Sofonías 3 - DAWAN BÎLA AISKA

Jerusalem saura daukanka bara atki sakanka ba

¹ ¡Jerusalem tawanka tara, mapara babura ba, upla tataibra taki tâski takan ba, sarka pali ai daukisa!

² Witin ba Dawan bîla baikra ba walan daukras sa, ai saurka nani wina wapni takaia sin brin daukras sa, witin ra kasak lukras kan, ai Dawanka ra plikras kan.

³ Wihta tara nani ba layan baku uhbisa; wihta sirpi nani ba yul kraskira plun dauki kan, wîna dusa sut pi ba baku sa, yauhka dukiara dusa kum pan swiras.

⁴ Ai dahra aisasarika nani ba, saura daukisa kunin lâka ra; ai prîska nani ba, Dawan lâka kriki bara Dawan wal prawaia watla holi ba bahki lâka ra daukisa.

⁵ Sakuna Dawan baha tawanka tara bilara sa; witin yamni baman daukisa, saura lika apia. Titan bani ai piua kat ai lâka ba bapisa, ban sakuna, saura dauki nani ba ai swira lâka ba tânka sin briras.

⁶ Dawan kasak aisisa: “Yang nisan nani ba âpu daukri, tawerka nani, tawanka kutbanka nani ba sin slingbi âpu daukri, bara tawanka yabalka nani bîla ba, upla iwras yabalka daukri. Upla kumi sin bâk lui waia apia daukri. ¡Tawanka tara ba bîla man swin, upla kumi sin bâra âpu!

⁷ Yang klala yabri ba mita lukri: ‘Jerusalem ba yang ra siaibribia bara watawi dauki ba mahka swibia; baku yang bui witin nani slingbi sauhkaia apia kapri.’ Sakuna witin nani kau istikira saura lâka sâtka nani sut ba daukan.

⁸ Baku ba mita, man nani baha yua bîla kaiks, yang bui man nani mampara aisaia kamna ba. Yang, Dawan, kasak aisisna: Pat kupi wal aisari, nisan nani sut, king tasbaya nani sin sut asla dauki, lawanki ba witin nani purara laikamna, kupi baiwanka laptika ba. ¡Kupi baiwan pâta klauhanka ba wal, tasba aiska ba sauhki swimni!

⁹ “Baha yua ba balbia ba ra, upla nani ba kasakka tânka bîla nani baman aisaia daukamni, bara upla sut yang ra ai pura sunbia, upla sut kumi baku warkki daukbia.

¹⁰ Upliki nani Etiopía awala baila wala ra yakaban nani ba, baha wina prisantka nani brih, ai pura suni bri sal aikbia.

¹¹ Baha piua ra, tawanki, man lika yang maipara bûi diara saura nani daukram ba, baha dukiara man nani swiram lukma apia. Man nani tilam wina prautkira pura luan dauki nani ba sakamni, bara yang ilki holikira ra, man nani kli pura luan lâka daukma apia.

¹² Upla bawikira, ai lukanka ra umpira nani ba, tilamra swimna, yang nini kat luki ai kasak lukanka ba mangki bribia.

¹³ Israel luhpia nani pruras kan ba, witin nani diara saura daukbia apia, kunin sin aisabia apia; ai bîla kunin lâka ni banhki kabia apia. Upla kumi ra sin sibrin lukras ai pata pi ris bri kabia.”

Jerusalem lilia taki aiwanaia lawana

¹⁴ ¡Saion tawanka tara, aiwans! ¡Israel luhpia nani, bîlam baikra liliakira wini bin dauks! ¡Jerusalem uplika, liliam bas, kupiam aiska ni liliam bas!

¹⁵ Dawan pât ra mai lakaia mampara aisin ba kli swin, bara waihlam nani ba kangbi sakan. tilamra sa; Dawan, Israel kingka, man nani bara diara saura kumi sin sîa yama apia.

¹⁶ Baha piua ra Jerusalem uplika nani ra wibia: “¡Saion uplika nani, si bripara, wark taki bas!”

¹⁷ Dawan, man nani Gâdkam, man nani tilamra sa. ¡Witin karnika sut pali brisa, bamna swaki mai sâkbia! Dawan ba man nani dukiamra ai âuyapah kabia. Ai latwanka lâka ni upla raya mai daukbia; bara witin ai liliakira aiwanbia

¹⁸ lilia tara dauki yua ra aiwani ba baku. Dawan kasak aisisa: “Swiram dauki saura mai munaia luki ba wina, dakbi mai sakamni, swira lâka nani puramra kahbi ba wina sin.

¹⁹ Baha piua mai taibi bri nani sut ba mapara buamni. Sîpki prutwi nani ba tâ baikamni, bara aimawahki nani ba sin asla kukamni; tasba aiska ra witin nani ai nina ra yamni kulki mayuni aisaia daukamni bahki kulkan kan lâka ba wina.

²⁰ Baha piua ra, man nani sut kli mai bri balamni, asla mai daukamni. Tasba ra upla nani sut bâra ba tilara man nani iwankam natka ba lakamni yamni mai kulkaia ra, bara kulkanka yabamni bara rispikka lâka sin. Yang, Dawan, baku aisisni.”