1 Kronikas 27 - DAWAN BÎLA AISKA

Debit kingka lâka ra, war aiklaklabra bara upla war uplika apia nani asla takanka

¹ Bamna Israel luhpia nani kumi bani, ai taya nani kat, war aiklaklabra daknika tara bara daknika sirpi nani kat, aiklaklabra wihtka nani kat nina nani ba ulbi sakan kata, naha nani king warkka dauki nani kan ba, war aiklaklabra daknika baiki sakanka nani asla wark dauki kan ba ai piua kat kati bani mani aiska ra. Daknika bani ba bri kata 24,000 aiklaklabra nani.

² Pas katka ra war aiklaklabra daknika baiki sakan pas ba lalka mangkan ba lika, Jasobeam, Zabdiel luhpia ba,

³ witin sika Fares kiamka, war lalka aiska ba kamandantika, pas kati ra ai warkka nani dauki kan ba.

⁴ War aiklaklabra daknika wâlka ba lalka mangkan Dodai, ahohíta ba, naha nani ba kati wâl aimakan ra warkka nani dauki kata.

⁵ War aiklaklabra daknika, kati yumhpa alkan ra aihwakaia ba lalka mangkan Benaías, prîs Joiadá luhpia, bara ai daknika ra bri kan ba 24,000 waitna nani,

⁶ waitna 30 nani kupia karnakira nani kan ba wina kumika ba, bara ai wihtka sin. Ban sakuna, ai luhpia Amisabat ba baha daknika tâ bri kata.

⁷ War aiklaklabra daknika kati walhwalka ra kan ba ai lalka ba, Joab muihnika Asael kata, witin ba wina ai luhpia Zebadías, bara ai daknika ra bri kan 24,000 waitna nani.

⁸ War aiklaklabra daknika kati matsip ra kan ba lalka kata Samhut izraíta ba.

⁹ War aiklaklabra daknika kati matlalkahbi ra kan ba lalka kata Irá, Iqués luhpia, Tecoa tawanka wina, bara ai daknika ba tilara bri kan ba 24,000 waitna nani.

¹⁰ War aiklaklabra daknika kati matlalkahbi pura kumi ra kan ba lalka ba Heles Paltí uplika ba luhpia, Efraín kiamka, bara ai daknika ra bri kan 24,000 waitna nani.

¹¹ War aiklaklabra daknika kati matlalkahbi pura wâl ra kan ba lalka Sibecai, Husá wina, Zérah kiamka, bara ai daknika ra bri kan 24,000 waitna nani.

¹² War aiklaklabra daknika kati matlalkahbi pura yumhpika ra kan ba lalka Ebiézer, Anatot wina, Benjamín kiamka ba, bara ai daknika ba bri kan 24,000 waitna nani.

¹³ War aiklaklabra daknika kati matawalsip ra kan ba lalka Maharai, Netofá wina ba, Zérah kiamka, bara ai daknika ra bri kan 24,000 waitna nani.

¹⁴ War aiklaklabra daknika kati 11 ra kan ba ai lalka ba Benaías, Piratón wina ba, Efraín kiamka, bara witin ai daknika ra bri kan 24,000 waitna nani.

¹⁵ Aiklaklabra daknika kati 12 ra kan ba lalka Heldai, Netofá wina, Otoniel kiamka, bara ai daknika ba bri kan 24,000 waitna nani.

¹⁶ Naha nani sika Israel luhpia nani lalka kan ba: Ruben kiamka wina, Eliézer, Zicrí luhpia; Simian kiamka wina, Sefatías, Maacá luhpia;

¹⁷ Libai kiamka wina, Hasabías, Quemuel luhpia, Eran bara Sadoc wal kiamka;

¹⁸ Juda kiamka wina, Elihú, Debit muihnika kum; Isacar kiamka wina, Omrí, Micael luhpia;

¹⁹ Zabulón kiamka wina, Ismaías, Abdías luhpia; Neftalí kiamka wina, Jerimot, Azriel luhpia;

²⁰ Efraín kiamka wina, Oseas, Azazías luhpia; Manasés kiamka bakriki ba wina, Joel, Pedaías luhpia;

²¹ kiamka bakriki wala Galaad ra kan ba, Idó, Sakaraya luhpia; Benjamín kiamka wina, Jaasiel, Abner luhpia;

²² Dan kiamka wina, Azarel, Jeroham luhpia ba. Naha nani sika Israel kiamka nani lalka nani kan ba.

²³ Bamna Debit ba mani yawanaiska bri wina ai mâya tani ra nani kulkanka daukaia kan ba swin, kan Dawan bui win witin bui Israel luhpia nani ba kasbrika ra slilma ailalka ba baku daukbia.

²⁴ Joab ba mahka tâ krikan kulkanka ba, ban sakuna danh daukras swin, kan baha tâka mita Israel purara klala balan. Ba mita dîa kulkan ba, king Debit ulban wauhkataya ra ulbi mangkras kan.

²⁵ Adiel luhpia Azmávet ba king lalahka ba ai mihta ra bri kan, bara Janatan Ozías luhpia ba lika insla warkka lalahka ba ai mihta ra bri kan, tawan tara, sirpi bara piarkika nani ra, baku sin aihwawakra watla nani ba.

²⁶ Bara insla warkka dauki nani ba tâura kan Ezrí, Quelub luhpia ba.

²⁷ Wain nasla nani tâura kan ba Simí, Ramat wina ba, bara wain mâ nani wahbi auhbaia watla ra suni kaia lalka lika Zabdí, Sefam wina kata.

²⁸ Bamna oliv dusa nani bara kwah damni dusa nani twi ra pâwi nani ba Baal-hanán mihta ra kan, bara batana laya nani suni swi ba pliska lika Joás mihta ra kan.

²⁹ Bîp nani Sarón ra bri si twi dakakaia ba lika, Sarón uplika Sitrai mihta ra kan, bîp nani twi langni ra kan ba lika, Adlai luhpia Safat mihta ra kan.

³⁰ Kiamil nani ba dukiara Obil, Ismael uplika ba mihta ra kan; biriku mairin nani ba Jehedías, Meronot uplika ba mihta ra kan,

³¹ bara sîp nani ba lika Jaziz, Agar uplika ba mihta ra kata. Bamna naha nani sut na lika king Debit nasla nani bara sîp nani sut pura kakairika nani kan.

³² Debit tahtika Janatan ba lika, waitna sinskira bara âiulbra kan, bamna witin ba kupia krakraukra aimaki kan; bara Jehiel Hacmoní luhpia ba lika, king luhpia nani wal kata.

³³ Baku sin Ahitófel lika king kupia krakraukra kan, bara Husai, arquita ba lika, king pânika kan.

³⁴ Ahitófel ba ningkara bâra kata Joiadá, Benaías luhpia ba bara Abiatar sin. Bamna Joab lika king war aiklaklabrika lalka tara aimaki kan.