Wihta Nani 8 - DAWAN BÎLA AISKA

Gedeón bui Madián kingka nani ba alkan

¹ Efraín kiamka uplika nani ba ai kupia sauhki Gedeón wal blahwi kan, witin Madián uplika nani aikuki aiklabaia taki wan sakuna witin nani ai tilara brih waras wisi.

² Sakuna Gedeón pana witin nani ra win: —¿Damra walras sma ki, man nani kau diara tara daukram ba yang nani purkira? Yang nani aiklabri sakuna, man nani daukram ba baku diara tara daukras.

³ Dawan mita Madián uplika nani wihtka tara wâl ba Oreb bara Zeeb wal, man nani mihtam ra mangkan. ¿Bara yang dîa daukri sa ki, man nani baha daukram ba wal prakaia? Efraín uplika nani ba Gedeón aisin ba walan ba ra, witin nani kupia pain takan witin ai mapa ra.

⁴ Baha wina Gedeón buan, bara ai uplika nani 300 ba aikuki Jordan awala ba lui wan, ai waihla nina bliki ban plun dauki swapan kan sakuna.

⁵ Sucot ra Gedeón bui bahara iwi uplika nani ra makabi walan: —Man nani, pliskam pali, waitna nani yang wal aula ba plun wirâ dakaks, kan witin nani plun piras bara swapan pali sa. Yang nani lika ban Madián kingka nani Zébah bara Salmuná wal alkaia nina blikisna.

⁶ Sakuna Sucot tawanka wihtka nani ba, pana witin ra win: —¿Man nani Zébah wal Salmuná wal ba lukram sa ki yang nani suldiarkam nani ra plun dakakamna?

⁷ Bara Gedeón kli pana witin nani ra win: —Dawan, Zébah bara Salmuná wal mihti ra mangkbia ningkara, kli tawi balamna ba ra, upla iwras tasbaya wina yang kiaya nani bri sal, baha ni mai wipi tamya sauhkamna.

⁸ Baha wina witin kli Penuel ra wan, baha nani ra sin hilp makaban, Sucot nani ra makaban baku. Sakuna Penuel uplika nani sin, Sucot uplika nani dîa aisin ba baku pana witin ra win.

⁹ Bara Gedeón witin nani ra sin win: —¡Yang war aiklabi pura lui kli tawi balamna ba ra, Penuel tawerka ba mâyara batakamna!

¹⁰ Zébah bara Salmuná wal, lalma tasbaya wina aiklaklabra nani kau 15,000 raya kan ba aikuki, Carcor ra takaski kan aiklaklabra 120,000 lika pat ikan kan.

¹¹ Bara upla iwras tasbaya ra waia yabalka wapi kan ba, yabalka ba lamak Gedeón wapi kan bahak lui wih, Nóbah bara Jogbehá lalma tani bâk lui, uplika nani ba lamara dimi wih, witin nani ai dara walras kan, bara kiampka ra dimi aiklaban.

¹² Madián kingka nani Zébah bara Salmuná wal lika plapan, sakuna Gedeón witin nani ai nina blikan bara alkan; baha kaiki suldiar nani sut ba sirang tara iwan.

¹³ Gedeón war aiklabi si, Heres ra waia yabalka bâk kli tawi balan ba ra,

¹⁴ Sucot wina wahma kum alkan yabal wina, bara witin ra sturi nani makabi walan. Bara wahma ba 77 Sucot tawanka tâ uplika nani bara almuk nani nina ba, wauhtaya ra ulbi Gedeón ra yaban.

¹⁵ Gedeón baha nani ba brih bara Sucot uplika nani ra wan bara witin nani ra naku win: —¿Man nani kupiam krawisa ki nahki laiwaska kikram ba Zébah bara Salmuná wal dukiara? ¿Kupiam krawisa ki alkras sna wisi plun aikras kapram, man nani upliki nani ra plun yabaia apia wiram ba, witin nani plun pali dauki kan ba mita swapan pali kan, sakuna man nani plun wankaia apia wiram ba kingka nani alkras sna ba mita? ¡Bamna nâra kaiks, witin nani ba man nani mamwanra sa!

¹⁶ Baha aisin ba ra, Gedeón kiaya dusa nani upla iwras tasbaya wina bri balan ba ni, Sucot tawanka almukka nani ra wipan.

¹⁷ Baku sin Penuel tawanka ra tawer mâkan kan ba slingban bara uplika nani ba ikan.

¹⁸ Baha daukan ba ningkara Gedeón bui Zébah bara Salmuná wal ra makabi walan: —¿Tabor uplika nani man ikram ba, nahki kan witin nani ai daukanka ba? Witin nani pana win: —Witin nani ba man nani tamlia kan, kumi bani ba wihta nani kan, wihta tara, waitna karna kan.

¹⁹ Baha nani baku aisin ba ra, Gedeón ai bîla baikra karna wini aisin: —¡Muihki nani! ¡Yang muihki nani pali iki banhram! Dawan ba kasak raya ban ba baku, man nani bui witin nani ba ikras katma kaka, yang sin naiwa man nani ra mai ikaia apia kapri.

²⁰ Witin baku aisin ba ningkara, ai luhpia waitna almuk Jéter ra adar yaban: —¡Man bus bara kingka nani ba iks! Sakuna Jéter sika kau wahma pali kan bamna, witin ai sordka ba bukaia sibrin dauki kan.

²¹ Bamna Zébah bara Salmuná wal bîla Gedeón ra win: —¡Man bui wan iks! ¡Upla kum ba kakaira ra sa ai kupia karna ba mita! Bara Gedeón bûi muni witin nani ba ikan, bamna Zébah bara Salmuná wal kiamilka nani nana ra prana nani paman kan ba witin nani brin.

²² Bara Israel luhpia nani witin ra win: —Nanara, man aiklabi Madián uplika nani mihta wina pri wan sakram bamna, yang nani brin ai daukisa man bara kiamkam nani aikuki, yang nani puri wihtka aimaki kaia.

²³ Sakuna Gedeón pana witin nani ra win: —Yang sin apia, luhpi nani sin apia man nani puram wihtka aimakaia. Sakuna Dawan mita man nani puram wihtka aimaki kabia.

²⁴ Yang bui man nani ra mamkabisna ba lika, wan waihla suldiar nani wina gul mihtadingka nani man dakbi briram ba, yang ra aikma. Witin nani gul matadingka nani bri kan ba sika suldiar waihla nani yus muni kan, uplika nani ba lika upla iwras tasbaya uplika kan bamna.

²⁵ Bara Israel luhpia nani kwala tara kum tasba ra palkan, bara mihtadingka nani witin nani brin kan ba bahara yakaban, bara Gedeón ra win: —Mihtadingka nani makabram ba nâra brisma.

²⁶ Gul mihtadingka nani baman paun ra mangkan bara 40 paun pura bri kan, sakuna baha kulkanka tilara gul ni daukan dukia wala nani, kwala balianta nani Madián kingka nani dimi kan brin nani ba, bara kiamil nani nana ra paman kan prana nani ba lika kulkras kan.

²⁷ Baha gulka nani ba Gedeón brih, prîs prâka ‘‘efod’’ paskan, bara witin ai tawanka Ofrá ra bri si, watla kum dauki baha bilara mangki swin, upla sut kaiki kaia. Bara Israel luhpia nani sut baha aidulka ra kaiki ai pura sunan, bara Dawan ra lika ai pura sunras kan. Bara baha ba Gedeón bara witin ai watla bilara ai luhpia nani sut mapa ra, mina alkaika kum takan.

²⁸ Bara baku Madián uplika nani ba Israel luhpia nani ai mina ra taiban, witin nani sip kli ai lal bukras kan. Gedeón raya kan ba piua sut 40 mani, witin nani baha tasbaya ra kupia kumi lâka ra baman bâra kan.

Gedeón pruanka ba

^29-30 Gedeón, nina wala Jerubaal, witin ai watla pali ra wih iwan, bara ai luhpia waitna nani 70 brin, witin ai maya ailal bri kan bamna.

³¹ Siquem ra sin ai lila mairin kum bri kan, bara baha mairka sin Gedeón luhpia waitna kum baikan kan, bara aisika mita nina Abimélec mâkan.

³² Gedeón ba almuk pali taki pruan. Witin pruan ba ra Ofrá ra ai aisika Joás raitika ra bikan, baha tawanka ba Abiézer masraka nani tawanka kan.

³³ Gedeón pruan ba ningkara, Israel luhpia nani Dawan ra mayunras kli swin. Baal lilka nani sât sât daukan bahara ai pura sunaia dukiara, bara Baal-berit ba witin ai gâdka bâk saki brin.

³⁴ Witin nani ai waihla ai kaina kir bri kan ba mita, Dawan Gâd bui witin nani ra swaki sakan ba lika ai âuya lap tikan.

³⁵ Bara witin nani ai kupia pihni bara tingki lâka sin marikras kan Jerubaal ra, wibia kaka Gedeón watla uplika nani ra, yamnika nani uya pali daukan kan sakuna.