Wihta Nani 10 - DAWAN BÎLA AISKA

Tolá wihta aimakan ba

¹ Abimélec ningkara, Isacar kiamka wina kli waitna wala kum bal takan nina Tolá, witin aisika nina ba Puá, damika nina ba Dodó; witin buan Israel luhpia nani ba pri sakaia dukiara. Tolá Samir ra iwi kan, Efraín ilka nani tilara,

² bara witin 23 mani Israel luhpia nani wihtka aimaki kan, pruan ba kat, bara Samir ra bri si bikan.

Jaír wihta aimakan ba

³ Tolá ningkara Jaír Galaad wina ba bal takan. Witin sin 22 mani Israel luhpia nani wihtka aimakan.

⁴ Witin ai luhpia waitna nani 30 bri kan, baha nani 30 ba biriku ra uli kan, kumi bani tawan kum brih iwan Galaad kuntrika ra. Baha 30 tawan nani ba naiwa kat kau ban ‘‘Jaír tawanka nani ba’’ nina mâkisa.

⁵ Jaír pruan ba ra, Camón ra bikan kata.

Amón uplika mita Israel ba ai lâka ra taibi brin

⁶ Sakuna Dawan kaikan Israel luhpia nani ba kli saura daukan, gâd bahki Baal bara Astarté wal lilka nani sât sât ba ra kau ai pura suni banhwi kan, baku sin Siria, Sidón, Moab, Amón bara filisteo nani gâdka nani ba sut ra ai pura suni banhwi kan. Witin nani Dawan mayunra lulki swin.

⁷ Witin nani Dawan ra mayunras lulki swin ba mita, Dawan sin witin nani ra ai kupia sauhkan, bara filisteo nani bara Amón uplika nani lâka munhtara swin.

⁸ Dawan mita witin nani ra swin ba piua wina, 18 mani filisteo nani bara Amón uplika nani ba bui Israel luhpia nani ba taiban lâka ra saura pali rausauhki kan Galaad ra, Jordan awala baila wala ra iwi kan uplika nani ba, amorreo nani tasbaya ra.

⁹ Amón uplika nani ba Jordan awala ba lui wan Juda, Benjamín bara Efraín kiamka nani ba mapara war aiklabaia, bamna Israel luhpia nani sari lâka tara pali ra swin kan.

¹⁰ Bara baha piua kat Dawan hilpka makabi ai pura sunan. Witin nani naku Dawan ra makaban: “Dawanki, yang nani mampara saura daukri, kan yang nani bui man ra mai lulki mai swiri, gâd bahki kuninkira nani ra puri suni mayunaia dukiara.”

¹¹ Bara Dawan pana witin nani ra naku win: “Man nani ba Idsip uplika nani, amorreo nani, Amón uplika, filisteo nani,

¹² Sidón uplika nani, Amalec uplika nani bara Madián uplika nani sut ba man nani ra mai taibi mai bri kan; sakuna man nani bui yang ra karna winram ba ra, baha mihta wina pri mai sakri.

¹³ Baku man nani ra swaki mai sakri, sakuna man nani ban yang ra ai lulki ai swiram gâd wala bahki nani ba mayunaia dukiara, bahamna yang kli man nani swaki mai sakamna apia.

¹⁴ Man nani bui gâd bahki nani bâk saki briram gâdka nani ba ra was, witin nani ra hilp makas. Baha nani swaki mai sâkbia sari lâka ra dimram ba wina.”

¹⁵ Israel luhpia nani pana Dawan ra win: “Yang nani saura daukri. Bamna dîa man kupiam lâka kat yang nani wal daukaia brin mai dauki ba kat dauks; sakuna yang nani puri sunisni, naiwa man bui yang nani swaki ai sâkma.”

¹⁶ Bara witin nani idan gâdka bahki nani ba mahka ai tila wina slingbi saki si Dawan ra mayunan, bara Israel luhpia nani pât wahwi ba kaiki, bara Dawan kau ban sip ai kupia karna daukras kan.

¹⁷ Amón kiamka nani ba Israel luhpia nani wal aiklabaia ai kiampka Galaad ra bapan. Israel luhpia nani sin ai kiamka Mispá ra bapan.

¹⁸ Israel luhpia nani Galaad ra iwi kan ba, wihta nani kan ba, witin nani ai tilara pana pana makabi wali kan, ya pas Amón kiamka nani ba mapara aiklabaia tâura aimakbia ba, Galaad uplika nani wihtka mangkan kabia win.