Sins Lâka 8 - DAWAN BÎLA AISKA

Sins lâka upla sut mawanra aisi ba

¹ Sins lâka ba, ai bîla baikra tara saki winisa; diara tânka bri ba, bîla baikra yan walisa.

² Wih il purara nani ra buisa, yabal bîla nani kilwi ba kat witin buisa.

³ Get lamara kat witin bîla baikra tara saki winisa, tawan ra dimaia ba kat:

⁴ “Upla nani, man nani ra auya naha bîla yang aisanki ba.

⁵ Sins tânka aitani briras wahmika bara taniskira nani, ¡lan taks, tânkira watauki kaia bara aman damra walaia ba!

⁶ Yang dîa aisaisna ba wals diara nani tânka tara bri ba bara kasak nani aisaisna ba,

⁷ yang dîa aisaisna ba kasak sa, kunin aisaia ba want apia sna.

⁸ Yang bîli aisanka nani sut ba kasak lâka sa; witin ra kunin sirpi wiria sin âpu sa.

⁹ Sins lâka bri ba bara aman ai dara wali nani ba mapara, yang bîli aisanka ba param sa bara kasak sa sin.

¹⁰ Silbar bara gul painkira briaia watlika ra, smalkanka ba bara tânka briaia lâka ba pliki bris.”

¹¹ Sins lâka ba, walpa klauhira manakira nani wal kanra yamni bamna, ¡diara nani sut sin yawan pain kulki ba, baha wal prakaia dukia apia sa!

¹² “Yang, sins lâka sna, sins tânka ba wal utla kumi bilara wal asla iwisna, bara sins smalkanka kau yamni nani wal prawaia ba nu sna.

¹³ Dawan ra kulkaia lâka tânka ba lika, saura lâka ra misbara kaikaia ba sika yang misbara kaikisni, praut lâka ba bara tara pulan lâka ba ra sin. Yabal saura ba bara kunin aisaia lâka sut ba saura kaikisni.

¹⁴ Wark daukaia tânka ba yang ra sa, bara baha daukaia ba sin, yang sika wapni daukaia lâka, karnika sin.

¹⁵ Yang ra sika tingki ai wiaia sa, king nani king aimaki ba, wihta tara nani sin ai raitka ba, adar nani sin ulbi ba.

¹⁶ Yang ra tingki wiaia sa, wihta nani ba wisa, bara lalka tara nani ba lâ nani kahbisa,

¹⁷ latwan ai kaiki uplika nani ra, yang mita latwan kaikisni; bara ya nani ai pliki ba ai sakisa.

¹⁸ Yang yabisna diara kukan manis briaia bara mayunra ba sin, mayunra tara bara pâwanka sin.

¹⁹ Yang yabisna dukia ba lika kau yamni sa silbar kau painkira ba wal, yang yaia wisna ba kau yamni sa, silbar painkira ba wal.

²⁰ Yang yabal wapni bâk auna kasak lâka yabalka bâk.

²¹ Yang ra, latwan ai kaiki uplika nani ra witin nani dukia dîa briaia ba yabisna; diara manakira nani ni watla nani ba banhki daukisna.

²² “Dawan ai warkka nani tâ pali ra ai paski ai brin, witin diara nani patitara daukan ba kankika ra.

²³ Blasi pali wina, yang pas bapi ai bukan kan, diara sut kan kira, wan tasba kau âpu kan ba ra.

²⁴ Kabu tara nani âpu kan bara yang pat ai paski kan, lî kârma nani, lî ni banhwi ba sut kau âpu kan ba ra.

²⁵ Kau il tara nani paskras kata, kiuhsi nani sin kankika ra yang pat ai paskan kan;

²⁶ witin tasba na, twi tasbaya nani ba sin kau daukras kata, wan tasba aiska pukpukika nani ba sin.

²⁷ Witin kasbrika pura ba paskan, kabu tara purara, bahara yang bâra kapri.

²⁸ Witin kasbrika nani wan tasba purara mangkan ba ra, kabu tara kârma nani pain daukan,

²⁹ witin kabu laya nani ra adar yabi mangkan, lî nani ba ai markka mangkan ba wina luaia apia, witin tasba playka nani ba, bapi mangki kan kata,

³⁰ yang bâra katna ai lamara, ai bîla kat dauki, yang sika piu bani ra ai liliaka katna bara ai mawanra awar bani ra puli kapri.

³¹ Tasba paski daukan ba bilara, yang puli katna, ¡yang lilia daira walri upla paskan ba dukiara!

³² “Bara nanara, luhpi nani, yang ra wals; yamni pali kama, yang yabalki ra kaka.

³³ Smalkanka ba wals, sins lâka ba bahki kulkpara.

³⁴ Yamni pali sa yang ra wali uplika ba, yu bani aihwaki kaikisa, waitla durka ra nani ra.

³⁵ Kan yang ai sakaia ba, sim rayaka pliki sakaia ba baku sa, bara Dawan kupia yamnika lâka bribia.

³⁶ Sakuna yang wina sait ra takaia ba lika rayakam ba pât ra mangkisma; ¡misbara ai kaikma kaka, prura ra latwan kaikisma!”