Smasmalkra 5 - DAWAN BÎLA AISKA

Pramis munisma ba daukaia sma

¹ Gâd watla ra auma ba ra, man daukankam ba main kaiks; taniskira nani baku sakripais daukpara, witin nani sinskas lâka ra ai tânka briras sa saura dauki ba, lamara bal bîla wali dauks.

² Aihni daukpara, bîlam wal sin apia, lukankam wal sin apia, Gâd ra pramis takaia wipara, kan witin ba kasbrika purara sa, man lika tasba ra sma bamna. Baha mita, man sturi wiria baman aisas, dîa sip sma ba kat.

³ Kan diara ailal lukan tâka mita, yaprisauhkan saura nani kaikisa, bara ailal aisi ba bâk sturi tanis nani aisisa.

⁴ Gâd ra pramis munma ba ra, piua wihka takaskpara daukaia, kan witin kupia lâka apia sa taniskira ba. Dauks pramiskam ba kat.

⁵ Kau yamni sa pramis munaia apia, pramis muni daukras kaia wal.

⁶ Yabrika bîlam mita saura daukaia ra mai brih wabiara, bara ningkara kra wima, Gâd blikan uplika ra tânka briras mita daukras. ¿Dîa muni yaka Gâd ai kupia sauhkbia, bara paskram ba sauhki tikaia?

⁷ Baku bamna yaprisauhkan saura nani bara sturi ailal nani; bara diara tânkas nani tilara, man Gâdkam ra bawikira bara kulkanka yabaia sma.

Rayaka mapara aisinka nani ba

⁸ Aihka lukpara, kuntri kum mita umpira nani ra taibi brisa kaka; bara karna lâka munisa, kasak lâka bara raitka lâka ra sin; kan war tâ uplika kum, wala kau tara ba mita pura prakisa, bara kau purara tâ aimaki ba mita wâlsut ra pura prakisa.

⁹ ¡Bara baku nina yabisa kuntri pâwanka, bara king ba insla nani warkka dauki kabia!

¹⁰ Ya lalah ra latwan kaiki ba, piu bani ra kau want plikisa, bara ya diara kukan lihki ba, aima kumi sin lukras sa, witin aitani bri ba. Naha sut ba bahki baman sa,

¹¹ Kan ya kau bri ba, kau tikisa. ¿Dîa yamni sâkbia, diara nani bri ba wina, dukia nani ba ra kaiki kaia ba wal?

¹² Wark tatakra ba, ailal pibia wiria pibia kra ai âuyapah yapisa, kuna yuyakira ba, ai kukanka mita yan sip ai âuyapah yapras.

¹³ Sari lâka tara pali, naha tasba ra kaikri ba sika, kukanka tara pali paski kaia; baha ba ai dawanka ra sauhki tikisa.

¹⁴ Kan wark saura daukbia ba wal sip sa, baha kukanka sut tikaia; bara witin luhpa kum bribia kaka, ningkara diara swiaia âpu kabia.

¹⁵ Bara nahki naha tasba ra balan ba baku, ai yapti biara wina balan ba baku wabia, kwala luha, ai mihta warkka mana brih waras pali.

¹⁶ Naha sut ba sarka lâka tara pali sa; tasba ra nahki balan baku kli tawi wabia. ¿Bara dîa yamni kum sakan, wark ailalka takan ba wina?

¹⁷ Baha sut purkara ai rayaka ba lui wan sa, tihmu tara ra, kupia kriwan ra, latwan, umpira lâka baman.

¹⁸ Yang tânka briri, diara kau yamni ba sika piaia, diaia, bara liliaka briaia warkka ba mana, naha tasba ra, Dawan bui wan piua prahni wankan ba tilara, kan baha sika wan sirka sa.

¹⁹ Diara wala ba, baha nani sut ra Gâd mita kukanka bara yamnika yabi ba, karnika sin yabisa baha wina piaia bara diaia, witin ai dukia ba; baha sut ba Gâd prisantka sika.

²⁰ Bara Gâd mita ai kupia lilia ni banhki ba mita, ai rayaka dukiara uya mangki lukras.