Wihta Nani 14 - DAWAN BÎLA AISKA

Samson ai maya brin ba

¹ Yu kumi kan Samson Timnat tawanka ra wan, bahara filisteo mairka kumi ra ai nakra mangkan.

² Witin ai watla ra tawi wan, bara tiara ba tânka ai aisika bara yaptika ra win. Witin bila: —Du pali, Timnat ra filisteo nani tilara tiara kum kaikri ba yang brin ai daukisa, bamna brinki sa man nani wapniki daukma witin wal mayi takaia.

³ Sakuna ai aisika nani pana witin ra win: —Luhpi, ¿dîa muni man filisteo mairka idan nani ba tila kat wih, mayam briaia plikisma? ¿Yawan wan taya nani tilara bara Israel taika nani sut tilara sin mairin âpu sa ki? Samson pana win: —Yang baha tiara ba sika brinki sa, witin baha wal mayi takan ai daukisa.

⁴ Sakuna ai aisika bara ai yaptika sin baha tânka briras kan, Dawan mita Samson ra baku daukaia mariki bri tauki kan ba. Dawan baku ai yabalka pliki kan ba, baha tâka bâk filisteo nani mapara aiklabaia, kan baha piua Israel luhpia nani ba filisteo nani lâka munhtara taibi bri kan.

⁵ Bamna Samson ai aisa bara ai yaptika aikuki Timnat ra wan. Tawan ba lama mapa ra wain nasla bâra kan, baha kat Samson auya kan ba ra layan wahma kumi lawi bal takan witin ra alkaia.

⁶ Bara Dawan spiritka ba Samson ra iwan, witin waitna karna takan, ai mihta ni layan ba prak alki klahkla ba kuhma wal kalkan, guts luhpia kum ra alki kalki baku; sakuna witin baha daukan ba dukiara, ai aisa nani ra diara wiras kan.

⁷ Baha ningkara witin baha wina mahka wan, bara tiara laik kaiki ba wal sturi aisin.

⁸ Yu kum kum luan ba ningkara, Samson witin kli Timnat ra tawi auya kan, tiara ba wal ai maya takaia, kuna witin layan ikan ba kaiki lui waia dukiara, yabal ba wina wiria tnaya ra tawi wan; bara kaikan layan pruan ba purara nasma yula nani brami kan, bara wîna ba ra sin nasma yula dimi pat laya mangkan kan.

⁹ Witin ai mihta ni blaska nani ba sakan bara nasma laya ba saki brih, witin wapi di kan. Ai aisika nani aikuki prawan ba ra, witin nani ra sin nasma laya ba yaban din, sakuna witin nani ra wiras kan layan pruan ba wina baha nasma laya sakan ba.

¹⁰ Samson aisika wan tiara ba kaikaia; bara Samson witin ai maya takuya liliaka kum daukan, ai uplika wahma bara tiara nani ai tilara liliaka dauki ba natka kat.

¹¹ Sakuna filisteo nani ba Samson ra sibrin luki banhwi kan bamna, witin ai uplika nani 30 wahma paiwan kan aikuki bâra kaia.

¹² Baha 30 wahma nani ra Samson mita makabi walan: —Yang bui man nani ra dahra yukukan ba pliki sakaia sturka kum mamkabi walaisna. Wik kum piu maikaisna, tânka ba man nani mita param saki ai wiaia naha liliaka nani na tilara, bara tânka ai wima kaka yang wina man nani ra prâk bara traus sin maikamna, man nani kumi bani ra lilia yua ra dimaika kwalka nani ba.

¹³ Sakuna wik kum kat man nani baha dahra yukukan sturka tânka ba param saki ai wiras kama kaka, baha kwalka nani ba, marit liliaka ra dimaika kwalka nani ba man nani kumi bani wina yang ra aikaia. Bara witin nani sut Samson ra win: —Dahra yukuki aisin sturka ba aisas yang nani walamna.

¹⁴ Bara dahra prakan sturka ba Samson aisin: “Pi kata wina plun bal takan; karnakira kata ba wina damnira bal takan.” Yu yumhpa luan ba kat, witin nani baha dahra aisin tânka ba sip param saki wiras kan.

¹⁵ Bara yu walhwal kat witin nani sip apia kan, bara Samson maya ra wih win: —Man trai kaiks mayam sturi aisin dahra prakan tânka ba wali wan wiaia. Man baha wali wan wiras kama kaka, yang nani bui man, aisikam, yaptikam bara tamya nani ba sut pauta ni mai angkamna. ¡Man nani bui yang nani nâra ai paiwram na, naku dauki yang nani duki mihti dakbaia dukiara baman talia sa!

¹⁶ Bara mairin ba, ini ban Samson ra wan bara witin ra win: —¡Man bui yang ra latwan ai kaikras! ¡Misbara ai kaikisma! Man bui yang upliki nani ra sturi tânka karna kum tânka saki mai wiaia wiram, sakuna yang ra lika tânka ba param ai wiras kapram. Bara Samson pana witin ra win: —Baha dahra prakan tânka ba sika, yang papiki bara mamiki pali ra sin wiras kapri, ¿bara nahki man ra lika baha dahra prakan tânka ba mai wimna? Yang sip mai wimna apia.

¹⁷ Sakuna wik kum lilia dauki kan yua ba sut mairin ba Samson lamara iwi, baha sturka ba makabi wali kan, taibi pali makabi wali kan ban wik kum kat, bara Samson witin ra ban win. Bamna mairin ba wan bara sturka ba ai uplika nani ra win.

¹⁸ Wik kum alkan, baha yua kau dimras kan, filisteo waitna nani ba Samson ra wan bara win: “¡Diara wala âpu sa nasma laya purkara kau damni ba, bara daiwan wala layan ba wal kau karna âpu sa!” Samson pana witin nani ra win: “Man nani bîpki tiara mairin lupia ba ni tasbayam baikram, baha mita sika yang mamkabi walri ba pana ai wiram ba.”

¹⁹ Baha ningkara Dawan spiritka ba Samson ra iwan, bara witin waitna karna takan; bamna Ascalón ra wan, bahara 30 waitna ikan baha tawanka uplika nani ra. Bara baha nani kwalka nani ba ni 30 waitna nani ra aibapan, witin dahra prakan tânka makabi walan ba param saki win ba waitnika nani ra. Ban sakuna, witin ai kupia sauhki ai aisa watla ra wan,

²⁰ bara ai maya mairin kata ba, Samson pânika kum ra yan brin.