Wihta Nani 20 - DAWAN BÎLA AISKA

Benjamín kiamka mapara war aiklaban ba

¹ Benjamín kiamka luhpia nani baha sturka ba walan ba ra, witin nani sin Dan tasbaya wina Beerseba tasbaya kat bara Galaad tasbaya sin sut Dawan mawanra, Mispá ra asla takan war aiklabaia.

² Israel luhpia nani pura wihtka aimaki nani kan ba sut bâra kan, bara tawan uplika nani ba sin 400,000 bâra asla takan kan.

³ Benjamín kiamka ba walan ai taya nani Israel kiamka wala nani ba, Mispá ra aidrubanka daukan ba. Witin nani Libait ba ra makabi walan, nahki muni baha lâ krikanka tara ba, baku daukan ba baha tânka ba walaia win.

⁴ Mairka pruan maya Libait waitna ba bui sturka ba witin nani ra win: —Yang mayi lila ba wal Galaad tawanka ra wari, Benjamín kiamka nani tilara, tihmia kum bahara lalawaia.

⁵ Sakuna baha tihmika tawanka uplika nani ba yang dimri watla ba kutbi brin, yang ai ikaia wisi, bara baku yang mayi lila ba alki saura muni ikan.

⁶ Bara yang mayi wîna tara ba tami sirpi daukri, bara wîna klakanka pîska nani ba kuntri aiska ra blikri, Israel aiska ra marikaia naha lâ krikanka tara na nina sauhkanka lâka tara daukan tânka ba marikaia.

⁷ Bamna nanara man nani Israel luhpia nani mihtam ra sa naha daukanka lâka tânka na pliki kaikaia lukankam briaia dîa daukaia sma ba.

⁸ Witin nani baha walan ba ra, sut pali upla kumi baku ai mina ra bûi, bara aisin: —Naha wina upla kumi sin ai watla ra ai kiampka ra tawi wabia apia lâka na wapni daukras kaka.

⁹ Yawan nanara daukaia ba sika lat lulki kaikaia, yawan wan tâ brih ki Guibeá ra aiklabaia waia uplika ba.

¹⁰ Kiamka bani ba tila wina, upla matawalsip bani tila wina kumi, witin nani suldiar nani ba pata pliki briaia wirhika ba baha nani ai purara bribia. Upla wala nani ba aiklaklabra nani Guibeá ra wabia, witin nani baha wan nina sauhkanka lâ tara pali daukan ba mana klala yabaia.

¹¹ Israel luhpia nani sut upla kumi baku asla takan, tawanka ba mapara aiklabaia waia.

¹² Bara witin nani Benjamín tasbaya aiska ra upla blikan, witin nani ra wiaia: “¿Man nani wina upla tila ba, dîa muni naha lâ tara pali na daukan ba?

¹³ Bamna baha uplika nani Guibeá ra saura dadaukra nani ba, yang nani mihti ra mangks, witin nani ba ikamna, bara baku Israel luhpia nani watawika lâka ba wina klin sakan kabia.” Sakuna Benjamín kiamka nani ba ai taya Israel luhpia wala nani aisin bîla ba wali alki daukras kan,

¹⁴ sakuna Benjamín luhpia nani ba witin nani wih, tawan aiska ba asla daukan Guibeá ra, Israel luhpia ai tahkia wala nani ba mapara aiklabaia waia.

¹⁵ Benjamín taika tawanka nani ba wina 26,000 suldiar nani ridi takan, baha purara 700 waitna nani Guibeá wina ridi takan ba kau kulkras kan.

¹⁶ Baha tilara 700 waitna nani wahbi sakan ba, ai mihta smihka ni praukpraukia ba alki lulki kan, walpa kumi bani ba upla lal kum ra sabi kan.

¹⁷ Israel luhpia wala nani Benjamín kiamka apia nani sin 400,000 suldiar aihwa nani bri kan.

Benjamín kiamka mapara war aiklaban ba

¹⁸ Israel luhpia nani ba Betel ra wan, bahara witin nani Gâd ra ai pura suni makabi walaia, ai tila ba wina ya kiamka ba wina war tâura aimaki, Benjamín nani mapara aiklabaia waia ba. Dawan bui witin nani ra win, Juda kiamka ba wina tâura aimaki aiklabaia wabia.

¹⁹ Baha walan ba ra, witin nani yapra wala ba titan pali buan ba ra, Guibeá tawanka lamara wih ai kiampka ba bapan.

²⁰ Benjamín uplika nani mapara dimi wan, bara mahka war aiklabaia ridi taki banhwan Guibeá mawanra.

²¹ Sakuna baha yua ba Benjamín uplika nani tawan ba wina bal taki, Israel luhpia nani ra 22,000 ikan.

^22-24 Ba mita Israel luhpia nani ba plapi kli Betel ra wan, Dawan mawanra ai sarka lâka tara bri ini kan. Baha yua aiska, ban tihmia iwan kat kli ai muihni Benjamín kiamka nani ba wal, aiklabaia wabia. Baha walan ba ra, witin nani kli ai kupia karna takan, bara yapra wala titan witin nani kli Benjamín nani mapara aiklabaia wan, kainara wal aiklabaia prawan ba pliska kat kli wan.

²⁵ Sakuna Benjamín uplika nani kli aima wala ra Guibeá wina taki wan, witin nani wal aiklabaia, bara kli 18,000 suldiar nani Israel luhpia nani ra ikan.

²⁶ Bara Israel luhpia nani suldiarka sut tawan uplika nani sin kli Betel ra wan, bara Dawan mawanra yu aiska plun piras ai sarka tara bri inan. Dawan mawanra wîna aiska angki, kli wal wapni sakaia sakripaiska dauki Dawan ra yaban.

^27-28 Baha yua nani ra, Dawan lâka nani auhbaia watla ba Betel ra kan, bara prîs aimaki kan ba Finees, Eleazar luhpia bara Eran mulika. Bara Israel luhpia nani ba kli Dawan ra ai pura suni makabi walan: “¿Yang nani na kli wan muihni nani Benjamín kiamka nani ba wal aiklabaia waia sna ki, apia kaka puri luan ba ra wisi ba kat swiaia sna ki?” Bara Dawan bui witin nani ra win: “Man nani kli wih aiklas, yauhka yang bui man nani ra pura luaia karnika na maikamna.”

²⁹ Israel luhpia nani suldiar daknika kum ba Guibeá tawanka lata tani ra yukuwi banhwan,

³⁰ bara suldiar wala nani yu yumhpa yua ba aimakan ba ra, witin nani tâura yu wâl aimakan ra daukan ba baku kli wapi taki wan, Guibeá lamara ai waihla nani ba mapara.

³¹ Benjamín taika nani ba kau aima kum kli tawan ba wina taki wan, Israel luhpia nani ba mapara aiklabaia. Betel bara Guibeá wal yabalka bilka ra witin nani 30 upla ikan,

³² witin nani lukan Israel luhpia nani ba ai sîa plapi kan ba baku, kli naiwa sin plapaisa, bamna pat aima wâl pura luan ba baku, naiwa sin kli pura lubia luki kan. Sakuna Israel luhpi nani ba ai sîa plapras kan, sakuna ai tâura kainara wapi kan sîa plapi baku natka ra, witin nani ba tawan lama wina kitbi laihura sakaia dukiara.

³³ Witin nani takaski buaia pliska Baal-tamar kat wan, bara baha wina aiklabaia bapi buan, wala nani sin ai yukuwaika ra Guibeá lamara yukuwi banhwi nani kan ba sin bal takan,

³⁴ bara witin nani tawan ba mapara aiklaban, 10,000 aiklaklabra nani kau pain kan ba Guibeá mapara aiklaban. Aiklabanka ba karna aiklaban kan, Benjamín kiamka nani ba lukras kan witin nani ba pat lus tiwuya ba.

³⁵ Dawan baha yua ba Israel luhpia nani ba karnika yaban Benjamín taika nani ba pura luaia bara Benjamín taika suldiarka nani ra 25,100 ikan.

³⁶ Baha kat Benjamín uplika nani ai dara walan, witin nani pat sip pura luras ba. Israel luhpia nani Benjamín uplika nani mawanra ai ninara kitwi auya kan tânka ba sika, ai uplika nani bâra yukuwi banhwi ba taki balbia taim Guibeá uplika nani mapara aiklabaia baha lamara wih, hilpka briaia dukiara.

³⁷ Baha yukuwi kan suldiarka nani ba Guibeá uplika nani dara walras kira tawan ra dimi, uplika nani ba sut sord ni ikan.

³⁸ Baha nani yukuwi banhwi kan nani aikuki lâ daukan kan, witin nani tawan ba ra dimi alki briaia bara kiasma tara kum dauki, Israel luhpia suldiar nani ra maisa pakaia win kan.

³⁹ Baha mita witin nani ai ninara tawi plapi baku dauki kan kiasma ba takka baman kaikaia luki, baha minitka wilwi tawi mahka aiklabaia baman kan. Benjamín uplika nani bui Israel luhpia nani ra nina bliki 30 waitna nani ikan, bara baha mita wala nani ba lukan naha yua sin kli witin nani bui pura luaia, tâura wal aiklaban pura luan ba baku nanara sin kli pura lubia lukan;

⁴⁰ sakuna baha dauki kan bara kiasma ba pat tawan ba wina taki kan, Benjamín kiamka nani ba kaikan tawan ba wina kiasma taki pauta klauhan ba kasbrika purara ba kat uli kan.

⁴¹ Israel luhpia nani witin nani ai mapara ai mawan wilbi kir lakan, bara wala nani ba kupia lap tiwan, sirang tara iwan sauhki tikan lâka tara ba pat witin nani ai purara aula ba dukiara.

⁴² Witin nani Israel luhpia nani mawanra upla iwras tasbaya kat plapan, sakuna sip plapi swakras kan, tawan bîla wina mapara bal takan nani ba mita baha nani yabalka ba praki kan.

⁴³ Israel luhpia nani ba witin nani ra kutbi bri nina bliki ikan, Menuhá wina Guibeá tawanka lalmika ba kat.

⁴⁴ Baku Benjamín kiamka suldiarka nani ba 18,000 ikan baha yua ra.

⁴⁵ Uplika wala nani kan ba upla iwras yabalka ra tawi plapi banhwan, Rimón walpaya ra waia yabalka ra, sakuna yabal ra baha nani ra sin 5,000 ikan. Sakuna Israel luhpia nani ba baha kat takaskras kau ban ai waihla nani nina blikan bara kau 2,000 wala ikan.

⁴⁶ Baha yua ra asla sut ba 25,000 Benjamín suldiarka kau pain nani kan ba ikan.

⁴⁷ Sakuna 600 waitna nani ba lika upla iwras tasbaya ra ban plapi wih Rimón walpaya untika ra dimi kati walhwal ba ra yukuwi kan.

⁴⁸ Israel luhpia nani ba witin nani ninara sin wan, baha nani sut skiru ni baman ikan tawanka kumi bani ra, daiwan nani ai kainara kan ba daiwra nani sin sut ikan bara tawan nani angkan.