Wihta Nani 9 - DAWAN BÎLA AISKA

Abimélec bui ai muihni nani 70 ikan

¹ Abimélec, Jerubaal luhpia waitna ba, Siquem tawanka ra witin taki wan, ai yaptika taika inmanka nani wal aisaia. Bara witin nani ra win:

² —Wan taya nani nina ra, yang bui man nani ra mamkabisni, man nani Siquem uplika nani ra aisi kupia laks, Jerubaal luhpia waitna nani 70 witin nani ai purara wihtka aimaki kaia ba watlika ra, wis kanra yamni sa waitna kumi baman wihta aimaki kaia.

³ Abimélec sin witin nani ai taya kan bamna, witin nani ra baku win ba ra, witin nani bui sin kau pura praki aisin Siquem uplika nani ba kupia alkaia dukiara, bara witin nani sin sut baku aitani lukan, wihta kumi baman mangki briaia.

⁴ Baha purkara, witin nani Baal-berit tempelka wina silbar mâ 70 saki Abimélec ra yaban. Abimélec baha lalahka brin, bara waitna upla âikra saura nani ba mana aibapi brin witin ai nina blikaia.

⁵ Baha waitnika nani ba witin wal Ofrá ra wan, ai aisika Jerubaal bahara iwan kan, bahara walpa tara kum bâra kan, baha walpaya purara baman Abimélec muihnika nani 70 waitna kan ba sut pali ikan. Sakuna Jerubaal luhpia waitna sirpika kumi nina Jotam, baha baman yukuwi swak takan.

⁶ Bara 70 nani ba ikan ningkara, Siquem uplika nani Bet-miló uplika nani sin sut Siquem ra usupum dusa munhtara, witin nani walpa tara kum bri kan bahara aidrubi kan sturi aisaia, baha pliska ra witin nani aidrubi wan. Bara bahara witin nani lâ dauki, Abimélec ba ai kingka mangkan.

⁷ Jotam baha sturka ba walan ba ra, witin Guerizim ilka purara plapi ulan, bara il pura ba wina ai bîla baikra karna wini aisin, tawan uplika nani ba sut walaia dukiara: “¡Siquem uplika nani, man nani bui yang ra pain ai wals! ¡Bara Dawan sin man nani ra baku mai walbia!

⁸ “Piua kum bâra kan, dus nani ba brin daukan ai kingka kum mangki briaia, bara witin nani oliv dusa ra makabi walan witin nani ai kingka aimakaia.

⁹ Sakuna oliv dusa ba pana witin nani ra apia win: ‘Yang dus nani kingka aimakamna sa kaka, kli batana laya sakamna apia, batana laya ba wal sika, yang bui upla nani ra bara Dawan ra sin pain kulkan lâka yabisna.’

¹⁰ “Bara dus nani ba, kwah damni dusa ra wih makaban ai kingka aimakaia.

¹¹ Sakuna kwah damni dusa ba sin witin nani ra apia win: ‘Yang lika dus nani kingka aimakaia sna kaka, kwah damni mâ nani ba ban saki kaia sip apia kamna.’

¹² “Bara dus nani ba kli wain kiwka ra wih makabi walan, witin nani ai kingka aimakbia sapa.

¹³ Sakuna wain kiwka bila sin witin nani ra apia win: ‘Yang dus nani kingka aimakaia sna kaka, wain laya sakisna ba ban saki kamna apia; wain laya ba ni sika yang bui upla nani ba lilia daukisna, bara Dawan ra sin.’

¹⁴ “Bara lâs ra, dus nani ba kiaya dusa ra wih makaban, witin nani ai kingka aimakaia.

¹⁵ Bara kiaya dusa ba witin nani ra win: ‘Âu, man nani kasak pali aihwa yang na man nani kingkam ai mangkaia brin mai daukisa kaka, man nani sut yang distiki ra bal dimaia sma; sakuna yang na man nani kingkam aimakaia brin mai daukras kabia kaka lika, yang wina pauta klauhan buki klauhbia bara Líbano ra yalam dusa nani ba sut angki sauhkan kabia.’

¹⁶ “Bamna nanara, yang bui man nani ra mamkabi walisna: ¿Lâ tânka kat man nani daukram ki, Abimélec ra king mangkaia taukisma ba? ¿Jerubaal ai kupia yamnika lâka ni man nani ra yamni mai munan ba, baha yamnika ni man nani sin pana witin ai luhpia nani ra yamni munisma ki?

¹⁷ Aisiki ai rayaka ba man nani tâmwan prura bîla ra mangki, Madián uplika nani wal war aiklabi pri mai sakan.

¹⁸ Sakuna man nani klauna, aisiki watla bîla uplika nani mapara buram, ai luhpia waitna nani 70 ba walpa kumi purara ikram. Man nani tamya mairin Jerubaal lilika mairin luhpia waitna, Abimélec man tamya bastar kum ba, king mangkaia baman baku daukram.

¹⁹ Sakuna yang bui naiwa man nani ra wisni: Man nani Jerubaal watla bîla uplika nani ra kasakka lâka ra kunin luha yamni munram sa kaka, Abimélec wal diara sut ba yamni takbia bara man nani wal sin diara sut yamni baman takbia;

²⁰ sakuna baku daukras sma kaka, Abimélec wina pauta klauhan kum bal takbia, bara Siquem bara Bet-miló uplika nani ba sut angkbia. Bamna Siquem bara Bet-miló wina sin pauta klauhan kum bal taki, witin ra angki tikbia.”

²¹ Jotam baha aisin ba ningkara, ai muihni Abimélec sîa Siquem wina plapi, Beer tawanka ra wih iwan.

²² Abimélec mani yumhpa Israel luhpia nani purara wihtka aimaki kan;

²³ bara Dawan mita daukan Abimélec bara Siquem uplika nani ba wal, pana pana saura munaia spiritka ai tilara dingkan, witin nani Abimélec mapara buaia,

²⁴ bara baku munka Jerubaal luhpia waitna nani 70 Abimélec mita tâlia laiki ikan ba mana, witin aibapbia, bara Siquem uplika nani sin Abimélec ra hilp munan ba witin nani sin ai tâlia ni baha nani mana aibapbia.

²⁵ Siquem uplika nani ba unta ra yukuwi bara baha wina upla nani baha yabalka lama bâk lui auya taim, mapara taki, aiklabi diara nani bri ba impliki kan. Bara Abimélec baha sturka ba walan.

²⁶ Yu kum Gáal, Ébed luhpia ba, ai muihni nani aikuki Siquem ra lui wan bara Siquem uplika nani ba witin nani wal kupia kumi ai pânika takan,

²⁷ bara witin nani aikuki insla ra wan, wain mâ dakbi taibi wain laya dauki, bara baha dih ki lilia tara daukan, ai gâdka nani tempelka ra plun pin bara wain din, bara Abimélec ra lawaska kiki lahtubi aisi kan.

²⁸ Bara Gáal aisi kan: “¿Abimélec lukisa witin baman waitna sa? Witin ba Jerubaal luhpia waitna kum baman sa, bara Zebul lika ai hilpika brisa. Yawan sut na Siquem wina atia, ¿bara yawan nani sut na dîa daukisa, dîa muni witin ai mawanra alba baku tauki kaia? Yawan lika Hamor albika nani, witin sika Siquem tawanka sakan waitnika ba, sakuna Abimélec albika lika yawan takaia apia.

²⁹ ¡Ay! ¡Yang na man nani wihtkam sna kaka, Abimélec ba pat daskri kaia kan!” Baha purkara witin aisin: “¡Kaisa Abimélec, suldiarkam nani ba asla bri bal yawan wal aiklabaia!”

³⁰ Zebul, tawan wihtka tara ba, Gáal aisi tauki kan sturka ba sut walan, bara witin kasak ai kupia sauhki,

³¹ Abimélec, Arumá tawanka ra kan ba ra witin ra ai bîla bliki naku win: “Gáal, Ébed luhpia waitna ba, ai muihni nani aikuki Siquem ra balan, bara witin nani tawan uplika nani ra kupia tuski, man mampara aiklabaia ridi daukisa.

³² Bahamna, man lika tihmia ra suldiarkam nani aikuki utla wina taki, unta ra wih yukuwi bas.

³³ Bara titan ra, yu uluya ba ra, tawan ba ra dimi aiklas, Gáal ai uplika nani aikuki man mampara aiklabaia dimi balbia ba ra, man bui witin nani wal nahki daukaia lukisma ba kat dauks.”

³⁴ Baku bamna, Abimélec ai uplika nani sut aikuki, tihmia ra tawan ba wina taki, Siquem tawanka kir bâra aihwaki kan, ai uplika nani ba daknika walhwal saki bri kan.

³⁵ Gáal tawan getka ra taki wan ba ra, Abimélec ai uplika nani ba aikuki yukuwi kan ba wina, witin mapara taki balan.

³⁶ Gáal baha nani aula kan ba kaikan ba ra, Zebul ra win: —¡Kaiks, il nani pura wina aiklaklabra daknika kum taki aula ba! Zebul pana witin ra win: —Apia. Baha aihka il purara dus nani ba distika namkra ra upla aula baku kaikisma.

³⁷ Sakuna Gáal baha walras ban aisi kan: —¡Apia, kiuhsi kum nina wan ‘Klûa tasbaya’ wi ba baha wina sin aiklaklabra daknika kum taki iwi aula sa! ¡Bara dakni wala kum sin, Diara Kakaira nani Usupumka ra waia yabalka bâk taki aula sa!

³⁸ ¡Nanara aisas, bîla pâskira! —Zebul witin ra win—. ¡Man aisi kapram, Abimélec ba ya bamna, yawan na witin ai albika takaia! Aiklaklabra daknika tara bara man bahki kulki katma. ¡Nanara bal taks witin nani wal aiklabaia!

³⁹ Gáal, Siquem uplika nani tâura aimaki, Abimélec mapara aiklabaia taki wan.

⁴⁰ Sakuna Gáal plapan bara Abimélec witin ai nina blikan. Witin plapi tawan getka ba kat wan, sakuna upla ailal pat ikan kan.

⁴¹ Bara Abimélec Arumá ra takaskan, sakuna Zebul mita Gáal bara muihnika nani aikuki Siquem wina munan taki wan.

⁴² Bara yu wala ra, Siquem uplika nani ba lâ daukan tawan ba wina taki, unta ra waia. Abimélec baha sturka ba walan,

⁴³ bara witin ai suldiarka nani ba dakni yumhpa ra saki bara witin nani unta ra wih yukuwi kan. Bara Siquem uplika nani ba tawan wina taki aula kan, bara witin nani yukuwi kan ba wina taki bal, uplika nani aula kan ba mapara aiklaban.

⁴⁴ Abimélec witin ai daknika ba aikuki, tawan getka ba alki briaia wan, bara dakni wala wâl ba upla nani plapi tauki kan ba nina bliki aiklabi iki watauki kan unta biara ra.

⁴⁵ Baha yua aiska ba, Abimélec Siquem uplika nani wal aiklabi kan, tawan aiska ba witin bui dakbi brin ba kat. Bamna tawan ba sauhkan bara baku sin upla nani ba sut ikan, baha ningkara tawan aiska ba sâl yakaban.

⁴⁶ Migdal-siquem uplika nani, sturi ba walan Abimélec upla nani ikan ba, bara witin nani El-berit tempelka kan kahbaika pliska bri ba ra yukuwaia plapi wan.

⁴⁷ Abimélec baha sturka ba walan ba ra, upla nani ba sut El-berit ra wih asla takan ba;

⁴⁸ witin ai uplika nani sut aikuki Salmón ilka ra wan, baha Abimélec asla kum brih bara dus tnawa klaki brih, baha ba ai pahpaya ra suni brih, bara ai uplika nani kumi bani ra win: “Man nani sin isti pali yang dîa daukri na baku dauks.”

⁴⁹ Bara witin nani sut ai dusa tnawa nani klaki brih Abimélec nina blikan tempel kan kahbaika pliska bri kan ba kat, bara bahara dus tnawa nani sut ba purara paski, pauta klauhan kahbi angkan, bara baku dauki Migdal-siquem uplika nani sut ikan, waitna bara mairin nani 1,000 bâra kan ba sut ikan.

⁵⁰ Abimélec baha wina taki, kli aiklabaia ridi taki Tebés ra wan, bara aiklabi dimi tawan ba alki brin.

⁵¹ Baha tawanka ba lilapas ra, aihwawakra nani aihwaki watla karna bara purara mâkan ba kum bâra kan. Baha watla ra tawan uplika nani sut ba wih yukuwan kan, waitna bara mairin nani. Durka ba witin pain praki si, bara utla bahna purara uli wan.

⁵² Abimélec baha watla ra dimaia durka ba kat wih ki, mahka aiklabaia kan ba ra, tâura witin pauta paski bara angkan,

⁵³ bara mairin kum mita utla pura ba wina akbaia walpaya kum brih, baha ni lulki Abimélec lal pura kat bataki, lal ba atakban takan.

⁵⁴ Abimélec isti pali war kiaptinka ai lamara kan ba ra winan balan, bara win: “Pruisna bara sordkam ba saki man ai iks, kan yang want apia sna, ningkara upla nani aisabia Abimélec kata ba mairin mita ikan.” Bara kiaptinka ba ai sordka ba saki witin ra saban, bara witin baku pruan.

⁵⁵ Israel luhpia nani kaikan Abimélec ba pruan, bamna witin nani ai watla nani ra kli mahka tawi wan.

⁵⁶ Dawan mita baku dauki natka ra, Abimélec ai aisika watla uplika nani mapara bûi ai muihni nani 70 ikan yaba, tâlia mana ba munan aibapan.

⁵⁷ Dawan sin baku dauki, Siquem uplika nani sin tala laikan mana ba yaka aibapaia kan. Bara baku sin Jerubaal luhpia Jotam, lahtuban bîla witin nani mapara aisin ba sin yaban baha yua aimakan.