Wihta Nani 17 - DAWAN BÎLA AISKA

Micaías ai watla ra gâd bahki tempelka bri kan ba

¹ Efraín ilka nani tilara waitna kumi iwi kan, nina ba Micaías,

^2-3 baha waitnika ba ai yaptika ra ai dahra sakan: —Man silbarkam mâ 1,100 âimplikra bal implikan wisi bara implikan bâra ba, sakuna lalahkam ba yang implikri kan; bamna lalahkam yang brisna bara maikisna, kan yang walisna man aisisma baha lalahka ba Dawan ra yabram kan, gâd kum dus wina karbi dauki ba, baha taya purara silbarka ba ni lalaubaia. Bara lalahka ba witin ai yaptika ra yaban. Yaptika lalahka ba brin bara ai wingka tara puhbi aisin: —Luhpi, Dawan yamni mai munbia.

⁴ Micaías baha lalahka ai yaptika ra kli yaban ba ningkara, yaptika taki wan silbar ni diara papaskra waitnika kum ra, bara silbar mâ 200 yaban gâd bahki kum karbi paskaia, bara silbarka ba slilki taya pura ba lalaubaia. Baha paskbia ba ningkara, gâdka bahki ba Micaías watla ra bri si swibia.

⁵ Micaías ai watla ba pura sunaia watla bri kan. Witin sin prîs dimaia, ‘‘efod’’ pîska kum daukan, gâd bahki wala nani sin bri kan, bara ai luhpia waitna kumi ba sin prîs mangkan.

⁶ Kan baha piua ra sika Israel ra king âpu kan, bara upla kumi bani ba dîa daukaia luki kan ba, ai brinka ba kat dauki kan.

⁷ Betlehem tawanka ra wahma tringsar kumi watauki kan, Juda kiamka ba tila wina, witin ba Libait kum kan.

⁸ Baha wahmika Betlehem wina taki tawan wala kum ra iwaia pliki watauki kan, bara ban Efraín ilka nani tilara sin wapi watauki si Micaías watla ra wan.

⁹ Micaías witin ra makabi walan: —¿Man ani wina aulma? Wahma ba pana win: —Yang Betlehem wina aulma. Yang na Libait kum sna, bara anira iwaia tawanka kum pliki wataukisna.

¹⁰ Micaías bila witin ra: —Ban kaka nâra takaski, yang wal waitla ra iws. Bara man ba yang papiki pali baku, prîski aimaki kama. Mani kumi alkma ba ra, silbar mâ matawalsip mai aibapi kamna; baha purkara dimaikam kwala bara plun sin maiki kamna.

¹¹ Libait ba win, Micaías watla ra takaski iwaia, bara Libait ba witin ai luhpia pali kum takan.

¹² Micaías Libait ba ai prîska brin, bara prîs ba witin watla ra takaskan.

¹³ Micaías lukan nanara witin Dawan yamnika nani sut bri kabia, Libait kum ai watla ra prîs mangki bri ba mita.