asa, pik nani sin mala daukaia.

²¹ Lalah mâ sirpi kum mana hu nani, tasba tukbaika nani sin mala dauki kan; lalah mâ sirpi wâl mana asa nani mala daukan, dâka kakma nani sin.

²² Baha tâka mita Saúl uplika nani kumi sin bara Janatan uplika sin sord bara langsa nani kum pan briras kan. Witin wâl baman lika ai sordka bara ai langsika bri kan.

²³ Filisteo aiklaklabra nani bui daknika kum blikan wan, ai kanra Micmás yabalka ra waia.