1 Kronikas 10 - DAWAN BÎLA AISKA

Saúl ai luhpia nani aikuki war ra pruan ba

¹ Filisteo nani ba aiklaban Israel mapara, bara Israel luhpia nani plapi banhwan, sakuna ailal pali Guilboa ilka ra prui banhwan.

² Bara filisteo nani mita Saúl bara luhpia nani ra nina blikan, bara Janatan, Abinadab bara Malquisúa ra alkan bara ikan.

³ Ningkara sut pali asla taki Saúl mapara aiklaban, bara trisba lalulkra nani ba Saúl lama mapara wan bara Saúl ra trisba ni sabi latwan saura yaban.

⁴ Baku bamna, war aiklabia dukia nani wal witin ra tâ baiki kan ba ra witin win: “Sordkam ba saki ai sabi ai iks, baku mika baha idan nani ba bal, yang wal ai lilia bribiara.” Sakuna witin ra tâ baiki kan waitnika ba baku daukaia brin daukras, sibrin dauki kan. Bara Saúl ai sordka ba tasba ra bapi, baha purara kauhan.

⁵ Ai tâ baiki kan waitnika kaikan Saúl ba pruan kan, bara witin sin ai isparka tatwa ba saki baha purara kauhi witin sin pruan.

⁶ Baku baha yua ra Saúl, ai luhpia nani yumhpa bara ai watla uplika aiska aikuki prui tiwan.

⁷ Bamna Israel luhpia nani il bîla ra iwi banhwi kan ba kaikan plapi banhwan ba, baku sin Saúl ai luhpia nani aikuki pruan ba, bara tawan nani ba sut swi si witin nani sin plapi banhwan, bara filisteo nani baha tawanka ra wih witin nani bahara takaskan.

⁸ Yauhkika wala ra, filisteo nani upla pruan nani dukia wahbi briaia wan ba ra, kaikan Saúl bara ai luhpia nani aikuki sin pruan kan, Guilboa ilka ra.

⁹ Bara ai kwalka nani ba saki brih wan, ai lal bara ai aiklabaia dukia nani ba sin, bara filisteo tasbaya aiska ra maisa pakan, baku yaka upla sut ba tânka bribia, ai dawanka nani ba sin.

¹⁰ Ningkara Saúl war aiklabaia dukia nani bri kan ba bara ai lalkamhka ba sin ai gâdka nani tempelka ra bri si paman, baha ba Dagón tempelka ra.

¹¹ Jabés uplika nani Galaad ra iwi nani ba walan, filisteo nani dîa Saúl ra munan ba,

¹² bamna waitna kupia karnira nani sut ba buan, Saúl wîna tara bara luhpia nani wîna tara ba Jabés ra brih wan, bara bahara usupum dusa kumi munhtara bikan Jabés ra. Bara yu matlalkahbi pura kumi witin nani plun piras kan.

¹³ Bamna baku Saúl ai saurka ba mita pruan, kan witin saura daukan bara Dawan lâ yan ba kulkras, sukia kumi ra ni wih wal aisin,

¹⁴ Dawan wal aisaia kan ba watlika ra. Baha mita Dawan bui rayaka ba mahka sakan, bara king lâka ba Jesé luhpia Debit ra yan.