Wihta Nani 11 - DAWAN BÎLA AISKA

Jefté wihta aimakan

¹ Jefté ba tahplu waitna kum, Galaad uplika nani tasbaya ra iwi kan. Witin ba rug mairin luhpia kan, papika nina ba Galaad,

² Galaad maya ba sin, Galaad luhpia waitna wala nani sin baikan kan. Baha nani pâwi waitna takan bara ai muihni Jefté ba ai aisika watla wina kangbi sakan. Bara win: “Man sip yang nani wal baku aisiki prapatika dawanka takras, yaptikam ba mairin wala bamna.”

³ Bara Jefté ai muihni nani tila wina plapan bara Tob tasbaya ra wih iwan. Bahara witin waitna bahki, wark takras sringwaskira aikuki dakni kum asla taki aikuki yabal ra upla bîla aihwaki aiklabi dukia nani impliki tauki kan.

⁴ Pat piua wiria luan kan ba ra, Amón luhpia nani ba Israel luhpia nani mapara war aiklaban.

⁵ Bara Galaad ra wihta kan ba mita, Jefté mata Tob ra upla blikan, witin ba paiwan bal witin aikuki aisabia.

⁶ Blikan uplika nani ba wan bara Jefté ra win: —Bal, yang nani mai paiwisna man wan tilara war wihta aimakma, bara yawan aikuki Amón luhpia nani mapara aiklabaia waia.

⁷ Jefté pana witin nani ra win: —¿Man nani bui yang ra misbara ai kaikram apia, papiki watla wina sin taibi ai muni ai kangbi ai sakram ba? ¿Dîa kan nanara man nani trabil ra sma ba ra ai pliki aulma?

⁸ —Baha mita sika, yang nani trabil ra dimri ba mita sika nanara man ra mai pliki aulna na —witin nani Jefté ra baku win—. Yang nani brin ai daukisa man waia, yawan aikuki Amón uplika nani mapara aiklabaia, man bui Galaad uplika nani sut ba tâura war wihtka aimakaia.

⁹ Bara Jefté witin nani ra win: —Man nani baku brin mai daukisa kaka, man nani wal waia Amón uplika nani ba mapara aiklabaia pura luaia karnika ba Dawan wina aikbia kaka, baku lika yang na man nani wihtkam aimakamna.

¹⁰ Wihta nani ba witin ra pramis takan: —Dawan ba yang nani witniski sa, yang nani dîa daukaia mai wîri ba kat daukamna.

¹¹ Bara Jefté witin nani aikuki wan, bara tawan uplika nani mita ba witin ra witin nani ai wihtka tara mangkan, war aiklabaia wihtka sin mangkan. Mispá kat wan ba ra, Jefté witin dîa aisin ba baku, kli Dawan ra aisin mawanra.

¹² Baha ningkara Jefté, tila wina upla nani saki ai bîla smalki blikan wan, Amón uplika nani kingka ra wih wiaia. Witin nani bui witin ra makabi walan: “¿Man dîa tâwan yang maipara buisma, bara bal kuntriki mapara aiklabaisma ba?”

¹³ Bara Amón uplika nani ba kingka bui blikan bîla nani ba, uplika nani ba ra win: “Man nani, Israel luhpia nani, Idsip wina bal takram ba ra, yang nani tasbayi nani ba wan mihta dakbi briram, Arnón awala ba wina Jaboc awala kat, bara Jordan awala nani sin. Baku bamna nanara man nani, kupia kumi lâka wina tasbaya nani ba kli aiki banhs.”

¹⁴ Bara Jefté kli upla wala nani sakan, ai bîla smalki, kli Amón uplika nani kingka ra wiaia blikan,

¹⁵ bara naku ai bîla blikan: “Jefté naha bîla nani pana mai wiaia yang nani ai blikan: Yang nani Israel luhpia nani, man nani tasbayam nani ba yang nani bui mihtam wina dakbi briras, Moab kiamka tasbaya, Amón kiamka tasbaya nani sin apia.

¹⁶ Yang nani Idsip wina taki balri ba ra, upla iwras tasbaya ba wina yang nani Kabu Pauni luri, baha wina Cadés ra yang nani wari.

¹⁷ Cadés wina yang nani Edom kingka ra upla nani saki bîli smalki blikri, witin ra makabaia adar wankbia, yang nani Edom tasbaya bâk lui waia, sakuna king ba yang nani ra adar wankaia apia win ai tasbaya bâk lui waia. Bara yang nani bui Moab kingka ra sin makabri, sakuna witin sin yang nani ra adar aikras kan ai tasbaya bâk lui waia. Baha mita yang nani ba Cadés ra takaskri.

¹⁸ Baha wina, yang nani ban upla iwras tasbaya ra watauki kapri, bara Edom tasbaya nani lamak, Moab tasbaya nani lamak sin. Bara ban Moab tasbaya lalma tani ba kat yang nani wari. Bahara tintki watla bapri, Arnón awala un kat. Sakuna yang nani awala baila wala ra lika luras kapri, kan baila wala ba lika Moab tasbaya piarkika bamna.

¹⁹ Bara baha wina yawan upla nani saki, wan bîla blikan Sihón ra, amorreo nani kingka, Hesbón ra iwi kan ba ra, witin ra makabaia adar wankbia witin nani ai tasbaya bâk yang nani lui waia wan tasbaya ra.

²⁰ Sakuna yawan Sihón ra aisin ba, witin sip kasak lukras kan, bamna adar wankras kan ai tasbaya bâk lui waia. Witin baha sturka walan ba ra, ai suldiarka nani ba ridi daukan, Jahas ra wan, Israel luhpia nani mapara war aiklabaia.

²¹ Bara Dawan, Israel Gâdka ba, ai uplika nani ba tâ baikan bara pura karnika ba yaban. Bara witin nani aiklabi Sihón suldiarka nani sut pura luan, bara baku witin nani bui amorreo nani tasbaya nani sut dawanka takan, witin nani tasbaya ra:

²² Amorreo nani tasbaya nani ba sut yang nani dakbi briri, Arnón awala ba wina Jaboc kat, kli upla iwras tasbaya ba wina Jordan awala ba kat.

²³ ¿Bara nanara man mita yang nani na naha tasbaya wina wan lulki wan sakaia lukisma, Dawan mita amorreo nani mihta wina dakbi yang nani ra aikan ba?

²⁴ Man gâdkam Quemós diara man ra maikan ba, baha man dukiam kulkisma, ¿baha rait apia? Dawanki naha tasbaya na yang nani ra aikan, bamna tasbaya na tasbayi kulkisna.

²⁵ ¿Dîa, man lukisma Balac, Moab kingka, Sipor luhpia ba wal, man kau tara sma kulkisma ki? Baku kaka pain, sakuna witin bui yang nani maipara bal taki aiklabras kan.

²⁶ Pat mani 300 nani Israel luhpia nani, Hesbón Aroer ra iwisa, tawan sirpi nani lamara bara sin tawan tara nani Arnón awala un ra bâra ba nani sut ra sin iwisa. Baha nani sut ba tilara, ¿dîa muni man nani pat tasbaya na tâwan aisaras kapram?

²⁷ Yang bui man ra diara saura kumi sin mai munras. Sakuna man sika saura daukisma, wan mapara aulma wan aiklabaia. Sakuna Dawan ba sika wan wihtka ba, bamna witin lika Israel luhpia nani dukiara, baku sin Amón luhpia nani dukiara lâ daukbia.”

²⁸ Jefté baku ai bîla blikan ba, Amón uplika nani kingka ba baha sut walan, sakuna witin baha bîla nani ba kulkras kan.

Jefté pramiska ba

²⁹ Dawan spiritka ba Jefté purara balan, bara witin Galaad bara Manasés kir taukan bara Mispá Galaad ra ba kat wan, Amón luhpia nani tasbaya ba kutbi alki aiklabaia dukiara.

³⁰ Sakuna Jefté tâura naha pramiska Dawan ra daukan: “Amón uplika nani aikuki aiklabi pura luaia karnika Dawan aikbia kaka,

³¹ yang war wina kli tawi balamna ba ra, ya pas tâura yang waitla bîla wina taki yang ra balbia ba laikula daukaia, uplika ba aiska angki, sakripaiska dauki maikamna.”

³² Jefté Amón uplika nani tasbaya kutbi alki brin bara aiklaban, bara Dawan bui witin ra pura luaia karnika ba yaban.

³³ Jefté ai waihla nani manis ikan, bara tawan tara nani 20 dakbi brin; tilara tawan tara nani yumhpa kan: Aroer, Minit bara Abel-queramim bilka ra bâra kan. Baku natka ra Israel luhpia nani ba Amón uplika nani ra ai mina ni taibi brin.

Jefté ai luhpia mairin sakripais daukan ba

³⁴ Jefté kli ai watla Mispá ra tawi wan ba ra, ai luhpia mairin kumi baman bri kata ba, utla wina liliakira miusik puli bara dans puli bal takan witin ai lakula daukaia. Witin ba ai luhpia wala nani kau âpu kan, ai luhpia mairin ba baman kumi lal kat bri kan.

³⁵ Jefté ai luhpia mairin aula ba kaikan, bara sari lâka tara tukinka natka kat ai prâka ba kalkan bara witin ra win: —¡Ay, luhpi mairin, man sari lâka tara kum aikuma na! ¡Man pali bui kupi sarka lâka tara paskuma, yang sika Dawan wal pramis takri sa, bara yang dîa daukaia wîri ba dukiara bîli kat daukaia sna!

³⁶ Luhpia mairin ba, pana witin ra win: —Aisiki, dîa daukaia Dawan wal pramis takram ba, bîlam kat yang wal dauks, witin ai bîla mai win ba kat man wal pat daukan, war aiklabi pura luaia karnika ba maikan, waihlam Amón uplika nani pura luram.

³⁷ Witin naha baman makaban ai aisika witin ra dauki yabia: —Kati wâl baman wirâ yakan ai swis, bara yang tiara taihkia nani ba aikuki il nani tilak impaki sairka brih ini taukamna, yang kau marit takras kapri ban pruna ba dukiara.

³⁸ Jefté witin ra kati wâl taim yaban, baha yua nani tilara witin il nani tilak wapi, sari brih ini watauki kan, tiara wala nani ba aikuki. Ini kan witin marit takras ai kiamka sakras ban pruya ba dukiara.

³⁹ Kati wâl aimakan ba ra, witin kli ai aisika ra ai watla ra balan. Bara witin Dawan wal pramis takan ba kat daukan. Bara Jefté luhpia mairin pruan, tiara sunu aihwa, waitna tânka kaikras pali.

⁴⁰ Baha mita baha takan ba wina, Israel luhpia nani tilara natka kum brin: mani bani mairin tiara nani ba Jefté luhpia mairin dukiara luki, yu 4 sarka brih ini kaia.