Wihta Nani 18 - DAWAN BÎLA AISKA

Micaías bara Dan kiamka nani ba

¹ Baha piua nani ba, Israel ra kau king âpu kan. Dan kiamka nani ba sin ai tasbaya pali kau briras, Israel kiamka nani tilara witin nani tasba kum pliki watauki kan.

² Bahamna Dan uplika nani tila wina Sorá bara Estaol tawanka wal wina, ai uplika nani waitna tânka kau pain aihwa bri ba matsip saki, Efraín ilka nani tawanka biki kaikaia blikan; bara witin nani Micaías watla kat wan, tihmia baha watla ra yapan.

³ Micaías watla lamara Libait wahma kum kaikan, witin nahki sturi aisi kan ba. Bara witin nani wih makabi walan: —¿Ya bui man nâra mai bri balan? ¿Man dîa daukisma naha tawanka ra? ¿Dîa pliki nâra taukisma?

⁴ Libait ba witin nani ra win Micaías witin wal lâ nani daukan ba, bara nahki muni witin bâra prîs aimaki kaia lâka daukan ba sin win.

⁵ Bara waitna matsip ba pana witin ra win: —Man, Dawan ra puram suni makabi wals, yang nani impakanki ra wataukisna na, maipa ra yamni baman takbia sapa.

⁶ Bara prîska bila witin nani ra win: —Man nani âmyapah was, ani anira wama ba Dawan kainam kahbi kabia.

⁷ Baha wina waitna nani matsip ba, mahka Lais tawanka tânka pliki kaikaia wan. Witin nani kaikan Lais uplika nani ba Sidón uplika nani iwi ba baku iwi kan, kupia kumi lâka ra, sâp lâka ra, upla wala nani wal war aiklabras kan, witin nani dîa want ba sut bri kan bara diara luha apia kan. Sidón uplika nani wina sin laihura iwi kan, kiamka wala nani ba wal aikuki sin bisnis briras kan bara bisnis daukras kan.

⁸ Bara waitna nani matsip ba kli tawi Sorá bara Estaol ra wan, ai uplika wala nani ba mita witin nani ra makabi walan: —¿Man nani impakankam ba dîa takan? Witin nani pana ai uplika nani ra win:

⁹ —Lais tasbaya aiska ba yang nani wapi kaikri, tasba painkira sa. Man nani mahka bûi impakaia sma. ¡Kaisa witin nani wal yawan aiklabaia waia! Man nani diara daukras nâra bahki baman iwi kapara. Yawan waia bara baha tasbaya uplika nani ba pura luaia sa.

¹⁰ Man nani baha tasbaya ra wama ba ra kaikma uplika nani ba diara tânka briras, ai kan kaikras, aihwakras sa, tasba tara brisa, diara sut aitani bâra brisa. Dawan tâm baikbia baha tasbaya briaia.

¹¹ Sorá bara Estaol wina Dan kiamka nani 600 waitna war aiklabaia dukia pain brih taki wan,

¹² bara witin nani Juda tasbaya ra wan, Quiriat-jearim muna tani ra ai kiampka bapan, nanara baha pliska nina ba Dan Kiampka mâkisa.

¹³ Ai kiampka bapan ba wina, witin nani Efraín ilka tawanka nani ra wan, bara Micaías watla kat wan.

¹⁴ Bara waitna matsip Lais tasbaya aiska wapi kaikan nani ba mita ai uplika wala nani ra win: —¿Nu sma man nani dîa? Naha watla ra prîs ‘‘efod’’ prâka kum nâra sa bara gâd nani sin bâra sa, dus wina karbi dauki silbar ni taya pura ba lalauban sa. ¿Man nani baha dukiara dîa lukisma?

¹⁵ Waitna matsip ba baku aisi bara witin nani ai mânka Micaías watla ra wan, Libait wahma ba lakula daukaia, bara witin nani ai lakula daukan.

¹⁶ Dan kiamka wala nani 600 waitna nani ba lika get lata tani ra aiklabaia dukia nani ba bri bara matsip ba lâ kaiki bâra kan.

¹⁷ Biki kakaira waitna matsip ba Micaías watla ra dimi, silbar lalaubi daukan gâdka bahki ba, prîs prâka ‘‘efod’’ ba bara gâd bahki wala nani ba sin saki brin, prîs wahma ba lika latara get lamara suldiar 600 nani ba wal aisi kan.

¹⁸ Prîs ba kaikan waitna matsip ba Micaías watla ra dimi silbar ni lalaubi daukan gâdka bahki ba, prîs prâka ‘‘efod’’ ba, gâd bahki wala nani ba sin saki brin ba, bara witin nani ra win: —¿Man nani bâra dîa daukisma?

¹⁹ Witin nani pana witin ra win: —Sâp bas, man sin kaisa yawan aikuki waia. Yang nani brin ai daukisa, prîs warkka ba man bara yang nani wal daukma aisiki kum baku. ¿Nahki sa man ra kanra yamni sa apia, prîs warkka ba Israel kiamka ba aiska kum wal daukaia, waitna kumi Israel kiamka watla bîla uplika nani kumi baman dukia dauki kaia ba wal?

²⁰ Baha aisin ba sut prîs ba lilia pali walan, bara gâd bahki ba, prîs prâka ‘‘efod’’ ba, gâd bahki wala nani ba sin sut brih witin nani wal nina blikan.

²¹ Baha wina witin nani ai mawan lakan bara mahka ai luhpia nani, ai daiwra nani, ai dukia nani sut brih ai kaina kat impakan.

²² Witin nani pat wihka wapi wan kan, bara Micaías ai uplika nani aikuki asla taki uplika nani ba nina blikan.

²³ Dan uplika nani ba walan upla nani ai pura wini witin nani ai nina bliki kan ba, bara ai nina ra tawi kaiki, Micaías ra makabi walan: —¿Man nani dîa trabil brisma? ¿Dîa muni ban karna winisma?

²⁴ Micaías pana witin nani ra win: —Yang gâdki nani mihti nani wal paski bri kapri ba, bara prîski ba sin, man nani brih auma, bara duki nani âpu ai dauki ai swisma, ¿bara kau ban kupias baku makabi walisma, man nani dîa trabil brisma?

²⁵ Sakuna Dan uplika nani pana witin ra win: —Yang nani puri winpara, upliki nani kupia baiwbia kaka, man tamya nani sut iki âpu mai daukbia.

²⁶ Micaías kaikan uplika nani ba uba ailal kan, bara swi si witin kli ai watla ra tawi wan; sakuna Dan uplika nani lika ai kaina kat ai yabalka ra impaki kan,

²⁷ Micaías paskan dukia nani ba sin brih, witin nani Lais kat wan. Baha uplika nani ai waihla nani mapara aihwakras ai âuyapah ai tawanka ra iwi kan, bara Dan kiamka nani ba mita baha nani sut sord ni baman iki bara tawanka sin angkan.

²⁸ Tawanka ba sika Sidón wina laihura kan, witin nani sin kiamka wala nani wal bisnis daukras kan, baha mita ya witin nani tâwan aimakaia ba sin âpu kan. Bet-rehob tawanka ilka bîla ra witin nani iwi kan. Baha ningkara tawanka ba Dan kiamka nani mita kli paski muni, witin nani bahara iwan.

²⁹ Blasi tawanka nina ba Lais mâki kan, sakuna nanara witin nani mita nina ba Dan mâkan, ai damika tara Jekob luhpia waitna Dan nina ra luki.

³⁰ Baha tawanka ra Micaías aidulka silbar ni lalaubi paskan ba watla daukan, bahara ai pura sunaia, bara Guersón luhpia Moses mulika, nina Janatan, witin nani ai prîska mangki brin. Baha wina Janatan luhpia nani sut ba, witin nani ai piua sut ra witin nani ai prîska aimaki kan, ban witin nani alba lâka ra brih wan piua ba kat.

³¹ Dawan ra pura sunaia watla ba Siló ra bâra kan, baha piua sut ba, bara gâdka bahki nani ba sin bâra ban kan witin nani ai tilara.