Wihta Nani 15 - DAWAN BÎLA AISKA

¹ Baha pâtka nani taki kan ba ningkara, plawar mâ pihwan krikaia piua aimakan ra, Samson guts lupia kum brih ai maya kaikaia wan. Witin ai maya watla ra wan, bara ai dapna ra win: —Yang mayi kaikaia balri, bara witin ai rumka ra dimaisna. Sakuna dapnika ba Samson ra apia win,

² bara witin dîa daukan sturka ba win: —Yang lukri man mayam ba mahka swiram, ba mita mayam ba man pâmnika kum ba wal maya baikri. Ban sakuna, luhpi mairin witin ai ningkara ba bâra sa; baha sin kau mairin painkira sa, bamna man bui witin ba mayam bris ai muihni almuk watlika ra.

³ Sakuna Samson pana witin ra win: —¡Nanara sika yang filisteo nani ra dîa munamna ba, yang pâtki apia kabia!

⁴ Witin mahka wan ba ra sikiski nani 300 alkan, bara awas lisban kum brih wâika kum wâika wala ba wal awas lisban ba kira praki wilkan.

⁵ Baha ningkara awaska ba mukan klauhan, bara daiwra nani kata ba filisteo nani plawarka nasla bilara lanhki swin. Bamna plawar mâ pihwan bara tilwan nani kata ba sut aman, wain kiwka nani oliv tangnika nani baiwi kata ba sin sut angkan.

⁶ Insla dawanka nani upla wala nani pliki makabi walan ya pali ba insla nani baku angkan ba. Upla nani ba win, Samson dapnika Timná wina ba mita ai luhpia mairin Samson maya kata ba, Samson uplika kum ra maya baikan; bara witin pana witin ra munaia dukiara wih insla nani ba angkan. Bara insla dawanka nani ba wih, Samson maya bara aisika watla sut angkan.

⁷ Witin nani baku daukan ba, Samson kaiki si bara witin nani ra win: —Man nani naku natka ra diara daukisma bamna, ¡yang swer takisna ris brimna apia, dîa munram ba baku pana sin yang mai munamna ba kat!

⁸ Bara Samson daiwan kraskira baku, witin nani wal aiklaban uplika nani ba sut sikniskira baman daukan. Baha wina witin Etam walpaya untika ra wih dimi takaskan.

Samson bara biriku kmakmaya ba

⁹ Filisteo nani war aiklabaia Juda ra wan, Lehi kat witin nani ai kiampka ba bapan.

¹⁰ Bara Juda uplika nani witin nani ra makabi walan: —¿Man nani dîa tâwan yang nani wal aiklabaia aulma? Witin nani pana witin nani ra win: —Yang nani Samson kutbi alkaia balri, witin bui yang nani ra ai munan ba mana aibapbia.

¹¹ Witin nani baha walan ba ra, Juda kiamka wina 3,000 waitna taki, Etam walpaya untika ra wan, bara Samson ra win: —Samson, ¿man kaikras sma ki, yawan filisteo nani mina munhtara sa, witin nani kau karna ba? ¿Bara man dîa muni witin nani ba yawan wal wan kakma tuskisma? Samson pana witin nani ra win: —Witin nani nahki praiska kat pana yang ra aibapan ba, pana sin baha kat yang bui witin nani ra aibapamni, kau pura luras.

¹² Witin nani pana Samson ra win: —Bamna yang nani balri na, mai alki mai priski, filisteo nani mihta ra mai mangkaia. Samson pana witin nani ra win: —Sakuna man nani bui yang ra swer taki ai wis, man nani mita lika ai ikaia apia.

¹³ Bara baha nani witin ra win: —Apia, yang nani mai ikamna apia. Bamna yang nani mai priski filisteo nani mihta ra mai mangkamna. Bara kiwa raya wâl saki baha ni Samson ba priski, bara walpa unta ba wina sakan.

¹⁴ Lehi ra brih wan ba ra, filisteo nani ba ai pura wini lilia pali bal takan, brih aula ba wal prawaia. Bara Dawan spiritka Samson ra iwan, kiwa raya ni ai klahkla ra ai mihta ra wilkan kan ba, kiwa aman baku dakbi yakaban;

¹⁵ bara biriku pruan kmakmaya kum kau pain pali lâwras kum bâra kan ba, baha brin bara baha ni filisteo nani 1,000 ikan.

¹⁶ Bara ningkara Samson aisin: “Biriku kmakmaya kum ni upla ailal pali paski swiri; biriku kmakmaya kum ni upla 1,000 ikri.”

¹⁷ Baku aisin ba ra kmakmaya ba lulki swin, baha mita baha pliska ba nina witin nani Ramat-lehi mâkan.

¹⁸ Bara Samson lî diran pali dauki kan, bara witin Dawan ra ai pura suni, naku win: “¿Nahki kan naha pura lui buaia lâka tara pali aikram na, bara nanara naha idanka nani na mihta ra ai swisma lî diran bla pruaia?”

¹⁹ Bara Lehi tasbaya ra unta kum bâra kan ba, Dawan bui pura param sakan lî baha wina takan, Samson baha laya kârma ba wina lî din, bamna kli ai kupia aimakan bara ai karnika brin. Baha mita baha laya kârma ba naiwa kat bâra sa bara nina ba En-hacoré mâkan.

²⁰ Samson 20 mani Israel luhpia nani wihtka aimaki kan, filisteo nani baha tasbaya wihtka aimaki kan piua sut ba Samson sin wihta kan.