1 Kronikas 13 - DAWAN BÎLA AISKA

Debit bui Gâd lâka auhbaia watla ba, Jerusalem ra brih waia lukanka brisa

¹ Debit war wihtka nani bara tâ brabrira nani sut aikuki aisi kaikan, wibia kaka war lalka tara nani sut aikuki.

² Baha ningkara, Israel luhpia nani sut ra win: “Man nani bui aitani lukma kaka, bara Dawan wan Gâdka ba yamni lukbia kaka, wan muihni nani Israel tasbaya pîska ailal ra iwi banhwi ba ra bliki maisam pakamna, prîs nani bara Libait nani sut, ya uplika wala witin nani aikuki ai tawanka nani ra iwi ba, paiwi wibia yawan aikuki asla takbia,

³ bara baku mika yawan aikuki Gâd lâka auhbaia watla ba brih balbia, baha ba Saúl piua wina wan âuya tiwan sa.’’

⁴ Upla sut aitani lukan baku daukbia ba, kan dîa win ba upla sut yamni lukan.

Debit ba trai munisa, Gâd lâka auhbaia watla ba brih balaia

⁵ Gâd lâka auhbaia watla ba Quiriat-jearim wina brih balaia dukiara, Debit Israel luhpia nani sut asla daukan, Sihor wina Idsip tasbaya pîska un tani ba wina sin.

⁶ Ningkara Israel luhpia nani sut witin wal aikuki Quiriat-jearim ra uli wan, nina wala sin bri kan baha lika Baalá, baha ba Juda ra sa, baha ba wina Gâd lâka auhbaia watla ba saki brih waia kan. Baha ninara sika Dawan ra wini kan ba, ai king iwaika ba kirubin nani purara bri ba.

⁷ Bamna Abinadab watla wina saki brih wan bara Gâd lâka auhbaia watla ba, mina wilwaika bri ba dukia kumi ra mangki, Uzá bara Ahió wal tâ bri auya kan.

⁸ Debit bara Israel luhpia nani sut aikuki, Dawan kainara wapi ai tâ baiki srutwi puli auya kan, lilia binka sât sât dauki auya kan, arp nani, gitar, gitar tara nani, drum sirpi pruki, pân pruki ban, trumpit sin puhbi banhwi kan.

⁹ Witin nani kakaira pliska kum ra balan, Irá mâki ba, baha ba Quidón tasbaya ra sa, bahara Uzá ai mihta sakbi baks ba tâ baikaia wisi alkata, kan bîp nani ba bui taibi kan ba mita.

¹⁰ Sakuna Dawan Uzá mapara ai kupia sauhkan, ai mihta sakbi baks ba alkaia trai munan bamna, bara pliska ba kat ikan upla sut mawanra.

¹¹ Baha ba Debit bui yamni kaikras kan, Dawan bui Uzá rayaka sakan ba. Ba mita baha pliska nina ba Peres-uzá mâkan, baha nina ba naiwa kat ban brisa.

¹² Sakuna baha yua Debit uya pali Dawan ra sibrin brin, bara winan: “¡Dawan lâ auhbaia watla na brih wan sin ai daukras sa!”

¹³ Bara Debit Tawanka ra lâ auhbaia watla ba brih waras kan, sakuna win Gat wina waitnika kumi nina Obed-edom watla ra brih wabia.

¹⁴ Bamna kati yumhpa Dawan bakska ba Obed-edom watla ra swin kan, bara Dawan bui Obed-edom watla uplika nani sut ra yamni munan, ai dukia nani sut ra sin.