1 Kronikas 5 - DAWAN BÎLA AISKA

Ruben kiamka nani ba

^1-3 Israel luhpia tawahkia, Ruben luhpia nani ba naha nani kata: Hanoc, Falú, Hesrón bara Carmí. Kasak pali Ruben ba tawahkia pali kata, ban sakuna tawahkia yamnika ba tikan witin ai aisika maya ra alki saura munan bamna, bara baha yamnika ba Josep luhpia nani ra ni yan, Israel luhpia wala kan ba. Ban sakuna, Juda ba ai muihni nani sut wal kau karnikira pali takan, bara witin wina wihta kum takan; sakuna tawahkia yamnika ba Josep dukia ni takan.

^4-6 Joel kiamka nani ba, lain wapni kat nina mangkan ba aisabia kaka, naha nani kata: Semaías, Gog, Simí, Micaías, Reaías, Baal bara Beerá, witin lika Ruben uplika nani lalka, naha nani sika, Asiria kingka Tiglat-piléser bui alki priski brih wan ba.

⁷ Beerá muihnika nani, ai kiamka nani dukiara ulbi mangkan ba, naha nani kata: Jeiel ba pas pali, Sakaraya

⁸ bara Bela, Azaz, Sema mulika ba, Joel luhpia ba. Bela ba Aroer tasbaya ra takaski kan, bara Nebo bara Baal-meón kat impaki kan.

⁹ Lalma tani bâk upla iwras tasbaya Éufrates awalka wina wih unyukwika kangbi ba kat ai putka bapan, kan ai daiwra nani ba ailal pali sahwan Galaad tasbaya pîska ba ra.

¹⁰ Saúl king aimakan piua ra, Ruben uplika nani ba war aiklabi kan, Agar uplika nani wal, sakuna witin nani Agar uplika nani pura luan, bara ningkara lalma tani ra wih iwan Galaad tasbaya ra.

Gad kiamka nani ba

¹¹ Gad kiamka nani iwi kan ba lika Ruben kiamka nani iwi kan ba mawan tani ra iwi kan ba, Basán tasbaya ra, Salcá tawanka ba kat, naha nani kata:

¹² tâ pali ba, Joel baha ningkara Safán, ningkara Jaanai, bara baha ningkara Safat.

¹³ Ai taika nani pamali lainka kat kulkan ba naha nani kata: Micael, Mesulam, Sebá, Jorai, Jacán, Zía bara Éber, sut asla ba ra matlalkahbi pura kumi kan.

¹⁴ Naha nani sika Abihail luhpia nani ba, witinka Horí luhpia kan ba, witinka na Jaróah luhpia, witinka na Galaad luhpia, witinka na Micael luhpia, witinka na Jesisai luhpia, witinka na Jahdó luhpia, witinka na Buz luhpia.

¹⁵ Baku sin Ahí, Abdiel luhpia bara Guní mulika ba, witinka ba lika ai kiamka nani lalka aimaki kan.

¹⁶ Witin nani sut lika Galaad tasbaya ra iwan, Basán ra bara tawanka sirpi nani ra, bara sîp nani aihwaki kaikaia pliska ra Sarón twiya tani ra, ai tasbaya markka ba kat.

¹⁷ Juda kingka Jotam wal bara Israel kingka Jeroboam piua ra, witin nani sut kiamka ba nina nani ulbi mangkan, pamali nani nina ulbi bri ba wauhkataya ra.

Kiamka wâl pura bakriki sturka ba

¹⁸ Ruben bara Gad wal kiamka nani ba. bara Manasés kiamka bakriki ba, witin nani ba war waitnika kupia karnira nani kan, war dukia nani manis bri kan ai kaina kahbaika, sord nani bara pantamangka, aiklabaia smatka nani sin kasak pali lan banhwi kan. Witin nani sut asla ba ra 44,760 aiklabaia sip waitnika nani bri kan.

¹⁹ Bara Agar uplika nani mapara aiklaban, baku sin Jetur, Nafís bara Nodab mapara sin;

²⁰ sakuna witin nani ra Dawan bui tâ baikan bamna, Agar uplika nani bara dakni nani kum kum Agar uplika wal asla takan kan nani ba sut ai mihta ra kauhan, kan war aiklabi kan piua ra witin nani Dawan ra makaban ai tâ baikbia dukiara, bara Dawan bui tâ baikan, witin nani Dawan ra kasak lukan ba mita.

²¹ Ningkara ai waihla nani daiwra nani ba brih wan, baha lika 50,000 kiamil nani, 250,000 sîp nani bara 2,000 biriku nani. Baha purkara, silak ra alki brih wan ba asla lika 100,000 upla nani kata.

²² Waihla nani ailal pali pruan kan, baha warkka ba Dawan wina kan ba mita. Bara bahara takaski iwi banhwan, alki brih wan piua ba kat.

²³ Bara Manasés kiamka bakriki ba Basán tasbaya ra iwi banhwi kan ba, baha lika Baal-hermón kat wi yaba, Senir bara Hermón ilka ba, kan baha nani ba ailal pali kan ba mita.

²⁴ Ai pamalika lalka nani kan ba naha nani kata: Éfer, Isí, Eliel, Azriel, Jirimaya, Hodavías bara Jahdiel, baha nani sut ba war waitnika kupia karnira nani kan, upla ailal bui kulkanka yabi kan bara ai kiamka nani lalka sin kan.

²⁵ Sakuna ai damika nani Dawanka mapara bûi banhwan, saura sin daukan, baha uplika nani gâd bahki nani bâra kan ra mayunra yaban ba, Dawan bui sauhki tikan kan ba tawan aiska mawanra.

²⁶ Baha ba tâwan Israel Dawanka ba bui Pul ra kupia tuskan, witinka lika Asiria kingka, wibia sa kaka, Tiglat-piléser ra, witin bui Ruben bara Gad uplika nani ra bara baku sin Manasés kiamka bakriki kan ba sut alki brih wan ba: bara Halah, Habor, Hará bara Gozán awalka ba kat baha nani brih wan, bamna bahara banhwisa naiwa yua ba kat.