Wihta Nani 5 - DAWAN BÎLA AISKA

Débora Barac wal lawana aiwanan ba

¹ Baha yua ra Débora bara Barac wal, Abinóam luhpia waitna ba, witin nani naku aiwanan:

² “Man nani sut Dawan ra mayuns, kan Israel ra waitna nani kau bâra sa aiklabaia ridi ba; kan upla nani tilara waitna nani kau bâra sa, war aiklabaia waia winanka ba un kahbaia.

³ ¡Man nani, king nani, yang ra ai wali banhs! ¡Man nani wihta tara nani, yang ra wali banhs! ¡Dawan ra aiwanaisna!, ¡Israel Gâdka ra aiwanaisna!

⁴ “Dawan, man Seír wina bal takram ba ra; man Edom twi tasbaya nani wina taki waram ba ra, tasba ba nikban kan, kasbrika purara ba sin tatatwan, kasbrika nani ba wina lî auhan.

⁵ Dawan, man mamwanra, man mamwanra, Israel Gâdka, il nani ba nikwi kan, Sainai ilka ba sin.

⁶ Anat luhpia Samgar yua nani ra, bara Jael yua nani ra, impapakra nani ba yabal bîla bâk impakras kan, sakuna yabal saura nani bâk impaki kan;

⁷ Israel tawanka lupia nani ba lulki swih upla nani ba sut âpu taki kan. Baha piua ra sika yang buri, ¡yang, Débora, Israel yaptika kum!

⁸ “Israel luhpia nani 40,000 ai gâdka raya nani mangki briaia tawan getka nani ra aiklabi kan ba ra, sakuna witin nani ai langsika tâura, ai kaina kahbi yukuwaika briaia tânka kum sin kaikras kan.

⁹ “Yang kupi lukanka ba, Israel wihta tara nani ba dukiara mangki briri; yang tawanki uplika nani ba dukiara, war aiklabaia winanka bîla ba wali witin nani un kahbi kan nani ba ra wîri. ¡Man nani sut, Dawan ra mayuns!

¹⁰ “Man nani, biriku mairin pihni nani purara ulisma ba, baha sturka ba aisas; bara man nani iwaika swapni nani ra iwisma ba sin; man nani impapakra wapi auma ba sin:

¹¹ ¡bukra, daiwan lî dakakaika nani ba tilara, upla nani ra sin wis miusik binka dauki ba man nani walma ba ra, Dawan ai waihla nani pura luan ba, baha man nani maisa paks, Israel tawanka luhpia nani sin ai waihla nani pura luan ba dukiara puram wini aisas!

¹² “¡Rawi bus, Débora, rawi bus, rawi bus bara lawana kum aiwans! ¡Barac, man, Abinóam luhpia waitna, bus bara uplikam nani priski bri ba, lanhki saki brih was!

¹³ “Bâra mika Israel luhpia nani ba il pura wina bal iwan, karnakira nani ba mapara aiklabaia waia; Dawan war daknika nani ba yang dukira luki bal iwan war aiklaklabra waitnika nani ba mapara aiklabaia.

¹⁴ Tila waitna nani ba Efraín wina baha ilka bîla ra bal iwan, baha nani ninara Benjamín daknika ba sin balan. Maquir wina wihta nani ba blikan wan, bara Zabulón wina sin ai wihtka tara nani ba.

¹⁵ Isacar wina sin wihta nani ba balan, Débora yula kahbaia; Isacar bui Barac ra tâ baikan, kan witin nina bliki aiklabi il bîla ra wan. “Ruben daknika tilara waitna tara nani bara kupia lukra swapni bâra sa kaka,

¹⁶ ¿dîa muni witin nani sîp klarka nani tilara takaskan, sepad nani ai sîpka nani ra wini kan ba bîla baikra wali? ¡Ruben daknika nani ba tilara waitna tara nani bâra sa, sakuna sasibrira nani sa!

¹⁷ “Galaad ba Jordan awala baila wala ra aihwaki takaskan; Dan ba duri tara nani ba lamara takaskan, bara Aser lika kabu un wâpka nani ra takaskan, baha wina kli takras;

¹⁸ sakuna kau pura tani tasbaya ra iwi nani kan ba, Zabulón bara Neftalí uplika nani ai rayaka ba pât mihta ra mangkan.

¹⁹ “Bâra mika king nani ba Taanac ra balan, Meguido tingnika nani lama ba kat; Kenan kingka nani ba war aiklabaia lukanka bri balan, sakuna witin nani silbar bara yuyaka nani sin briras kata.

²⁰ Kasbrika purara ba wina, kasbrika wala ba ra sin, slilma nani bâra ba Sísara mapara aiklaban;

²¹ tingni ba, patitara tingnika ba, Quisón tingnika ba mita witin nani ba âpu daukan. ¡Karnakira nani kârma binka wini ba, man bui baha nani slingbi tikma!

²² “¡Aras nani sûska ba wina bin nani takisa! ¡Aras karnakira nani karna plapi ba mita tasba ra isti ai mina ra taibisa!

²³ Bara Dawan insalka ba maisa pakisa: ‘¡Meroz uplika nani purara lahtubanka karna kum yarka balbia!’ Kan aiklaklabra kupia karna nani balan ba aikuki, Dawan hilpka ra aiklabaia buras kan bamna.

²⁴ “¡Mairin nani tilara Jael ba yamni pali win sa, witinka Héber quenita maya ba! ¡Utla tanhta nani ra iwi ba mairka nani tilara yamni win kabia!

²⁵ Sísara lî diaia makaban, sakuna Jael witin ra tialka laya diaia yaban. ¡Tialka laya krangwanka ba, kahmi painkira ra laiki bri sal yaban diaia!

²⁶ Witin yapi kan ba ra, tint watla mâkaia playka ba Jael ai smihka ra alkan, bara amar tara ba sin ai mihta aihkika ra brin, bara Sísara lal kat prukan lal dusa ba klauhbi dusa ba tasba kat diman.

²⁷ Sísara, Jael mina ra tirwi tauki si; ai wîna latwanka mita tasba kat kauhan, ban baha kat pruan.

²⁸ “Sísara yaptika, ai kupia kriwan pali, windar bâk taki kaiki bara makabi wali aisisa: ‘¿Luhpi waginka ba, dîa muni balras ban lap tiwan ba? ¿Luhpi war waginka ba, dîa takan balaia piua sut pat luan na?’

²⁹ Mairin nani sinskira puli ba mita witin ra wisa, bara witin pali sin kli kli aisisa:

³⁰ ‘Witin nani war aiklaban ra diara nani dakbi brin ba dukia nani ba ai tilara yuisa kaia sa. Aiklaklabra kumi bani ra alba mairin kum, apia kaka wâl yaban; sakuna Sísara dukiara lika kwala maplira nani; kwala kum, kwala wâl kat sin, mapla sât sât ni maman nani yan, aiklaklabra pura lalura ba ai nana ra pamaia.’

³¹ “¡Dawan, man waihlam nani sut ba, yarka baku sauhki tikan kabia, bara baha nani latwan mai kaiki nani ba, yu lapta ai karnika aiska ingwi ba baku ingwi kabia!” Baha ningkara witin nani mani 40 kupia kumi bara lamni lâka ra iwi kan.