Wihta Nani 16 - DAWAN BÎLA AISKA

Samson Gaza ra ba

¹ Yu kumi Samson kirhbi filisteo nani tawanka Gaza ra wan. Bahara rug mairin kum wal prawan, bara baha tihmika ba mairka ba watla ra yapaia wan.

² Gaza uplika nani walan Samson ba tawanka ba ra sa, bara witin nani tawan ba kutban; bara baha yua aiska aihwaki banhwi kan, tawan getka nani bani ra. Sakuna tihmia iwan ba ra witin nani yapaia wan, kan witin nani lukan titan yu baiwaia ra alki ikaia.

³ Sakuna Samson sika tihmia wâl bakriki kat baman mairin ba krikrika ra prawi kan. Baha wina buan bara tawan getka nani ba playa bapanka ba prakan kan ba playka ba sut aikuki daiki, ai pahpaya ra twilki Hebrón ilka mawanra il purara ba ra bri si sunan.

Samson bara Dalila

⁴ Baha ningkara Samson ba Dalila wal laik takan, Dalila lika Sorec ilka bîla ra iwi kan.

⁵ Filisteo wihtka nani matsip ba mairin ba ra wan bara witin nani Dalila ra naku win: —Samson ra kunin muni naku aisi makabi wals, ani wina ai karniki ba baku ban tara bri ba, tânka ba pliki wals; bara yang nani sin nahki dauki witin ai pura luaia sip sna ba, bara baku yang nani witin ba priski brimna, bara yang nani ra bawbia. Bara man baha warkka dauki wankma ba mana, yang nani kumi bani wina man ra silbar mâ 1,100 maikamna.

⁶ Bara baha piua wina mairin ba Samson ra win: —Pliskam pali, man ai wis ani wina karnikam ban baku tara pali brisma. ¿Natka kum bâra sa ki baku mai priskbia kaka, man baha wina sip lanhwi takma apia?

⁷ Bara Samson pana witin ra win: —Rup 7 kau pain lâwras ba ni ai priskbia kaka, karniki tara ba yang wina tiwbia, bara waitna wala nani baku takamna.

⁸ Bara filisteo wihtka nani matsip ba wina rup ba bri si Dalila watla yaban baha ni wilkaia.

⁹ Bara baha kainara witin tila waitna nani pat ai watla ra yukuki swin kan, ba mita witin karna winan: —¡Samson, filisteo nani mai priskaia aula! Samson pâli buan bara rup nani ba yuya sirpi baman dakban, kiwa aman dakbi baku. Bara filisteo nani Samson ai karnika anira bri ba tânka sip briras kan.

¹⁰ Dalila kli witin ra win: —Man bui yang ra kunin baman ai wiram. Kasak kunin ai munram. Nanara kli kunin ai munpara, anira karnikam brisma ba kaikan ai daukisa bara ai wis: ¿Dîa ni yang mai priskamna kaka, bara sip lanhwi takma apia?

¹¹ Samson kli witin ra win: —Witin nani kiwa raya kau yus munras ba ni ai priskbia kaka, yang karniki âpu, waitna wala nani wal baku takamna.

¹² Bara Dalila kli waitna nani ba ai watla ra dingki swin. Bara witin kiwa raya pali kau yus munras kan kiwka ba brih baha ni Samson ba priskan, bara ai bîla baikra karna winan: —¡Samson, filisteo nani mai priskaia aula! Sakuna Samson pâli buan bara kiwka ba trit dakbi baku dakbi âpu tikan.

¹³ Bara Dalila kli Samson ra win: —Kaiks man nahki kunin ai munisma ba, diara kasak ba man bui yang ra ai wiras sma. Ai wis: ¿dîa nahki mai priskamna ki? Samson kli witin ra win: —Man daukaia sma ba, tâiwa na kwala mangki awa 7 pitbaia sma, bara tâiwa ba kwala mamaika dusa ba ra pitbaia sma, bara dusa ba tasba ra karna bapi swiaia sma. Baku lika karniki ba tikamna bara waitna wala nani ba baku takamna. Bara Dalila Samson ba tasapi yaban yapan, bara kwala mamaia dusa 34 ba brih tâwa awa 7 ba baha ra pitban,

¹⁴ bara dusa ba tasba ra karna bapan. Bara Dalila ai pura winan: —¡Samson, filisteo nani mai priskaia aula! Bara Samson pâli buan bara dusa kata ba ip daikan, ai tâwa pitbanka nani ba sin sut lanhwan.

¹⁵ Bara Dalila kli witin ra win: —¡Kuninkira! ¿Man bui yang ra want sma ba nahki baku ai wisma? Naha kat man pat aima yumhpa laiwaska kikisma, bara nanara kat man kau kasak ai wiras sma ani wina karnikam tara brisma ba.

¹⁶ Dalila bui witin ra kli kli sturi aisi kan awar bani ra, baha sim makabanka ba baman makabi wali kan, bara Samson sturi walan baman krauhka takan bara mahka pruaia sin pain luki kan;

¹⁷ baku ba ra witin ban ai dahra yukuki kan ba saki, Dalila ra win: —Yang sika tâiwa na upla kau klakras pali aihwa sa, yaptiki kau ai baikras kan Dawan ai dukia nasariu baku kaia pat ai sakan kan. Witin nani tâiwa na klakbia kaka, yang karniki ba sut wîni wina taki wabia, bara yang sin waitna wala nani ba baku takamna.

¹⁸ Dalila ai dara walan witin nanara pliki sakan Samson anira ai karnika tara bri ba, bara filisteo wihtka tara nani ba ra ai bîla blikan maisa pakaia: —¡Nanara daira walisna dîa daukaia sna ba, man nani nanara bal, Samson ai win witin ai dahra ba anira witin ai karnika bri ba! Bara witin nani Dalila ra aibapaia lalahka ba ai mihta ra brih balan.

¹⁹ Dalila bui Samson ba yaban ai kuhma ra yapan, bara waitna kum winan balan, ai tâwa pitbanka 7 ba klakan. Bara witin mahka Samson ra saura munan,

²⁰ ai bîla baikra tara winan: —¡Samson, filisteo nani mai priskaia aula! Samson yapi kan ba wina rawi buan, witin lukan piua wala nani ra swak taki kan ba baku nanara sin kli swak takbia; sakuna witin ai dara walras kan Dawan bui witin ra pat lulki swin ba.

²¹ Bara filisteo nani bal alki ai nakra wâl ba daikan, bara Gaza ra brih wan, bahara bras sialaka ni priski silak watla ra mangkan, akbaia walpaya wilbi lakaika ba yaban akbi kan.

²² Ban sakuna, ai tâwa ba mahka kli pâwi kan.

Samson pruanka ba

²³ Filisteo wihtka tara nani ba asla aidruban, upla nani sin paiwan witin nani aikuki pura luan ba liliaka tara daukaia, ai gâdka Dagón ra sakripais dauki yabaia. Bara lawana ba naku aiwani kan: “Wan waihla Samson ba, yawan wan gâdka ba mita wan mihta ra mangkan.”

²⁴ Upla nani ba kaikan baha nani aiwani kan ba, bara witin nani sin naku aiwanan ai gâdka ba mayunaia: “Yawan wan gâdka bui wan waihla Samson wan mihta ra mangkan, wan nasla nani sauhki tiki wan uplika nani iki kata ba.”

²⁵ Bara witin nani ai âuyapah pali aihwa kan ba mita, makaban Samson ba sin silak watla ra ba saki bâra brih wabia, witin nani aikuki lilia daukaia. Bara witin nani Samson silak wina saki, witin nani ra brih wan, pulaia dukia kum baku witin nani ai mawanra mangki puli banhwi kan, bara utla karnika playa tara wâl ba lila kat yaban bûi kan.

²⁶ Bara wahma lupia Samson mihta tara alki kan ba wahmika ra witin win: —Playa tara wâl tempel tâ baiki ba lamara ai brih was, yang bahara alki wiria tâi baiki bûi kamna.

²⁷ Filisteo wihtka nani matsip ba sut tempelka bîla bâra kan, waitna nani bara mairin nani sin aibanhwan kan. Baha sut purkara upla wala nani 3,000 purara uli, baha wina Samson ra kaiki ai lilia bri kan.

²⁸ Bara Samson Dawan ra ai pura suni kan, witin naku win: “Dawan, yang bui man ra puri sunisni, kau naiwa aima kumi pan man bui yang ra luks, karnika aik filisteo nani naikra wâl daikan ba mana kau aima kum mana sakamna, naha na yui tnata kabia.”

²⁹ Witin baku aisi ai pura sunan ba ningkara, ai mihta kapi kaiki, baha tempel playka tara wâl utla karnika aiska alki bri kan ba, ai aihkika ra bara ai smihka ra alki brih,

³⁰ bara wini aisin: “Filisteo nani, naiwa yang wal prui tiwma.” Baha aisin ba ra witin ai karnika aiska playka nani ba platukban, tempelka aiska ba filisteo wihtka tara nani bara upla nani bâra kan ba sut purara. Samson ai pruanka yua ra upla kau ailal ikan, witin raya kan yua nani ra ikan ba wal.

³¹ Baku takan ba ra witin ai muihni nani bara ai taya nani bal ai wîna tara ba saki, Sorá wihki Estaol wal bilka ra bri si bikan ai aisika Manoa raitika ra. Samson 20 mani Israel luhpia nani wihta aimaki kan.