Wihta Nani 12 - DAWAN BÎLA AISKA

Jefté bara Efraín kiamka ba

¹ Efraín uplika kiamka nani ba witin nani asla aidruban war aiklabaia, bara Jordan awala ba Safón bâk puswi lui bara Jefté ra wih win: —¿Dîa muni man war aiklabaia waram ba, yang nani ra ai wiras kapram, man wal wan brih waras kapram Amón uplika nani mapara aiklabaia? Baha tâwan, yang nani bui man wînam tara bara wamtla ba sut pauta ni mai angkaia balri.

² Jefté pana witin nani ra win: —Yang bara upliki nani, Amalec aikuki unsabanka kum briri, bara yang bui man nani ra sin mai paiwri kan, sakuna man nani bal wan tâ baikras kapram.

³ Man nani bîlam kaikri balras kapram ba ra, yang rayaki ba prura ra tawri kan, Amón uplika nani wal aiklabaia wari, sakuna pura luaia karnika ba Dawan bui yang ra aikan. ¿Bara man nani nanara lika dîa muni yang wal aiklabaia aulma?

⁴ Witin baha aisin ba ra, Galaad uplika nani ba sut paiwan asla takan, bara Jefté Efraín uplika nani ba wal aiklabi pura luan. Efraín wina balan nani ba bui Galaad uplika nani ra win baha uplika nani Efraín bara Manasés wal tasbaya bilara iwi uplika nani ba, Efraín wina plapan uplika nani ra.

⁵ Galaad uplika nani ba mita Efraín uplika nani ba wina, Jordan awala puswi luaika yabalka nani ba dakbi brin, bara Efraín tila wina kum plapi swakwaia wisi wan ba ra, witin bui baha nani ra makabi walan, witin ba Efraín tawanka uplika sa sapa. Bara uplika ba bîla apia wibia kaka,

⁶ witin ra makabi win “Shibolet” aisabia, bara “Shibolet” aisabia kaka, kan natka wala sip aisaras kata, bara witin nani uplika ba pliska ba kat alki iki kan, Jordan awala puswi luaika nani ba kat. Bara baha yua nani tilara Efraín uplika nani ba 42,000 baku bîla aisinka ba wina nu taki ikan.

⁷ Jefté Israel luhpia nani pura wihtka 6 mani aimakan. Witin pruan ba ra, Galaad witin ai tawanka ra bri si bikan.

Israel wihtka nani wala yumhpa ba

⁸ Jefté pruan ba ningkara, Israel luhpia nani wihtka wala brin ba Ibsán, Betlehem wina ba aimakan.

⁹ Ibsán ai luhpia waitna nani 30 bara luhpa mairin sin 30 bri kan, luhpia nani sut ba upla kiamka wala nani aikuki maya baikan. Witin 7 mani Israel luhpia nani pura wihtka aimaki kan,

¹⁰ bara witin pruan ba ra, Betlehem ra bikan.

¹¹ Ibsán pruan ba ningkara Elón, Zabulón kiamka wina ba, witin mani matawalsip Israel luhpia nani purara wihta aimakan.

¹² Elón pruan ba ra Aialón ra bikan, witin kiamka nani tasbaya ra.

¹³ Witin ningkara, Abdón, Hilel luhpia Piratón wina ba, Israel luhpia nani wihtka aimakan.

¹⁴ Witin 8 mani wihta aimaki kan. Abdón ai luhpia waitna 40 bara ai mula nani sin 30 brin, baha nani kumi bani biriku kum uli kan.

¹⁵ Witin pruan ba ra witin nani Piratón ra bikan. Piratón ba Efraín tasbaya, Amalec ilka nani tilara sa.