Sins Lâka 6 - DAWAN BÎLA AISKA

Witnis aimakaia mapara kupia kraukanka nani

¹ Luhpi waitna, man uplikam dukiara witniska takram sa kaka, apia kaka man upla tringsar hilpka takram kaka;

² man yakan minam alkaika ra wih aimakisma: aiblakwi takaskisma, man klauna bîlam aisanka ra.

³ Yang luhpi, pri takaia sma kaka kan upla wala mihta ra sma bamna, naha dukia nani dauks, praut lâka ba lanhks bara uplikam aihwa ra tras alks.

⁴ Man yappara, minit kum sin ris bripara.

⁵ Sula baku plaps daiwan âikra aula ba wina; daiwan tnawira baku plaps, mina mangki alkaika wina ba.

Sringwaskira nani ra smalkanka ba

⁶ Papu ra wih kaiks, sringwaskira, kaiks dîa dauki ba, bara smalkanka ba lan taks.

⁷ Witin ba ai wihtka tara âpu, pura kakaira sin âpu dîa daukaia ba.

⁸ Mani piua ra, ai pata nani kasak suni brisa, insla mâ kriki piua ra asla dauki sunisa.

⁹ ¡Aitani yapram, sringwaskira! ¡Bahara pat aitani aitnikram sa!

¹⁰ Man kau yaprisauhkan kaiki lamla wauhisma ba ra, kau pain yapaia wisi mihtam kruski alki prawisma.

¹¹ Umpira lâka ba balbia mampara aiklabaia, âimplikra kum ridi taki aula ba, baku man ra balbia.

Upla saurakira natka nani ba

¹² Upla rugkira bara aisawan nani ba, piu bani kunin aisi wataukisa;

¹³ ai nakra nani kiuskisa, ai mina nani ni sain daukisa, ai mihta sirpika nani kulki marikisa;

¹⁴ witin lukanka ra lâ warha nani bâra sa, piua bani ra lukisa saura ba daukaia, bara unsaban lâka tuski wataukisa.

¹⁵ Baha mita minit kumi ra sauhki tikan lâka ba balbia; wan nakra klipan kumi ra. Hilp âpu kira aisawi takaskan kabia.

Dawan mita saura pali kaiki ba

¹⁶ Diara 6, apia kaka 7 bâra sa, Dawan mita aiska misbara kaiki ba:

¹⁷ ai nakra praut lâka ra kaiki ba, twisa kunin aisi ba, mihta nani sin tala pâtkas laiki ba,

¹⁸ lukanka saura daukaia luki paski ba, mina nani aihni diara saura daukaia brih wi ba,

¹⁹ Witnis kuninkira ai bîla wina kunin man aisi ba, bara ani uplika tuski unsaban daukisa ai muihni nani tilara.

Marit lâka sauhkaia ba tâka wina dîa bal taki ba

²⁰ Yang luhpi, piu bani ra lukankam ra mangki bri bas aisikam, yaptikam lâ mai smalkanka nani ba.

²¹ Piu bani ra kupiam purara brih was; namna ra wilki bris,

²² yabal ra wataukisma ba ra tâm bri kabia; yapisma ba ra main mai kaikbia; rawi buma ba ra, man wal aisabia.

²³ Kasak lâ bîla bara smalkanka ba, lamp kum ingni klauhi ba sika; wapni takaia lâka bara kupia kraukaia ba sika, rayaka yabalka ba.

²⁴ Mairin saura ba wina main mai kaiki kabia, upla maya bîla damni aisi ba wina sin.

²⁵ Witin wîna tara painka ba kaiki kupiam ra brin mai daukbiara; ¡ai nakra mai kaiki ba wal, yabrika kupiam alkbiara!

²⁶ Ur mairin ba, plun bîla kumi ninara wîsa, sakuna upla maya lâka sasauhkra ba, waitna kulkanka bri ba ninara wîsa.

²⁷ Ya pauta klauhan ai lama bilara mangki ba, kau sin lukras kwalka amisa.

²⁸ Waitna sin masku lakni purara taibia kaka, ai mina nani tuhan kabia.

²⁹ Ya upla maya wal aiblakwi ba, klala luha kabia apia.

³⁰ Upla kumi sin âimplikra ba, bahki kulkras sa plun dauki kan ai biara banhkaia dukiara impliki ba,

³¹ ban kra impliki kaka dara walras alkbia kaka, aima 7 taim kli implikan dukia ba yabia bara kau yabaia kabia diara sut bri ba wina.

³² Ya upla maya wal tauki ba sinskas lâka sa, ya baha dauki ba ai rayaka sauhki tikisa.

³³ Kan wal prawaia kabia pruki saura munaia lâka bribia, bara diara kumi sin âpu kabia, diki sakaia saura pali kulkan ba wina.

³⁴ Kan waitna lalawra ba pauta klauhan baku sa, bara padin munras pana munaia piua aula ba ra.

³⁵ Witin mairin ba pura mana sât aibapbia ni sin, sip aitani kulki bribia apia, sip sin pâtka ba swih tikbia apia, man prisant ailal yama ni sin.