1 Kronikas 21 - DAWAN BÎLA AISKA

Debit upla nani kulki nina ulban

¹ Upla dahra kwakwahkra insalka ba Israel luhpia nani mapara taibi munan bara Debit ra munan upla nina ulbi kulkaia warkka kum daukan.

² Bamna Debit lâ mangkan Joab ra bara tawan lalka nani ra: —Was man nani, Israel uplika sut nina uls Beerseba wina Dan kat, bara dîa ulma ba bri sal aik, yang nu kamna upla an bâra ba.

³ Sakuna Joab naku win: —Dawan ba ai uplika nani ba 100 taim kau ailal daukbia, nanara bâra ba wal; ¿sakuna baha nani sut sika Dawanka warkka dauki ba, uplika nani ba Dawan dîa muni kan brinka sa ki? ¿Dîa muni Israel luhpia nani ra pâtkira kulkaia sa?

⁴ Ban sakuna, king bîla aisinka ba wal Joab purara lâ kum yan, bara witin taki wan Israel tasbaya aiska ra, ningkara kli Jerusalem ra tawi balan.

⁵ Bara Joab upla nina nani mangkata ba sut Debit ra yan, bara Israel uplika baman kulkan ba 1,100,000 war aiklabaia waitnika nani bâra kan, bara Juda ra 470,000.

⁶ Sakuna Libai bara Benjamín kiamka nani sut ba lika nina mangkras kata, kan Joab ba king lâ mangkan ba yamni kaikras kata.

⁷ Baha sut takan ba Dawan brin daukras kan, baha mita Israel purara klala blikan.

⁸ Sakuna Debit bui Dawan ra ai dahra sakan: —Yang saurka tara kum daukri, sakuna yang bui man ra mamkabisna saurki swih tiks, naha man albikam na yang saura yâri.

⁹ Debit, prapit kum bri kan nina Gad, bara Dawan bui witin ra naku win:

¹⁰ “Debit ba wih kaiks, yang bîli diara tara yumhpa ai mawanra swisna, witin ani want ba bribia, bara baha ba yang daukamna.”

¹¹ Gad Debit kaikaia wan, bara naku win: —Dawan bila naku wisa: Man kaiks ani ba alkaisma:

¹² mani yumhpa plun tiwan kabia ba, kati yumhpa waihlam nani puram lui kabia ba ninam bliki, apia kaka yu yumhpa siknis saura tawankam purara balbia ba Dawan wina, bara Gâd insalka bui Israel uplika tasbaya aiska sauhkan kabia ba. Bara nanara luki kaiks yang ai blikan baha maisam pakaia.

¹³ Debit bui Gad ra naku win: —Yang trabil tara ai taibisa. Bamna nanara, kau yamni sa yang Dawan mihta ra kauhamna, ai yamnika ba tara pali bamna, sakuna waitna nani mihta ra lika apia.

¹⁴ Baku bamna, Dawan bui klala saura blikan Israel purara, bara 70,000 upla nani pruan.

¹⁵ Bara Dawan insal kum blikan, Jerusalem ba sauhki tikaia. Bara sauhki kan ba kaiki, Dawan ai kupia ra latwan brin, bara insal ra win: “¡Baha kat takasks, ba kat aitani, kau sauhkpara!” Baha pali minitka ra, Gâd insalka ba Ornán Jebús uplika ba plawar taya saki pliska ba ra kan.

¹⁶ Debit ai nakra purara bukan ba ra, kaikan Gâd insalka ba kasbrika purara tasba ra wâl lila kat bûi kan, ai sordka ba ai mihta ra buki, Jerusalem pura kat mangki bri kan. Bamna Debit almuk nani aikuki, ai prâka almuk nani dimi ai lal tasba kat makupan.

¹⁷ Bara Debit bui Dawan ra win: —¡Yang bui sika baha nani nina ulbi mangkaia adar yabri ba! ¡Yang sika saurka daukri ba! ¿Sakuna naha pâtkas nani na dîa daukan? Dawan, yang Gâdki, yang mamkabisna man klalkam ba yang ra bara waitla suliarka purara kauhbia, sakuna baha nani pâtkas pri swima.

Debit bui altar kum bukisa

¹⁸ Bamna Dawan insalka ba, Gad ra ai bîla swin Debit ra wibia Dawan altarka kum bukbia, Ornán plawar taya saki ba pliska ra.

¹⁹ Baku bamna, Debit bâra wan insal dîa win ba daukaia Dawan nina ra.

²⁰ Ornán ba plawar taya saki kan ba, insal ba kaikan kli tawi balan ba ra, luhpia walhwal ba lika plapi yukuwan.

²¹ Debit ba Ornán lamara balan ba ra Ornán Debit ra kaikan, plawar taya saki pliska ba wina, bara taki bal Debit mawanra ai lula krikan.

²² Debit bila Ornán ra: —Man plawar taya sakisma pliska ba yang ra aik, bahara Dawan altarka paskaisna, pliska ba ai atks praiska kasak pali ba kat, baku siknis saura tawan purara bâra ba lubia.

²³ Bara Ornán naku win: —Dawanki, man baha ba bris, man dîa yamni daukaia lukma ba dauks. Yang maikamna bîp wainhka sakripais daukaia, pauta ba, plawar taya, plawar baha nani sut ba prisantka kabia. ¡Naha nani sut ba King ra yabisna!

²⁴ Sakuna Debit pana win: —Tingki pali mai wisna, ban sakuna diara sut ba ai praiska kat atkamna, man dîa brisma ba mai dakbamna apia, Dawan ra sakripais dauki yaia daukaia wisi atkras dukia nani ba wal.

²⁵ Baku natka ra, Debit naha pliska dukiara Ornán ra gul mâ 600 aibapan,

²⁶ bara baha pliska ra Dawan altarka kum paskan, bara sakripais angki daukan, kli wal uplika takaia sakripaiska sin daukan. Ningkara Dawan ra mayunan, bara Dawan pana aisin, pura wina pauta klauhan blikan sakripais angkaia pliska ba kat.

²⁷ Ningkara Dawan bui ai insalka ra win, sordka ba kli watlika ra mangkbia.

Tempel pliska

²⁸ Baha piua ra, Debit kaikan Dawan ai bîla baikra walan ba, Ornán plawar taya saki ba pliska ra, bamna bahara sakripais daukan.

²⁹ Moses ba tint pliska kum daukan ba upla iwras tasbaya nani tilara Dawan ra sakripais angki pliska ba, bahara ba Gabaón holi pliska bri kan sakuna,

³⁰ Debit lika Dawan ra aisaia waras kata, kan sibrin tara ni aibanhwan takan kata, Gâd insalka isparka malira kaikan bamna.