Wihta Nani 13 - DAWAN BÎLA AISKA

Samson aisubi takanka

¹ Sakuna Dawan kaikan Israel luhpia nani ba kli saura daukan, bara Dawan sin witin nani ba kli filisteo nani mihta ra mangkan 40 mani rausauhki kan.

² Sorá tawanka ra, Dan kiamka nani tilara waitna kumi bâra kan nina ba Manoa, ai maya ba luhpa kumi sin briras kan, witin biarapara kan bamna.

³ Sakuna Dawan insalka ba witin ra param takan bara win: “Man lika luhpa baikaia mairka apia kapram, sakuna nanara man kwihra tiwma bara luhpa waitna kum brima.

⁴ Sakuna man wain karna dipara bara diara wala laya karna sin dipara, plun tâski kulkan pata nani sin pipara,

⁵ man luhpa waitna kumi brima, bara witin tâwa ba klakpara, kan baha tukta waitna ba aihka sakan kabia Dawan warkka daukaia, Nasariu baku witin baiki sâkma ba wina pat tâwa ba yari kabia Dawan mihta ra pat mangkan kabia. Witin sika Israel luhpia nani ba filisteo nani mihta wina dakbi pri sakaia ba.”

⁶ Bara mairin ba ai maya waitna ra wih ki, naku win: “Gâd waitnika kum yang bâra kapri ba kat wan, yang ra kasak aisin, waitnika ba Dawan insalka talia kan. Yang mita lika makabi walras kapri witin ba ani wina balan, witin ba ya, bara witin sin pana ai wiras kan ai tânka ba.

⁷ Sakuna witin bui yang ra ai win ba sika, yang luhpa waitna kum brimna, baha mita nanara wina wain karna dimna apia, laya karna wala nani sâtka sin dimna apia, plun saura kulkan pata nani ba sin pimna apia, kan tukta ba Dawan warkka daukaia baman kabia nasariu baku. Tâwa sin klakamna apia, kan kau aisubi takras wina pat tâwa yari kabia, bara baha sin klakaia apia ban kabia witin prubia ba kat.”

⁸ Bara Manoa lika Dawan ra ai pura suni, win: “Dawan, yang bui man ra puri sunisni, baha waitnika ba kli yang nani ra blîks, bara witin wan wibia baha tuktika aisubi takaia ba wal yang nani dîa pali daukaia sna ba.”

⁹ Manoa makabanka ba Dawan walan, bara insal ba kli Manoa maya ra param takan, witin insla ra kan ba ra. Manoa lika baha piua âpu kan,

¹⁰ mairin ba ai maya ra plapi wan wiaia: —¡Wals, waitnika yang yua wala kaikatna ba kli yang ra balan!

¹¹ Bara Manoa ai maya wal waitnika ra wan, bara Manoa waitna ba ra sturi aisin: —¿Man sma ki mayi wal aisaram ba bisi? Bara waitna ba pana witin ra: —Âu, baha ba yang sna.

¹² Bara Manoa kli witin ra win: —Man bui yang nani ra ai wiram ba takbia ba ra, ¿yang nani bui tukta ba nahki pakaia sna ki? ¿Yang nani witin wal dîa daukaia sna ki?

¹³ Dawan insalka ba witin ra win: —Yang bui man mayam ra pat wîri man nani dîa daukaia sma ba, bara man nani baha kat dauks:

¹⁴ wain dibia apia, wain sâtka wala tahpla nani sin dibia apia, plun saura tâski kulkan pata ba sin piaia apia. Yang bui witin ra dîa daukaia wîri ba kat daukbia.

^15-16 Manoa tânka briras kan baha waitnika ba Dawan insalka kum witin ra balan kan ba. Bara witin waitna ba ra win: —Pliskam pali, yang nani wal nâra wiria takaski bas, yang nani guts lupia kum ikamna bara yawan aikuki baha pibia. Bara insal ba witin ra kli win: —Âu, yang ban man nani wal takaskamna kaka, sakuna patam ba lika pimna apia. Sakuna man sip sma baha gutska lupia ba aiska angki Dawan ra sakripais dauki yabaia.

¹⁷ Bara Manoa kli insal ba ra win: —Baku sa kaka, ¿man ninam ba dîa sa? Ninam ba pan ai wis bara piua kat man bui yang nani ra naha ai wisma na baku diara sut man bîlam aisinka kat bal takbia ba ra, yang nani tingki tara man ra maikamna.

¹⁸ Sakuna insal ba kli witin ra win: —¿Man dîa kan nini ba walisma? Yang nini tânka ba sika dahra prakan tânka kum sa, aihkakira sin.

¹⁹ Bara Manoa guts lupia ba, plun mâ nani sin wiria brin ba ra, walpa kum purara suni sakripais angkan Dawan mawanra. Bara Dawan diara aihkakira daukan, Manoa ai maya wal bâra bûi kaiki kan ba ra.

²⁰ Pauta klauhan ba altar wina purara ulan ba ra, Manoa kaikan Dawan insalka ba pauta klauhan ba bîla wina taki kasbrika purara uli wan. Bara witin nani ai mawan tasba kat kauhan.

²¹ Manoa ai dara walan, waitnika ba Dawan insalka kan ba; baha wina insalka ba witin nani kumi ra sin kli takras;

²² bara Manoa ai maya ra win: —Nanara lika yawan prubia, kan yawan wan nakra ni Dawan ba kaikan bamna.

²³ Sakuna ai maya mairin pana witin ra win: —Dawan ba yawan wan ikaia kan kata kaka, yawan sakripais dauki bara prisant sin yaban ba briaia apia kan, baku ba ra witin sin yawan ra naku diara aihka dauki wan marikaia apia kan.

²⁴ Ai piua nani balan ba ra mairin ba ai luhpia waitna kum brin, bara nina ba Samson mâkan. Tuktan ba pâwi kan, Dawan sin witin ra yamni munan.

²⁵ Yu kumi Samson Dan kiampka ra kan, baha ba Sorá wihki Estaol wal lilapas ra bâra kan, bara Dawan spiritka mahka witin ra param taki kan.