Wihta Nani 7 - DAWAN BÎLA AISKA

Gedeón bui Madián uplika nani ba pura luan

¹ Gedeón, nanara Jerubaal nina mâki kan ba, ai uplika nani witin wal bâra kan nani ba aikuki, titan kau puk pali kan pat buan, bara Harod tingnika ra wih, bahara ai kiampka ba bapan. Baha tingnika yahbra tani ra Madián uplika nani sin ai kiampka bapi bri kan, Moré ilka bîla ra.

² Bara Dawan bui Gedeón ra win: “Man ba upla dakni tara pali yang ra brih aulma, bara Israel luhpia nani lukbia uplika nani ba witin nani ai mihta ra mangkri kan aiklabi pura luan ba ra, witin nani lukbia ai karnika ni aiklabi Madián uplika nani ba pura luan, bara maiwanra witin nani aimayunbia.

³ Bamna baku ba mita, upla nani ra wis ya sibrin daukisa kaka, mahka ai watla ra wabia.” Bara baku Gedeón upla nani ba tânka pliki kaikan, bara 22,000 waitna nani ba kli watla ra blikan wan, bara kau 10,000 waitna nani ba takaskan.

⁴ Sakuna Dawan ba kau ban aitani lukras, bara win: “Witin nani ba kau ban ailal sa. Bamna uplika nani ba lî diaia tingni ra brih was, bara bahara yang bui witin nani tânka ba kaikamna, bara mai wimna ya man wal waia bara waia apia ba.”

⁵ Gedeón upla nani lî diaia brih wan, bara Dawan bui witin ra win: “Upla nani ai mihta ni lî panhki yul di baku di ba, baha waitnika nani ba tnaya ra laks. Bara wala nani ai lula kriki bawi lî di nani ba sin, tnaya ra laks.”

⁶ Kulki kaikan ba ra, yul lî di baku lî din nani ba 300 waitna baman bâra kan. Wala nani sut ba lika, ai lula kriki lî din.

⁷ Bara Dawan Gedeón ra win: “Naha 300 waitna nani na aikuki, man nani swaki mai sakaisna, bara Madián uplika nani ba sin sauhki tikamni. Waitna wala nani sut ba sip sa kli tawi waia.”

⁸ Bara Gedeón bui witin nani ra win wala nani ba sut sip sa kli mahka ai tintka watla ra tawi waia, sakuna witin kau waras ba ra, ai laya watla ba brih banhwan bara sîp aringka nani ba sin. Bara 300 waitna nani bâk sakan ba, baha nani baman aikuki takaskan. Bara Madián uplika nani, il bîla ra bâra kan ba mapara wih, witin nani takaskan.

⁹ Baha tihmika Dawan Gedeón ra win: “Bus, il bîla ra iwi was, Madián uplika nani ba wal aiklas, witin nani ba man nani mihtam ra mangkuna bamna.

¹⁰ Sakuna man Madián uplika nani ba wal aiklabaia si brisma kaka, albikam Purá wal witin nani bâra ba ilka bîla ra man nani was,

¹¹ bara wals witin nani dîa man nani ra aisi ba. Baha walma ba ra, man bui witin nani wal aiklabaia spiritka ba mai bukan kabia.” Bara Gedeón ai albika Purá wal, ai waihla Madián uplika nani kiampka ra dimaia lamara wih iwi kan.

¹² Madián uplika nani, Amalec uplika nani bara lalma tasbaya uplika nani ba sut il bîla langnika ba ra tristrisia ailalka yakawi ba baku bâra kan. Kiamil nani sin ailal pali bri kan, kabu un ra auhya mâ ailalka ba baku.

¹³ Gedeón ai waihla nani kiampka ba lamara wan ba ra, witin walan suldiar kum suldiar wala wal aisi kan witin yaprisauhkan kaikan dahra ba witin ra wi kan: —Yang yaprisauhkan kum kaikri, barli mâ britka kum karwi yawan kiamka kat bal diman, bara tint watla kum kat utla ba batakan.

¹⁴ Bara suldiar wala ba pana win: —Baha lika diara wala apia, Israel wina Gedeón, Joás luhpia waitna ba, sordka yaprika sauhkanka man kaikram. Madián uplika nani kiamka ba sut Dawan bui Gedeón mihta ra mangkuya ba tânka mamrikan.

¹⁵ Witin walan suldiar yaprisauhkan kaikan sturka ba, bara baha tânka wala ba bui win ba, bara Gedeón Dawan ra mayunan. Baha ningkara, witin ba Israel luhpia nani kiampka ra wan, bara witin nani ra win: —Man nani bus, Madián uplika nani kiampka ba Dawan bui wan mihta ra mangkuya.

¹⁶ Baha wisi si, witin ai uplika nani 300 ba daknika yumhpa ra baiki lakan, bara kumi bani mihta ra sîp aringka ba mangkan trumpit puhbaia, bara lî watla nani bîla baman bri kan ba bilara sin pauta klauhan mangki yaban.

¹⁷ Bara witin nani ra win: —Wan waihla nani kiampka tnaya wala ba tani ra yang nani wamna, bara yang ra aman ai kaiki wali bas, yang dîa daukamna ba man nani sin baku dauks.

¹⁸ Yang nani sut aringka ba puhbamna ba ra, man nani sut sin puhs bara bîlam baikra wins, ‘¡Dawan dukiara bara Gedeón dukiara sin!’

¹⁹ Gedeón baku lâ ba dauki, bara waitna nani 100 ba aikuki waihla nani kiampka tnaya wala ra tawi, tihmia wâl bakriki suldiar nani saiwan wina aihwaki nani ba saki, wala nani bri sal dingkaia ba piua bîla kaiki kan. Baha nani bal takan ba ra, witin nani aringka ba puhban, bara sumi nani ai mihta ra alki bri kan ba baikan.

²⁰ Bara baha daknika yumhpa ba, sut aikuki baku sîp aringka ba puhban, sumi nani ba purara buki. Ai mihta smihka ra awas buhki ba brin, bara ai mihta aihkika ra lika sîp aringka nani. Bara witin nani ai pura winan: ‘¡War aiklabaia, Dawan hilpka ra bara Gedeón hilpka ra sin!’

²¹ Israel luhpia nani ba lika plapras witin nani kiampka ra kir sâp bâra bûi banhwi kan. Sakuna Madián suldiarka nani sut lika, ai pura wini kiampka ba wina taki plapi banhwi kan,

²² bara 300 waitna nani ba kli sîpka aringka nani ba ban puhbi kan. Dawan bui baku daukan, Madián uplika nani ai tila kat klauna aiklabi prui kaia, bara ai kiampka nani wina sin taki plapi kaia, Bet-sitá tawanka ra, Sererá yabalka ra, Abel-meholá tasbaya piarkika kat, Tabat tawanka ba lamara.

²³ Bara Israel luhpia nani ai kiamka wala nani, Neftalí kiamka, Aser bara Manasés kiamka nani sut winan, Madián uplika nani plapi banhwi ba nina blikaia.

²⁴ Gedeón ai bîla blikan Efraín ilka ra iwi uplika nani sut ra, bara adar yaban upla nani plapi ba Bet-bará awalka luaika ra taki wih kaina dakbia, baku sin Jordan awala ra wih kaina dakbia. Efraín uplika nani adar yaban ba kat witin nani daukan,

²⁵ baha purkara witin nani bui Madián uplika nani tilara war wihtka tara nani ba wâl alkan, Oreb bara Zeeb. Oreb ba ikan walpa tara kum lamara; baha walpaya ba nanara Oreb Walpaya mâkisa. Zeeb sin bahara ikan bara tasbaya ba nina sin mâkan witin ai nina ra. Baha tasbaya ra sika wain taibi kan, wain laya daukaia dukiara. Witin nani Madián uplika nani ba nina bliki si tawi balan ba ra, Oreb bara Zeeb wal lal ba Gedeón ra yaban, baha lika Jordan awala baila wala ra witin bâra kan ba kat.