1 Kronikas 19 - DAWAN BÎLA AISKA

Debit pura luan Siria uplika nani bara Amón uplika nani ra

¹ Yua kum ra Amón kingka Nahas ba pruan, bara witin ai pliska ra ai luhpia king aimakan.

² Baku bamna Debit lukan nahki yamni munaia Nahas luhpia Hanún ra, kan ai aisa nahki witin yamni luki kan bamna. Bara witin bui upla sinskira nani blikan maisa nihkaia, ai aisa pruan dukiara bara war lalka nani ba wan Amón tasbaya ra,

³ sakuna Amón uplika nani lalka mita Hanún ra naku win: “¿Man kasak lukisma ki, Debit ba tara kulkan brih, witin naha waitna nani blikan, baha bîla ba wiaia ai aisa ra kulki ba mita? Yang lukisna rait pali, naha nani balan ba laki kaikaia, tânka plikaia, tawan ra dîa dîa taki kaka laki kaikaia blikan.”

⁴ Bamna Hanún lâ yan Debit uplika lalka nani ba silak ra mangkbia, bara unmaya irbia, prâka nani lilak kalkbia, ningkara swika wabia.

⁵ Bamna wih ki Debit ra diara takan ba win baha nani waitna dukiara, baku sin upla wan witin nani ra yamni briaia, kan witin nani ai swira pali kata, bara ai bîla swin Jeriko ra takaskbia, ai unmaya pâwbia ba kat ra balbia.

⁶ Amón uplika nani tânka brin baha lika misbara lâka daukan Debit ra, bamna Hanún bara Amón uplika nani bui 33 ton silbar blikan war trukka nani bara aras âiulra nani atkaia dukiara Mesopotamia ra, Siria, Maacá bara Sobá ra sin.

⁷ Baha nani atki brin 32,000 war trukka nani, baku sin king Maacá ai war aiklaklabra nani aikuki aidrubi wan, Medebá mawanra bahara ai kiampka bapan. Baha purkara, Amón uplika nani ai tasbaya wina taki wan, bara mahka asla takan war aiklabaia.

⁸ Sakuna Debit tânka brin, bara Joab blikan, war aiklaklabra waitnika nani sut kira.

⁹ Amón uplika nani ridi taki war aiklabaia dimi wan, tawanka dimaika pali kat. Sakuna king nani balan kata ba twi ra takaskan.

¹⁰ Joab kaikan ai mawan wina bara ai nina wina witin ra aiklabai kan, bara witin bui Israel luhpia kau aiklaklabra painkira nani ba wahbi sakan, bara ridi daukan Siria uplika nani mapara.

¹¹ Baha ningkara, war aiklaklabra nani ba Amón uplika nani mapara aiklabaia dukiara, aiklaklabra nani tâka ba ai muihni Abisai mihta ra mangkan,

¹² bara naku win: “Siria uplika nani ba puri lubia sa kaka, man bui yang ra bal hilp ai muns; bara Amón uplika nani man puramra kau karna sa kaka, yang bui man ra hilp mai munamni.

¹³ Spiritkam purara buks, bara aiklabi banhwi kap wan kupia karnakira wal, wan tawanka bara Gâd tawanka nani sut dukiara. ¡Bamna Dawan dîa kau yamni luki ba daukbia si!”

¹⁴ Bara Joab war aiklaklabra aikuki dimi wan Siria uplika nani mapara, sakuna witin nani sut plapan.

¹⁵ Amón uplika nani kaikan Siria uplika nani sut plapi kan, bara witin nani sin plapan Abisai Joab muihnika ba mawan wina, bara tawan ra dimi banhwan. Bamna Joab Jerusalem ra kli tawi balan.

¹⁶ Siria uplika nani ai tânka brin Israel luhpia nani bui ai pura luan ba, bara sturi twatwilkra nani blikan Siria uplika nani ra munka balbia, witin nani lika Éufrates awala bailka wala ra kan ba. Witin nani tâura aimakan ba Sofac, war lalka Hadad-ézer wina.

¹⁷ Sakuna diara taki ba tânka sut Debit ra win, bamna Israel war aiklaklabra nani sut ridi dauki, Jordan awala ba luan, bara ai pliska ridi brin witin nani mapara. Nanara Debit war waitnika nani ridi daukan Siria uplika nani mapara war aiklabaia, bara witin nani sin ai mapara aiklabi banhwata,

¹⁸ sakuna tnata ra balan ba ra Israel luhpia nani sîa plapan, kan Debit bui war aiklabi ikan ba lika 40,000 war waitnika nani ai mina wapi kan nani ba bara 7,000 war trukka nani wina sin; baha purkara, Debit bui Sofac ra ikan, witinka lika war lalka tara Siria wina ba.

¹⁹ Bara Hadad-ézer pânika nani ba kaikan Israel luhpia nani bui pura luan, bamna Debit wal kupia kumi lâka daukan. Bara baha piua wina Debit lâka mununhtara kauhan, bara Siria uplika nani kli Amón uplika nani ra hilp munaia apia win.