Wihta Nani 6 - DAWAN BÎLA AISKA

Dawan bui Gedeón ra paiwisa

¹ Sakuna Israel luhpia nani daukanka ba Dawan nakra ra kli saura kaikan, bamna 7 mani witin nani ba kli Madián uplika nani mihta ra mangkan.

² Madián uplika nani ba Israel luhpia nani ra piua bani kau karna taibi kan, bara naha nani Madián uplika nani sibrinka ba mita yukuwaia watla il nani ra, walpa unta nani ra, plis saura nani ra, baha nani sip wih dimi alkaia apia ba untika nani ra ai watla nani ba dauki brin.

³ Piua bani Israel luhpia nani ai nasla dauki mangki bri kan ba, mâ nani ba Madián uplika nani bara Amalec uplika nani lalma tani ra iwi kan ba bal, pura lui bri kan.

⁴ Witin nani Israel luhpia nani tasbaya aiska ra ban Gaza kat takaski, baha nani tilara ai watla nani mâki, bara baha wina Israel luhpia nani pata mâ nani ba, sîpka nani ba, bîpka wainhka nani bara birikuka nani sut dakbi bri kan, Israel luhpia nani piaika diara kumi sin swiras kan.

⁵ Witin nani ai watla nani baha nani tilara mâki, ai daiwra nani sin baha nani daiwra nani tilara dingki, tasbaya dawanka nani ba sut sauhki kan. Kiamil daknika tara nani bri balan, kruhkru daknika tara baku.

⁶ Madián uplika nani daukanka saura ba tâka mita, Israel luhpia nani ba umpira daukan, piua karna nani tilara diman bara witin nani Dawan ra ai pura sunan.

⁷ Israel luhpia nani Dawan ra ai pura sunan Madián luhpia nani mihta wina dakbi pri sâkbia,

⁸ bara Dawan bui witin nani ra ai prapitka kumi saki blikan, bara prapit ba witin nani ra win: “Dawan, Israel Gâdka ba, naku wisa: ‘Man nani Idsip ra alba iwi kapram, bara yang mita baha wina man nani mai sakri;

⁹ Idsip wina baman yang bui man nani ba pri mai sakras kapri, sakuna baha nani sut man nani ra mai taibi kan nani ba mihta wina sin. Baha nani man nani mamwan wina kangbi sakri bara tasbaya nani ba man nani ra maikri.

¹⁰ Bara yang bui man nani ra mai wîri, yang sika man nani Dawan Gâdkam. Bara man nani amorreo nani gâdka ba sîa briaia apia sma, witin nani ai tasbaya ba ra man nani iwaia sma; sakuna man nani bui yang bîli walras sma.’ ”

¹¹ Baku bamna, Dawan insalka ba balan bara Ofrá usupumka dusa munhtara iwan, baha sika Joás dukia kan, Abiézer taika kan. Gedeón, Joás luhpia ba, Madián luhpia nani bui witin ra kaikbiara sîa, taibaia wainka nani ba paun munaika watla ra dimi yukuwi plawar mâ taya saki kan.

¹² Dawan insalka ba witin ra param taki aisin: —¡Waitna karna, sibrinkas waitna, Dawan ba man wal sa!

¹³ Bara Gedeón pana aisin: —Mâsa, padin ai muns, sakuna Dawan ba yang nani wal sa kaka, ¿dîa muni naha diara nani naku yang nani ra takisa? ¿Anira sa Dawan daukanka karnakira nani ba, baha dukiara wan damika nani wan aisi kan ba Idsip wina wan sakan piua ra? Sakuna witin naiwa wan lulkan bara Madián uplika nani mihta karnakira ra mangki wan swin.

¹⁴ Dawan insalka ba witin ra kaiki, bara witin ra win: —Karnika brisma bara bûi mahka diara dauks, Israel luhpia nani ba Madián uplika nani mihta wina swaki sakaia. Yang bui man mai blikisni bâra waia.

¹⁵ Sakuna Gedeón kli pana aisin: —Dawan, kau aima kumi padin ai muns, ¿nahki muni yang bui Israel ba swaki sakamna? Manasés taika nani sut tilara, yang masraki nani ba kau umpira sa, bara yang kau sirpi sna taiya nani sut tilara.

¹⁶ Dawan pana witin ra win: —Man sip kama upla nani ba swaki sakaia, kan yang lika man wal kamna bamna. Madián uplika nani ba waitna kumi ra pruki bataki ba baku pura luma.

¹⁷ Bara Gedeón aisin: —Man namkra ra ban yamni ai kaikram sa kaka, diara kum dauki mairiks, kasak pali man bui yang wal aisisma tânka ba.

¹⁸ Pliskam pali, man naha wina wapara, yang waitla ra wih kli tawi bal prisant kum maikaia brisna ba maikamna ba kat was. Bara Dawan pana âu win: —Yang nâra kamna man kli tawi balma ba kat.

¹⁹ Gedeón ai watla ra wan bara guts lupia kum iki piakan, plawar sin 20 litro saki brin, bara îs mangkras britka daukan. Bara wîna piakan ba kûa kumi ra mangkan, pilala ba sin dikwa kum ra laikan, bara usupum dusa munhta ba kat brih wan.

²⁰ Bara Dawan insalka ba witin ra win, wîna piakan bara brit îs mangkras daukan ba sin, walpa tara ba purara kahbi bâra swibia, bara pilala ba baha purara laikbia. Bara daukaia win ba baku Gedeón daukan ba ningkara,

²¹ insal ba dus kum bri kan ba tâ ba ni, wîna ra bara brit ba sin kangban, bara walpa ba wina pauta buki klauhan, bamna wîna bara brit ba sut angki âpu daukan; baha ningkara Dawan insalka ba ai mawan wina lap tiwan.

²² Bara Gedeón ai tânka brin witin Dawan insalka wal aisi kan ba, bara witin naku aisin: —¡Ay Dawan, Dawan! ¡Dawan insalka ba yang wal maiwan kat bûi, ai mawan ba kaikri!

²³ Sakuna Dawan pana witin ra win: —Si bripara, man pruma apia. Yang kupi kumi lâka ba bris.

²⁴ Bara Gedeón baha tasbaya ra altar kumi paskan, bara Dawan ra pain kulkan lâka yabaia bahara ai pura sunan, bara altar nina ba ‘‘Dawan ba kupia kumi lâka’’ mâkan. Naha altarka ba naiwa kat Ofrá ra kau ban bâra sa, baha lika Abiézer masraka nani tawanka tara ba.

²⁵ Baha tihmia pali ba Dawan Gedeón ra win: —Aisikam daiwra nani ba tila wina bîp wainhka kum bris, bara kli bîp wainhka wala kum sin bris 7 mani bri ba, bara aisikam Baal altarka bri ba slingbi sâks. Bara baha altarka lamara dus kum Baal lilka bapan ba bahara ai pura suni dusa ba sin daiki sâks,

²⁶ bara baha kan kahbaika pliska purara altar kum paskma Dawan Gâdkam dukiara. Bara bîp wainhka ba bris, bîp wainhka wala ba sin, bara daiwan aiska angki sakripaiska dauki yang ra aik, Baal dusa upla bahara ai pura suni ba baiki pauta bris.

²⁷ Bara Gedeón, witin ai warkka dadaukra nani ba wina waitna matawalsip brin, bara Dawan bui witin ra dîa daukaia win ba kat daukan. Sakuna witin ai papika ra bara tawan uplika nani ra sin sibrin luki kan, bamna warkka sut ba tihmia ra baman daukan.

²⁸ Yapra wala titan, tawan ra upla nani ba buan bara kaikan Baal altarka kata saki mâyara swin kan, baku sin bahara ai pura suni dusa altar lamara kata ba sin mâyara kan, baha purkara altar raya kum paski, baha purara bîp wainhka kum aiska angki sakripaiska daukan kan.

²⁹ Witin nani pana pana ai tilara makabi walan: “¿Ya pali naha na daukan?” Witin nani ai tilara pliki makabi walan, baha ningkara tânka brin Gedeón Joás luhpia ba baha daukan, bara witin nani Joás ra wih win:

³⁰ —Luhpiam waitna ba latara sâks, yang nani witin ba ikaisna. ¡Baal altarka kata ba witin mita saki mâyara swin, bara upla bahara ai pura suni dusa altar lamara kata ba sin!

³¹ Baha uplika nani Joás kutbi bri aisi kan, witin baha nani ra tawi bara win: —¿Man nani Baal tâwan aisaisma, bara witin tâwan aiklabaisma ki? ¡Ya ya kabia, Baal tâwan aisi ba pruaia kaka prubia, kau yu baiwaia lalma kahbras ba ra! Baal ba Gâd kaka, man nani swis witin yakan ai tâwan aisabia, altarka ba sika witin ai altarka kan slingban ba.

³² Bara baha yua wina witin nani Gedeón nina ba Jerubaal mâkan, bara witin nani win: “Baal ba gâd kaka, witin yakan ai tâwan aisabia”, kan Gedeón mita ai altarka ba mâyara ikan bamna.

³³ Bamna Madián uplika nani, Amalec uplika nani bara lalma tani tasbaya ra iwi uplika nani ba sut, asla taki Jordan awala Jezreel ilka bîla ra ai kiampka bapan.

³⁴ Sakuna Dawan spiritka ba Gedeón ra aiska diman, bara witin sîp aringka kum brih puhban, Abiézer masraka nani sut bal asla takbia dukiara;

³⁵ baha purkara, witin bui upla nani blikan Manasés kiamka nani ba sut paiwaia witin wal asla takaia. Baku sin upla nani blikan Aser, Zabulón bara Neftalí kiamka nani ba sin paiwaia, taki bal witin nani aikuki asla takaia.

³⁶ Bara Gedeón bui Dawan ra makaban: “Dawan, yang ra ai wiram ba baku, kasak pali man bui yang mihti ra Israel luhpia nani ba swaki sakaia buram sa kaka,

³⁷ sîp taya puspusa kum, plawar mâ taya saki ba munhta kat tasba ra palki swimna. Bara titan kat sîp taya ba diwas laya ni buswan kabia kaka, sakuna tasba ba lika lâwan ban sa kaka, baku yang tânka brimna man bui yang ra ai wiram ba baku, kasak pali yang bâk Israel luhpia nani ba man swaki sakaisma.”

³⁸ Witin Dawan ra dîa makaban ba baku, takan. Gedeón yapi si titan buan ba ra, sîp taya ba bri suban bara baha wina diwas laya kahmi kum prais sakan.

³⁹ Ban sakuna, Gedeón kli kau ban Dawan ra aisin: “Yang wal kupiam baikpara, yang kli taibi aisisna bamna. Sakuna kau aima kumi diara kum daukma ba kaikan ai daukisa. Nanara dauks sîp taya ba lâwan kabia, sakuna diwas laya ba baha lamara tasba ba ra baman buswan kabia.”

⁴⁰ Baha tihmika witin dîa makaban ba baku Dawan daukan. Bara yapra wala titan kaikan, sîp taya ba lâwan kan, sakuna tasba lika laya mita buswan kan.