Wihta Nani 19 - DAWAN BÎLA AISKA

Libait bara ai lila mairin wal

¹ Israel kau king kumi sin âpu kan ba yua nani ra, Libait kum Efraín ilka nani ba wina kau laihura iwi kan ba, witin Betlehem Juda wina mairin kum ai maya baku brin.

² Sakuna yu kumi mairin ba witin wal unsabi, ai kupia sauhkan, bara mahka Betlehem ra wih iwan. Kati walhwal ai aisika watla ra bâra kan.

³ Libait ba ai kupia ra lukan ai mairka ba mata ninara waia, wal aisi maisa nihki kli ai watla ra bri balaia. Bara ai albika waitna kum, biriku wâl sin ridi daukan bara ninara wan, bara mairin ba witin ra yamni brin ai aisika watla ra.

⁴ Aisika ba sin witin ra liliakira pali ai watla ra brin, bara Libait ra makaban ai watla ra witin nani aikuki takaskbia. Bara witin ai albika ba wal mairin ba aisika watla ra yu yumhpa takaski kan, bahara plun pih, lî dih, bara yapi kan.

⁵ Lapta walhwal alkan yua titanka ba, witin nani titan pali buan mahka ai watla ra waia dukiara. Witin nani mahka taki auya kan, bara mairin aisika ba bal win ai dapna ra win: —Plun bîlam kum pan pih yabal ra impaks, plun mai daukka swapma apia dukiara.

⁶ Witin wâlsut balan plun piaia bara lî diaia tibil ra, bara mairin aisika ba witin ra makaban kau yu kum ai lamara takaski, kau tihmia kum ai watla ra yapi si ra wabia.

⁷ Libait ba mahka waia pat buan kan, sakuna dapnika ba blikan daukras uba aisi kan, bara witin kli ban takaskan.

⁸ Yapra wala titan pat yu matsip titanka ba, Libait ba kli titan pali mahka buan ai watla ra waia, sakuna mairin aisika ba kli witin ra makaban plun wiria pan pi si wabia, apia kaka yabal ra swapbia; bara witin nani aikuki tibil ra iwan, bara plun pi kan impakaia piua ba luan.

⁹ Libait ba ban mahka waia buan, ai maya lila ba sin brih waia bara ai albika ba sin; sakuna dapnika ba kli witin ra win pat yu tutni sa, yabal ra tihmia alkbia, wabiara bara takaski baha tihmia kli bâra ai kupia kumi yapi si, yauhka titan kau puk ba ra bûi, ai watla ra wabia.

¹⁰ Sakuna Libait ba kau tihmia wala bâra takaski kaia brin daukras kan, bamna ai birikuka wâl satilka ba mangki, ai maya lila ba, ai albika sin brih mahka impakan. Jebús lama kat wan ba ra, baha sika Jerusalem,

¹¹ albika ba mita Libait ra win: —¿Man nahki lukisma naha tihmia yawan Jebús uplika nani tawanka ra nâra yapbia kaka?

¹² Libait ba pana win: —Israel luhpia apia tawanka ra takaskaia apia, Israel luhpia nani tawanka kat lika.

¹³ Kaisa impaki kaia Guibeá ra, apia kaka Ramá ra tihmia yapaia.

¹⁴ Bamna witin nani takaskras ban impaki kan, lapta sin pat dimuya kan Guibeá kat wan, Benjamín kiamka tawanka kum lamara.

¹⁵ Bara witin nani Guibeá ra waia yabalka ra diman bahara tihmia lalawaia. Tawan ra diman ba ra Libait ba iwaia pliska ra wih iwan, upla witin nani ra ai watla tâ yabaia âpu kan bamna.

¹⁶ Ban saiwi iwan ba kat, dama kum ai nasla wina aula kan, dama ba Efraín ilka nani tawanka wina tringsar Guibeá ra iwi kan, tawanka uplika nani sut ba lika Benjamín kiamka nani kan.

¹⁷ Dama impapakra nani ba iwaia pliska ra kaikan ba ra, witin nani ra makabi walan: —¿Man nani ani wina aulma, bara anira auma?

¹⁸ Libait ba pana witin ra win: —Yang nani Betlehem Juda wina aulna, Efraín ilka nani tawanka kum kau laihura pali bâra ba bahara waia impakisna, yang nani bahara iwisna. Betlehem ra wari kan, sakuna nanara waitla ra kli waia bal auna.

¹⁹ Birikuki nani pata twi lâwan brisna, mairki, albiki, yang nani pati piaia brisna: plun, wain, diara diaia sin sut brisna.

²⁰ Sakuna dama ba witin ra win: —Yang waitla durka ba man nani ra param sa. Man dîa want sma ba sut, yang maikamna. Brinki apia sa man nani naha tihmia nâra latara iwaia pliska ra lalawma.

²¹ Bara witin nani dama ba watla ra wan. Witin nani ai mina sikbi, plun pi bara lî di kan, dama ba lika daiwan nani ba plun dakaki kan.

²² Witin nani bâra ai kupia kumi ai âuyapah pali kan, bara waitna saura nani kulki tawan ba wina balan, dama watla ba kutban bara mahka watla durka ba prukan, bara dama ra win: —¡Baha waitnika nani mai kaikaia wamtla ra balan ba, latara sâks! ¡Yang nani witin wal yapaisna!

²³ Sakuna utla dawanka dama ba mita waitnika nani ra makaban: —¡Apia pali, upliki nani, du pali! ¡Naha saurka tara na man nani daukpara, waitnika na sika yang ai kaikaia impaki balan!

²⁴ Man nani kaiks, baku daukaia lukisma kaka, luhpi mairin tiara aihwa ba bâra sa, waitnika na maya lila ba sin bâra sa, man nani want sma kaka, baha nani bâra sa. Witin nani ba saki maikamna, witin nani wal man nani dîa daukaisma ba dauks. Sakuna naha waitnika na wal lika bahmuna warha lâka daukpara.

²⁵ Sakuna tawan waitnika nani ba dama aisi ba bîla walras kan, ban mapara karna aisi kan, bara Libait ai maya lila ba latara saki waitna nani ra yaban, bara baha waitnika nani ba mita mairka ba tihmia aiska saura munan, lalma kahbuya kat swin.

²⁶ Bara lalma kahbi kan, mairin ba dama ba watla ra kli balan ai maya ra waia, sakuna dur bîla kat kauhi pruan.

²⁷ Maya waitna ba titan pali buan mahka ai yabalka ra impakaia utla durka ba param sakan, bara witin kaikan ai maya lila ba dur ra dimaia bîla ba kat prawi kan, ai mihta dur un ra alki.

²⁸ Witin ai mairka ra win: —Bus, kaisa yawan mahka waia. Sakuna mairin ba pana diara aisaras kan. Bara witin ai maya wîna tara ai birikuka ra suni bara mahka ai yabalka ra impakan ai watla alkaia.

²⁹ Witin ai watla ra wan ba ra skiru brih ai maya lila wîna tara ba 12 pîs klakan, bara Israel tasbaya aiska ra wîna taman ba blikan.

³⁰ Bara upla sut baha wîna kaikan ba, aisin: —Israel luhpia nani Idsip wina bal takan ba yua wina, yawan nahmuna diara saura sâtka kau kaikras kan. Bamna naha dukiara diara kum daukaia luki kaikaia sa.