1 Korint 10 - DAWAN BÎLA AISKA

Aidul mapara lâ mariki smalkan ba

¹ Muihki nani, yang want sna man nani kaiki kama, wan damika nani Moses nina bliki nani ra dîa takan ba. Witin nani ba baha kasbrikika munhtara banhwi kan, bara sut Kabu Pauni bâk dimi, lui banhwan.

² Kasbrika bara kabu ra sin, baha nani sut tahbi daukan kata, Moses nina blablikra nani baku.

³ Baku sin sut spirit pata ba pin,

⁴ bara sut spiritka laya ba dih banhwan. Kan baha nani ba wan spiritka walpaya, witin nani wal impaki kan ba wina laya dingkan. Bara baha walpaya ba lika Kraist kan.

⁵ Ban sakuna, witin nani aihkika ba, Gâd bui yamni kaikras kata; baha mita witin nani sut upla iwras tasbaya ra prui tiwan.

⁶ Naha diara nani na takan yawan ra tânka kum wan marikaia dukiara, bara baku mika yawan na diara saura nani want takbia apia, witin nani daukan ba baku.

⁷ Baha mita, man nani aidul nani ra puram suni mayunpara, witin nani wina tila nani daukan ba baku, Ulbanka ra wi ba baku: “Upla nani ba plun piaia bara diara diaia iwan, bara baha ningkara dans pulan.”

⁸ Yawan rug lâka daukaia apia sa, witin nani tila wina daukan ba baku, bara yu kum bilara baman 23,000 prui tiwan ba.

⁹ Yawan sin Kraist ra traika kaikaia apia sa, wan damika tila nani daukan ba baku, baha nani ra piuta mita sami iki âpu daukan.

¹⁰ Gâd mapara sin brukpara, wan damika tila nani brukwan ba baku, bara Prura Insalka ba mita baha nani iki tikan ba.

¹¹ Naha diara nani sut wan damika nani ra takan, bara Ulbanka nani ra mangkan kata, naha tasba yua nani lui waia lamara yawan raya iwi nani ra, baha tânka wan mariki wan kupia kraukaia dukiara.

¹² Baku bamna, ani uplika witin ba pain bapi buisa luki kaka, aman kaikbia kauhaia apia dukiara.

¹³ Man nani traika kaikanka nani brisma ba lika, upla wala nani bri ba wal sim baku sa. Kan Gâd lika kasak sa, bara man nani wahwaia sip sma ba purkara kau traika kaikanka nani maikbia apia. Sakuna, traika kaikanka bri banhma ba ra, Gâd mita baha ba wina swak takaia karnika sin maikbia, bara baku sip kama baha ba twilkaia.

¹⁴ Baku bamna, muihki laitwankira nani, aidul nani ra puram suni mayunaia ba wina man nani plaps.

¹⁵ Upla diara tânka bri nani ra baku mai aisisni, bara man nani pali sip sma yang dîa aisisna ba tânka luki kaikaia.

¹⁶ Yamni munan kapka wina yawan di ba ra Gâd ra tingki wisa, yawan Kraist aikuki kumi takisa witin ai tâlia ra; yawan brit kriki ba pi ba ra, yawan Kraist aikuki kumi takisa ai wîna ra.

¹⁷ Yawan na ailal sa sakuna, sut sim britka kumi ba wina pîsa; bara ba mita yawan na lika wîna tara kumi baman sa.

¹⁸ Israel uplika ba kaiki bas: sakripais daukan dukia nani pi uplika nani ba, baha sakripaiska ba aikuki asla brisa.

¹⁹ Yang wiras aidul ba tânka pain brisa, apia kaka aidul ra sakripais dauki yan wîna ba wîna wala nani wal baha ba kau pain sa.

²⁰ Yang aisisna ba lika naku sa: idan nani diara kum sakripais dauki yabuya ba ra, baha ba pirit saura nani ra yabisa, Gâd ra lika apia; bara yang want apia sna man nani pirit saura nani wal asla diara bri kama.

²¹ Man nani sip apia sma Dawan kapka wina diaia, bara pirit saura nani kapka wina sin diaia; bara Dawan tibilka wina piaia bara pirit saura nani tibilka wina piaia sin sip apia sma.

²² ¿Apia kaka, yawan mita Dawan ba kupia tuskaia want sa ki? ¿Yawan na witin purkara kau karna banhwisa ki?

Pri lâka bara kristian latwanka lâka ba

²³ Upla nani wisa: “Upla ba dîa daukaia want kaka, witin ai laikka.” Baha kasak sa, sakuna diara sut ba pain baman lika apia sa. Upla ba dîa daukaia want kaka, witin ai laikka, sakuna diara sut spirit pakaia dukia sa.

²⁴ Upla bani ai hilpka plikaia apia sa, sakuna upla wala nani hilpka lika.

²⁵ Dîa dîa wîna atkaia watla wina atkisma ba pi banhs, bara lukankam klir kaia dukiara diara makabi walpara,

²⁶ kan Ulbanka ra wi ba baku: “Tasba bara dîa dîa baha ra ba sut sin, Dawan dukia atia sa.”

²⁷ Kasak lukras uplika kum mita man nani ba ai watla ra plun piaia mai paiwbia kaka, bara man nani wan mai dauki banhwisa kaka, dîa dîa piaia mamwanra kahbia ba pis, bara lukankam klir kaia dukiara man nani diara makabi walpara.

²⁸ Sakuna upla kum man nani ra mai wibia kaka: “Naha wîna na aidul nani ra sakripais dauki yan sa”; baku kaka, pipara, mai win uplika ba ra saura munaia apia dukiara, bara lukanka klir bri kaia ba dukiara sin.

²⁹ Yang aisisna na lika man lukankam dukiara lika apia, sakuna uplika ba lukanka dukiara. Sakuna upla kum makabi walaia sip sa: “¿Dîa kan yang pri lâika ba, upla wala kupia dahra walras, lâka aisi daukaia sa ki?

³⁰ Yang pati ba dukiara Gâd ra tingki wisna kaka, ¿dîa muni baha pisna ba tâwan, yang maipara saura aisi banhbia ki?”

³¹ Baku bamna, pi banhwisma sapa, di banhwisma sapa, dîa dîa daukisma sapa, sut ba Gâd prana dukiara dauki bas.

³² Upla kumi ra sin trabil munpara: Ju nani sapa, Ju apia nani sapa, Gâd sertska uplika nani sapa sin.

³³ Yang daukisna ba baku dauki bas: yang lika dîa dîa daukisna ba ra upla nani dîa lihki ba kat daukaia trai kaikisna; yang painki plikras, sakuna upla wala nani painka lika, witin nani swaki sakan kabia dukiara.