1 Kronikas 14 - DAWAN BÎLA AISKA

Hiram bui Debit ra ai tasbaya tâwan aisasara nani blikan

¹ Tiro kingka Hiram, ai tasbaya tâwan aisasara nani ba Debit ra blikan. Baha purkara walpa ni utla papaskra nani ba bara tat ni paski nani blikan, yalam sin king watla ba paskaia dukiara.

² Bara baku Debit baha tânka brin, nahki witin ba Israel kingka kaia sakan ba, kan ai kingka lâka ba uya pali pâwan kan, ai uplika nani sin.

Debit luhpia wala nani ba

³ Debit Jerusalem ra mairin kau ailal brin, bamna luhpa waitna nani bara luhpa mairin nani sin ailal sakan.

⁴ Debit luhpia nani Jerusalem ra aisuban nani nina ba naha kan: Samúa, Sobab, Natán, Salaman,

⁵ Ibhar, Elisuá, Elpélet,

⁶ Nógah, Néfeg, Jafía,

⁷ Elisamá, Eliadá bara Elifélet.

Debit bui filisteo nani pura luan ba

⁸ Filisteo nani walan Debit ba batana yukan sa Israel aiska kingka kaia; bamna filisteo nani sut uli wan, Debit ba pliki. Bara Debit baha walan ba ra, witin taki wan mapara.

⁹ Bara filisteo nani aidrubi balan, bara Refaim langnika kir ba yakabi lakan.

¹⁰ Baha dukiara Debit bui Dawan ra makabi walan: —¿Filisteo nani mapara wamna ki? ¿Witin nani pura luaia karnika aikma ki? Bara Dawan bui win: —Mapara uli was, pura luaia lâka ba maikamna.

¹¹ Debit Baal-perasim ra uli wan, bara bahara filisteo nani ra pura luan, baha mita witin naku win: “Lî aubra kumi baku, Dawanki bui yabal kum waihli nani tilak sakan yang bahak luaia.” Bamna baha pliska ba nina mâkan Baal-perasim.

¹² Baha purkara, filisteo nani ai gâdka nani ba ban lulki swin, bara Debit bal baha sut ba angkan.

¹³ Sakuna filisteo nani ba kli tawi aidrubi balan, bara Refaim twiya aiska ba wapi kaiki kan,

¹⁴ baku bamna Debit kli Gâd wal aisin, bara Dawan bui win: —Man mawan tani wina aiklapara, sakuna kutbi brih nina tani wina aiklas, ban batana nani dusa mununhtara wama ba ra.

¹⁵ Batana nani dusa slaunhka purara, bîla binka walma kat taki was aiklabaia, baha tânka ba sika man nani tâmra auna sa, filisteo nani ba iki tikaia.

¹⁶ Gâd bui dîa win ba kat Debit daukan, bara filisteo nani aiklaklabrika nani ra pura luan, Gabaón ba wina Guézer ba kat.

¹⁷ Bamna ai sturka ba tasba bani ra plapi tawan, Dawan bui sin yan nisan wala nani sut bui sîa bri kan.