Wihta Nani 21 - DAWAN BÎLA AISKA

Benjamín taika wina maya plikan

¹ Israel luhpia nani Mispá ra aidrubanka daukan kan ba ra, witin nani swer takan Dawan mawanra, ai luhpia mairin nani ba swika Benjamín kiamka nani wal marit takaia apia.

² Sakuna ningkara witin nani Betel ra asla takan, bara yu aiska Dawan mawanra buan, ai pura suni tihmia kat, ini makabi wali kan dîa daukaia ba:

³ “¡Dawanki, Israel Gâdka! ¿Dîa muni naha lâka na yang nani maipara naku takan ki? ¿Israel luhpia waitna nani tilara luhpia waitna kum ba, nanara kiamka âpu takan na?”

⁴ Yu wala Israel luhpia nani ba titan pali buan, altar kum paskan bara baha purara daiwan wîna aiska angki, kli Dawan wal ai uplika takaia sakripaiska nani sin daukan.

⁵ Bara witin nani ai tilara makabi walan: “¿Yawan Mispá ra aidrubi asla takanka tara daukan ba ra, wan tila wina ya kiamka ba baha paiwanka ra waras kan ki?” Witin nani bahara swer taki aisin kan, ya baha paiwanka tara ra waras kan ba ikaia.

⁶ Israel luhpia nani ba sari pali kan ai muihni bara ai lakra nani Benjamín kiamka nani ra baha pâtka tara pali alkan ba dukiara, bara witin nani aisin: “Naha yua na Israel wina kiamka kumi ba dakbi sakan sa.

⁷ ¿Yawan dîa daukaia, ani wina mairin nani sakaia, Benjamín kiamka waitna nani kau raya nani ba maya baikaia? Yawan nani Dawan ra pat swer takan, wan luhpia mairin nani lika baha waitnika nani ba wal maya baikaia apia win.

⁸ ¿Israel luhpia nani tila wina kau upla wala nâra sa ki, witin nani Mispá paiwanka tara ra Dawan mawanra kau buras kan ba?” Bara witin nani ai kupia krawan, Jabés Galaad wina upla kumi sin baha nani aidrubanka tara ra waras kan,

⁹ kan nina nani winan ba ra, baha tawanka wina uplika kumi nina sin bâra âpu kan.

^10-11 Bamna baha aidrubanka tara ba wina suldiar aiklaklabra kau pain nani 12,000 saki, adar yabi blikan wan Jabés uplika nani ba sut sord ni ikaia, tuktan nani, mairin nani bara tiara pat waitna brin nani sin sut ikaia.

¹² Jabés uplika nani ba tilara 400 mairin tiara nani ba, kau waitna wal prawras nani ba sakan. Bara baha tiara nani ba Siló ra bara Kenan ra kiamp bri kan ba ra brih wan.

¹³ Bara tawan aiska ba blikan wan, Rimón walpaya untika ra Benjamín nani kiampka ra waitna nani yukuwi banhwi kan ba pliki sakaia, witin nani ba paiwi bri balbia aikuki kupia kumi lâka daukaia.

¹⁴ Waitna nani ba Rimón walpaya untika ba wina taki balan, bara Israel luhpia nani baha mairka nani Jabés wina bri balan ba witin nani maya baikan. Sakuna waitna nani ba kau manis ai maya briras kan, mairin nani ba wiria baman waitna ailal ai maya briras kan.

¹⁵ Israel luhpia nani ba Benjamín kiamka nani ba dukiara sari pali luki kata, kan Dawan mita witin nani Israel kiamka nani tilara apanis kum dauki swin ba mita.

¹⁶ Bara wihta nani ba baha aidrubanka tara tâ bri kan nani ba aidrubanka aiska ra makabi walan: “¿Yawan ani wina kau mairin wala nani pliki sakaia, Benjamín ra waitna wala nani kau ai maya briras ba maya baikaia, witin nani ai tilara mairin nani sut ikan ba?

¹⁷ Benjamín kiamka nani ba wan tilara kiamka kum aihka ban bâra kaia sa, baha nani kau raya nani ba kiamka kli bal takaia sa, bara baku Israel kiamka ba tila wina kiamka kumi sin lap tiwan kabia apia.

¹⁸ Sakuna yawan wan luhpia mairin nani lika sip baha waitnika nani ra maya baikras, kan yawan Israel luhpia nani sut wan luhpia mairin nani dukiara Dawan ra swer taki aisin, witin nani ba Benjamín kiamka waitnika nani ra lika maya baikaia apia, baha lahtuban lâka bara swira lâka ra saura kulkan ba mita.

¹⁹ Ban sakuna, mani bani Siló uplika nani Betel yahbra tani ra iwi kan ba, Siquem uplika nani sin Betel lalma tani ra iwi kan ba, baku sin waupasa tani ra, Leboná ra iwi nani kan ba asla, Dawan liliaka kum daukan.”

²⁰ Bara Israel wihtka nani ba mani bani Israel luhpia nani lilia tara dauki ba sturka ba, Benjamín kiamka nani ra blikan, bara win: “Man nani Siló lamara wain nasla nani ba ra wih yukuwi bas,

²¹ bara kaiki aihwaki bas, Siló wina tiara nani ai daknika ra bal taki lilia puli kabia ba, bara man nani sin yukuwaikam ba wina taki bal kumi bani mairin kum mayam impliki bris; bara witin nani wal mahka tasbayam ra was.

²² Bara tiara ba aisika bara lakrika nani yang nani ra bal baha dukiara lâ pliki blauhbia kaka, yang nani bui witin nani ra wimna: ‘Yang nani bui man nani ra wînam kat mamkabisna wan tâ baikanka kum daukaia, baha nani pâtka ban swih tiks, kan yang nani Jabés nani mapara war aiklabri bara mairin nani aitani ailal sakras kapri waitna nani sut kumi bani ba maya baikaia. Baha purkara, luhpiam nani ba man nani mita witin nani wal maya baikras kapram ba mita, swer takram lâka ba man nani mampara man nani mita lâ krikras kapram, baku ba mita man nani sin pâtkas kama.’ ”

²³ Witin nani lâ daukan ba Benjamín taika nani ba sin aitani kulkan, bara baha nani kumi bani wan, bara tiara nani dans puli kan ba wina ai maya kum impliki brin, bara witin nani ai tasbaya ra wan, ai tawanka nani kli paskan bara ai maya wal ai tawanka ra iwan.

²⁴ Bara Israel luhpia wala nani ba sin ai tawanka ra mahka wan, kumi bani ai tasbaya ra, ai taya nani ra bara ai kiamka kat.

²⁵ Baha yua nani ra sika Israel luhpia nani tilara kau king kumi sin bal takras kan, bara kumi bani ba dîa ai kupia ra dauki kaia brin dauki kan ba baku dauki kan.