1 Kronikas 17 - DAWAN BÎLA AISKA

Dawan Debit wal lâ daukan ba

¹ Bamna Debit pat king watla ra takaski kan ba piua ra, prapit Natán ra win: —Kaiks, yang lika yalam dusa ni paskan watla ra iwisna, ban sakuna Gâd lâka auhbaia watla ba kwala ni daukan watla ra sa.

² Bara Natán bui pana win: —Bamna dîa dîa daukaia brin mai dauki ba kat dauks, kan Dawan ba man wal sa.

³ Sakuna baha tihmika Dawan ba Natán ra bal, naku win:

⁴ “Albiki Debit ra wih wis: Dawan naku wisa: ‘Man bui yang takaskaia watla kumi paski aikma apia.

⁵ Israel sakri ba yua wina naiwa kat, aima kumi sin prias watla kum ra takaskras sna, sakuna tint watla ra baman, plis kumi wina plis wala ra.

⁶ Piua sut, witin nani aikuki taukri; upliki nani lalka mangkri nani ra aima kum sin makabras katna, yalam dusa ni prias watla kum paski aikbia.’

⁷ Baku bamna albiki Debit ra wis: Yang Dawan karnika sut brisna ba bîli: ‘Yang sika klar kutbanka ba wina mai sakri, daknika ba wina sin, Israel luhpia nani wihtka aimakaia.

⁸ Yang lika man wal katna ani ani ra waram piua ra, waihla nani man mampara balan ba sut âpu daukatna, ninam ba sin purara bukri, naha tasba ra tara kulkan uplika nani ba baku.

⁹ Baha purkara, upliki Israel luhpia nani ra plis kum ridi sakri, bara baha pliska ba aihka sakri sa, witin nani bahara iwbia ai tasbaya pali baku; upla kumi bui sin pât munan kabia, kaina piua ra upla saura nani bui taibi bri kan ba baku kabia apia,

¹⁰ upliki nani tâ briaia wihta nani mangkri ba piua wina. Yang bui waihlam nani sut ba yarka bawbia. Bara mai wisna, kiamkam nani ailal maikamna,

¹¹ bara man rayakam yua tnata ba alki ba ra pruma, yang bui man kiamkam wina kumi saki bukamna, bara kingkam lâka ba lubia apia.

¹² Witin bui prias watla kumi paski aikbia, bara witin ai kingka lâka ba swirka lubia apia ban kaia ra.

¹³ Yang lika witin aisika kamna, bara witin ba yang luhpi waitna kabia. Umpira kaikisna lâka ba, witin pura wina sakamna apia, man kainamra kan uplika ra daukri ba baku,

¹⁴ sakuna ban kaia ra karna daukamna, yang waitla ra bara kingki lâka ba mapara sin, ai king iwaika ba ban kaia ra ban kabia.’ ”

¹⁵ Natán bui naha diara sut na Debit ra maisa pakan, dîa pali kaikan bara walan ba sin.

¹⁶ Bamna king Debit lika Dawan mawanra dimi wan wal aisaia, bara win: “Dawan wan Gâdka, ¿yang na yamna, watla uplika ba sin yamna kan ki, naha pliska kat ai bri balram ba?

¹⁷ ¡Bara naha na sin man mampara diara bahki baku sa, Dawan wan Gâd, bamna man nampakan watla ba wina aisaram, diara naika takaia kan ba bara man bui sin ai kaikram, yang na kau upla yamni baku!

¹⁸ ¿Dîa kau aisamna ki, baha mayunan lâka albikam waitna ra yaram ba dukiara, kan man naha albikam waitna na kakaira pali sma ba?

¹⁹ Dawan, naha diara aihka nani na daukram albikam mawan kat, baha ba man brinkam kan bara brinkam ba yarka tânka bribia.

²⁰ Dawan, man baku wala âpu sa, gâd wala man baku âpu sa, diara nani yang nani walri bara tânka brisna ba.

²¹ Israel man uplikam ba dukiara lika, ¡witin baku wala âpu sa, nisan sin wala âpu sa naha tasba ra! ¡Ay, Gâd, man bui sika pri sakram uplikam kabia dukiara, bara ninam ba tara bukram, wark tara aihkakira nani daukram ba mita! Idsip wina pri sakram, ban sin nisan wala nani ba wina sin.

²² Kan Israel ba bâk saki briram, man uplikam kaia ban kaia ra, bara Dawan, man sika ban kaia ra witin nani Gâdka kama.

²³ “Baku bamna nanara, Dawan, man bîlam aisaram ba albikam dukiara bara ai watla dukiara, baha yarka baku aimakbia.

²⁴ ¡Yarka man dîa aisaram ba kasak aimakbia, bara ninam ba sin ban kaia ra tara kulkan kabia. Bara aisabia Dawan karnakira ba Israel Gâdka sa, witin ba kasak pali Israel Gâdka pali kabia! ¡Nampakan Debit taika karnika ba man mamwanra ban bâra kabia kainam kahbanka ba wal!

²⁵ Man, Gâdki, man ai wiram kiamki kum paskaia, kan yang lika man albikam sna ba mita, man ra makabanka kum mamkabisna.

²⁶ Dawan, man ba Gâd sma, bara man albikam ra uya latwan kaiki diara nani aisaram sa;

²⁷ bara nanara man wilin takram nampakan kabia ban kaia ra. Dawan, man bui yamni munram ba ban kaia ra kabia.”