Wihta Nani 4 - DAWAN BÎLA AISKADébora bara Barac wal Sísara pura luisa 1 Dawan kaikan Ehud pruan ba ningkara, Israel luhpia nani ba kli saura daukan, 2 bara Dawan ba kli witin nani king Jabín mihta ra mangkan. Jabín ba Kena uplika nani kingka kum kan, Hasor tawanka tara ba wihta aimaki kan. Ai suldiar nani wihtka tara ba nina Sísara mâki kan, bara Haróset-goím tasbaya ra iwi kan. 3 Jabín lika war waginka ayan ni daukan ba 900 bri kan, bara witin bui Israel luhpia nani ra 20 mani saura pali rausauhki kan, sakuna Israel luhpia nani baha piua kat kli Dawan ra ai pura sunan, bara Dawan bui witin nani ra hilp munan. 4 Baha yua nani ra Israel luhpia nani ba prapit mairin Débora, Lapidot maya ba, witin nani wihtka aimaki kan. 5 Débora ai natka bri kan sila dusa munhta distika ra iwi kaia (baha ba mâki kan ‘‘Débora sila dusa’’), baha lika Efraín ilka nani ra bâra kan, Ramá bara Betel wal bilka ra, bara Israel luhpia nani ba Débora ra wan unsaban ba dahra wiaia, bara lâka ba wapni daukaia. 6 Yu kumi, Débora upla blikan wan Barac ra wiaia bara witin ra paiwaia, witin ba Abinóam luhpia waitna Quedes ra iwi kan, baha lika Neftalí kiamka tasbaya kum, bara witin ra win: —Dawan, Israel Gâdka ba, naku daukaia man ra adar maikan sa: ‘Tabor ilka ra was, bara bahara Neftalí bara Zabulón wal kiamka nani ba wina 10,000 waitna asla dauks. 7 Bara yang bui daukamna Sísara, Jabín suldiar wihtka ba, Quisón awala ra war waginka nani bara suldiar nani brih balbia man wal war aiklabaia. Sakuna witin nani ba yang bui man mihtam ra mangkamni.’ 8 Barac pana win: —Man ba yang wal wama kaka lika, yang wamna. Sakuna man ba yang wal waras sma kaka, yang wamna apia. 9 Bara Débora pana win: —Ban kaka, yang lika man wal wamna. Sakuna naha aiklabanka ra man auma na wina mayunra kabia ba lika, man ra maikan kabia apia, kan Sísara ba Dawan bui mairin kum mihta ra mangkuya bamna. Bamna Débora lika Barac wal Quedes ra wan. 10 Bahara Barac bui Zabulón bara Neftalí kiamka nani ba paiwan, bara suldiar nani 10,000 waitna asla dauki, baha wihtka aimakan. Bara Débora sin witin wal wan. 11 Quedes lamara, Saanaim usupumka ba lamara, Héber quenita ba tintka ba bâra kan, witinka ba lika quenita wala nani wina dakwi takan kata, baha nani ba witin wal baku, Hobab kiamka nani kan, baha lika Moses dapnika kan ba. 12 Sísara sturi walan Barac ba Tabor ilka ra uli wan ba, 13 bara witin ayan waginka nani brin bara 900 suldiar nani aikuki asla paiwi brih, mahka impakan Haróset-goím wina Quisón tingnika ba kat. 14 Bara Débora bui Barac ra win: —Nanara man taki was, bara Dawan bui nanara Sísara ba man mihtam ra mangkbia. ¡Suldiarkam nani kainara Dawan pat auya sa! Bara Barac ai suldiarka 10,000 nani ba aikuki Tabor ilka wina bal iwan, 15 bara Sísara ai suldiarka nani aikuki Barac sordka mapara aiklabaia dimi wan ba ra, Dawan bui Sísara suldiarka nani ba bara wagin ra uli aiklaklabra nani sut ba tilara sibrin tara dingkan bara plapi banhwan; Sísara pali sin sibrin mita waginka wina iwi ai mina ni plapi kan. 16 Baha takan ba ra, Barac ai suldiarka nani aikuki witin nani nina bliki Haróset-goím kat wan. Baha yua Sísara war daknika wina suldiar kumi sin swak takras: titikbi iki âpu pali daukan. 17 Jabín, Hasor kingka ba, Héber quenita ba taika nani ba aikuki ai uplika pain kan bamna, Sísara ai mina wapi plapan yaba, Héber maya Jael tintka watla kat wan. 18 Bara mairka ba bal taki witin ai lakula daukan bara win: —Nahak bal, dawanki, nahak bal; man si bripara. Sísara utla ra diman, bara Jael kwala tara kum bri sal, witin pura praki bahara yukukan; 19 bamna Sísara lî diaia makaban, witin diran pali dauki kan bamna. Bara Jael daiwan taya watlika ra tialka laya bri kan ba diaia yaban; bara baha wina kli pura praki swin. 20 Bara Sísara witin ra win: —Man nâra takaski, tintkam watla durka na aihwaki kaiki bas; bara upla kum kra balbia bara mamkabi walbia kaka upla kum wamtla na ra sa sapa, man bui witin ra wis nâra upla âpu sa. 21 Sísara swapan pali kan bamna, taih iwi yapan pruan baku prais. Bara Jael witin bûi muni wih amar tara kum brin, tint watla playka tasba ra bapi dusa ba kum, bara witin bin daukras pali Sísara lama kat dimi, dusa ba ni lal ba tasba kat sabi dingki iki ba kat swin. Bara Sísara baku pruan baha yua ra. 22 Bamna Barac bui Sísara pliki wan ba ra, Jael bal takan ai lakula daukaia bara witin ra win: —Bal, man ya pliki taukisma ba, yang bui mamrikamna. Barac tint watla ra wih diman bara kaikan Sísara bahara tasba ra prawi kan, pat pruan bara ai lal ba dus ni tasba ra saban kan. 23 Baha yua Dawan baku Jabín, Kena uplika nani kingka karnika ba sut batakan, Israel luhpia nani ba mawanra. 24 Bara baha piua wina Israel luhpia nani ba piua bani Jabín ra kau karna taibi kan, ban slingbi sut sauhki âpu tikan ba kat. |
© 2010 Bible Society in Nicaragua
Bible Society in Nicaragua