1 Kronikas 18 - DAWAN BÎLA AISKA

Debit kingka lâka aiska bapan ba

¹ Naha diara nani ningkara, Debit bui filisteo nani ra pura luan, taibi muni Gat tawanka ba mihta wina dakban, tawan sirpi nani ba sin.

² Baku sin Moab uplika nani ra pura luan, witin nani ba Debit ra bawi kan, ai lal mana sin aibapaia kata.

³ Debit bui Hadad-ézer kingka Sobá kingka pura luan, baha ba Hamat ra sa; naha sika Éufrates awalka un ra ai karnika bapaia luki kan ba.

⁴ Witin nani wina Debit diara nani dakban ba, war waginka nani 1,000 kum, bara 7,000 suldiar aras ra uli aiklabi nani kan ba priskan, aras âpu aiklabi nani kan ba priskan, aras âpu aiklabi nani kan ba sin 20,000; bara wagin araska nani ba sut mina krikan, wagin 100 kum aubaia araska baman brin.

⁵ Baha ningkara Siria uplika nani, Damaskus wina wan Hadad-ézer kingka Sobá ra tâ baikaia; sakuna Debit bui pura luan bara upla 22,000 ba ikan.

⁶ Baha ningkara aiklaklabra dakni tara swin, Siria Damaskus ra ba aihwaki kaiki kaia, bara Siria uplika nani ba Debit albika taki banhwan, ban ai lal mana sin aibapi kan; Dawan bui Debit ra pura luaia lâka ba yabi kata, ani ani ra wabia ba sut ra.

⁷ Ningkara Debit bui Hadad-ézer, war aiklaklabra lalka nani ba, ai kaina kahbaika sâtka gul ni dauki brih banhwi kan ba sut dakbi brin, bara baha ba Jerusalem ra brih wan.

⁸ Baku sin Tibhat bara Cun tawanka nani wina, bras dukia nani ailal pali brin; naha tawanka nani na Hadad-ézer tasbaya tawanka nani kata. Baha braska nani ba wal sika, Salaman bui lî watla tara pali kum daukan kata, prias watla playka nani bara prias watla ra yus munaia dukia nani sin daukan kata.

⁹ Bamna Hamat kingka Toi ba walan, nahki Debit bui Hadad-ézer Sobá kingka war suliarka nani ra pura luan ba,

¹⁰ bamna witin ai luhpia waitna Adoram ba Debit ra blikan wan, diara nani mana luha yaia: gul, silbar, bras dukia nani, baku sin lakula yaia wisi, baha purkara yamni munaia, Debit Hadad-ézer wal war aiklaban ba dukiara; kan Toi ba sin, Hadad-ézer Sobá kingka wal war bri kata baha piua ra.

¹¹ Debit bui diara nani sut ba Dawan mihta ra mangkan gul bara silbar nisan wala nani wina dakban ba, Edom uplika nani, Moab, Amón uplika, filisteo bara Amalec uplika nani wina dakban kan ba.

¹² Baha purkara, Abisai, Seruiá luhpia ba mita Sâl twiya langnika ra Edom uplika 18,000 ra ikan.

¹³ Ningkara, Debit bui Edom ra aihwaki kaiki kaia war uplika nani swin, Edom uplika nani sut witin mununhtara kan; bara ani anira taki wabia ba, Dawan wina pura luaia lâka ba yabi kan.

War tâ uplika nani Debit bri kan ba

¹⁴ Debit ba Israel aiska purara king aimakan kasak lâka kat bara wapni pali, witin ai uplika nani lâka dauki kata.

¹⁵ War uplika nani lalka ba, Seruiá luhpia Joab kata; bara Josafat Ahitub luhpia ba, king âiulbrika kan.

¹⁶ Ahitub luhpia Sadoc bara Ahimélec wal ba lika napakan nani kata, Ahimélec ba Abiatar luhpia kan, bara witin nani ba prîs nani kata; Savsá lika sturi âiulbra kan,

¹⁷ bara Benaías, Joiadá luhpia ba, quereteo nani bara Pélet uplika nani purara karnika alki kata. Debit luhpia nani ba lika ai dukia dadaukra tara pali nani kan.