1 Kronikas 24 - DAWAN BÎLA AISKA

¹ Eran kiamka nani sin ai piua nani bri kata wark daukaia. Eran luhpia nani kan ba Nadab, Abihú, Eleazar bara Itamar.

² Sakuna Nadab bara Abihú ba kau ai aisa pruras kan kainara witin nani pas pruan luhpa nani sakras, bamna Eleazar bara Itamar wal prîs warkka alkan.

³ Debit ba, Sadoc tâ baikanka wal, witinka Eleazar kiamka, bara Ehimélec tâ baikanka wal sin, witin lika Itamar kiamka, witin nani wark nani ba baiki saki banhwan, ai piua kat wark takaia dukiara.

⁴ Sakuna witin nani ai tânka brin Eleazar kiamka wina kau ailal kan, Itamar kiamka ba wal, bamna ai tilara baiki saki yuan bara 16 wihta nani sakan Eleazar kiamka wina, Itamar kiamka wina lika 8 baman sakan.

⁵ Witin nani kumi bani ai mânka ai tila kat dîa warkka daukaia kan ba kat brih banhwan, kan Eleazar bara Itamar kiamka nani ba sin wark sunu dadaukra nani kan, bara witin nani Dawan warkka ba dauki banhwan.

⁶ Ningkara âiulbra Semaías ba, witin ba Natanael luhpia bara Libait kum kata, ai nina nani ba ulbi mangkan king mawan kat, lalka nani mawanra, prîs Sadoc mawanra, Ahimélec Abiatar luhpia mawanra, bara prîs nani pamalika utla lalka bani mawanra bara Libait nani mawan kat sin. Wark ba lika ya ya dîa warkka briaia kan ba kat lukka ra saki kan. Eleazar kiamka nani lika aima kumi baman wark takaia kan.

^7-18 Lat klaki lulkan ba ra naku takaskan kata tempel ra wark takaia ba, kumi wina 24 kat: Joiarib Jedaías Harim Seorim Malquías Mijamín Cos Abías Jisas Secanías Eliasib Jaquim Hupá Jesebab Bilgá Imer Hezir Pisés Petahías Hezequiel Jaquim Gamul Delaías Maazías.

¹⁹ Baku bamna, tempel ra ai piua kat wark takaia uplika nani piua ba naku ulban, witin nani ai damika Eran mita Dawan Israel Gâdka lâka ra adarka nani win ba lâka ba kat daukan.

²⁰ Libait nani kau takaskan ba naha nani kata: Subael, Amram kiamka nani wina; Jehedías, Subael kiamka nani wina;

²¹ Isías, baha lika luhpia almukka kan ba, Rehabías luhpia nani wina;

²² Selomot, Ishar kiamka nani tila wina; Jáhat, Selomot kiamka nani wina;

²³ Hebrón kiamka nani wina ba: lalka ba Jerías; ningka ba Amarías; yumhpika ba Jahaziel; bara walhwalka ba Jecamán.

²⁴ Baku sin bâra kan: Micaías, Uziel luhpia; Samir, Micaías luhpia;

²⁵ Isías, Micaías muihnika; Sakaraya, Isías luhpia;

²⁶ Mahli bara Musí, Merarí luhpia nani; Jaazías luhpia nani, baha sin Merarí luhpia.

²⁷ Merarí kiamka nani wina, Jaazías tani ra, ai luhpia ba, bâra kan Sóham, Zacur bara Ibrí;

²⁸ bara Mahli wina baikan ba bâra kan, Eleazar, witin sika luhpa waitna sakras kan ba;

²⁹ bara Quis; Jerahmeel, Quis luhpia;

³⁰ Musí luhpia nani ba, baha nani lika Mahli, Éder bara Jerimot kata. Naha nani sika Libai watla uplika nani ba.

³¹ Naha nani sin ai warkka nani ba kat brin, ai muihni Eran luhpia nani ba wal baku, Debit, Sadoc, Ahimélec bara prîs nani sut mawanra, baku sin Libait nani watla uplika nani mawanra.